Dvrá svrarì svng gùngkeo we

Vnvm vchvng rìé, namaq kagǿ svng gø dvshá mvlulv́m rvt, nøngmaq nø vdèdè dvkúmshìlv́m vyáng yaqdø̀ng bv̀nlì wàì nø, mvjòr høq nøngmaq dvzaqshàì weí Gvray Dvbùshv̀ngkà namaq svng dvshv̄ng yv̀ngshà tvrà namaqí gø dvdv̄m dèrǿnnøngni.  Ekv́mnøngrì namaq mv́rdv̀ngø nøngmaq nø kadvngshì ni nøtlø̀m nøt mvdóng nø shvràlv́m màvl dø wáshì yv̀ngshà we svng nø, namaq gø Gvray gø shvkse èínønge.  Kadø íe wani, angpè tiq gǿí angcè svng shvngø:tnò padø, nøngmaqí namaq tiq gǿ nø tiq gǿ svng kadøwa dvshat dvzi:tnì sórí nøt shvlø̀:mì nø,  Ang móngdàn nvng ngø̀rdvgùng vdòng svng dvgònglv́m ègonø̀ng pè Gvray mv́rdv̀ngø go vpǿ dø tvnùnglv́m rvt nònggùn zí yv̀ngshà we gø namaqí èshánønge. Vrá, namaqí nøngmaq yv́ng kèní Gvray mòngkà ètá bǿshà ke, vsvng kà mø̀í, Gvray mòngkà íe, wa nàto yv̀ngshà rvtnø, nøngmaq nø mànārnār Gvray kaq oqà wàìe. Mòngkà yalòng nø jø̀ngjǿng Gvray mòngkà í nø èkv́mnøngrì namaq nøt vdòng taq dvzaqshìe.

Nøt vní shvlē èínøng we dvrá svrarì nvng Farisirì namaq nø mèhøt lóngnønge. Pàwálv́m wani namaq nø mvdv̀m lap nø lòngtǿ:ní vzáshaq vnvp dø yv́ngshì nìgø, vdòng rv́m nø shìrì shārø nvng mvmv́ng mvshèr we dvchǿng dvn vdeq we, lóngdùng dvgv̀m rì dø nàshv́mnønge.  Namaq nø vsvng mv́rdv̀ngø døngman ra dø mv̀rshv̀m dètānshìnøng we namaq nøt taq nø nøt vní shvlē wáshì we nvng dvrá mvcv̀n we dv̀n nàdeqnønge.  Nøt vní shvlē èínøng we dvrá svrarì nvng Farisirì namaq nø mèhøt lóngnønge. Pàwálv́m wani namaqí nø kàdvtutshúri dvgv̀mrì svng nàrv̄ngnøng nø, døngman rìò lóng dø̀mrø̄ vwáshaq rì svng dècøpnøng nø;  ‘Vkop vkàng maq mvrīl taq nøngmaq lā v̀l yà:ngì pà í nìnø, kàdvtutshúri shvwī shvyǿò we taq nøngmaq nø dā màbāmshì yà:ngìni,’ èwànø̀nge. Namaq yadø èshø̀nnøng yv́ng kèní namaq nø, kàdvtutshúri svng shvt yà:ngà rì angmaq angcǿ angcèrì ni èínøng we shvkse nø, namaq ni èwáshìnønge.  Wervtnø̀ namaq nvkop nvkàng maqí wá pv̀ng yà:ngà rì shvngbe wá dègømng.