Tiqcé vní pè dvzv́r bǿà we

Vnvm vchvng rìé, nøngmaqí dvshà mvhøtrì vhǿ:mì we ínìgø, namaq kv́mnøt ètǿngnøng we tá lú:nì rvt nøngmaq gø namaq rvtnø nònggùn lún bǿshà. Namaq nø Vkàngpè vdòng taq akvt høq tǿngtǿng wa èripnø̀ng we í rvtnø, nøngmaq gø gvzà nøt shø̀:mìe. Nøngmaq nø namaq rvtnø Gvray mv́rdv̀ngø lú:nì we dvbúrà yadv́ngte rvtnø, kadø wa oqà wá lvdá:ngì ni ma?Nøngmaqí namaq kv́mnøt mvkø̀m mvgøm yv́ng kø̀m dvgø̄mālv́m rvt, namaqó mv̀rshv̀m vhø̄m lúnlv́m rvt gø nøngmaqí vyáng yaqdø̀ng vjú rø:tnìe.  Nøngmaq Vpè Gvray nvng nøngmaq Vkàngpè Yesuí, namaq yv́ng tuqlvm nøngmaq svng tvrà leq wáa daqì. Vrá namaq svng nøngmaq shóngshàì dø namaq gø nàshòng kénøng nø, vsvng shvngbe kaq gø shóngshì lúnlv́m dvpvt Kàngpèí namaq shóngnøt svng leq shèluqa daqnø̀ng. Nøngmaq Kàngpè Yesu Kristu nø Ang muqlàng dvzv́rrì nvng tiqdø di daq kvt namaq nø Vpè Gvray mv́rdv̀ngø rvcv̀ng we èlúnnøng nø cip màvl vsvng í lúnlv́m rvt A:ngí namaq nøt svng leq dètǿng daqnø̀ng.

Kadø íe wani Herod nø angnv̄m pè Pilip chø̀mmè Herodia nvng v̄l rvt, Yohaní ang svng, “Nvnvmpè chø̀mmè svng èlūshi we nø màdvrá,” a:lò rvtnø Herod ang vdèí vmíng zíò nø Yohan svng tūng róng yà:ngà we íe.  Herodia nø Yohan svng mvwv́mshì rvt shvt mvyǿ nìgø shvt mvlú:nò. Kadø íe wani Yohan nø døngman nø shànshér vsvng í we Herodní sháò rvt vpǿ svreò nø, ang svng gā:ròe. Yohaní shø̀:nò rì svng a:ngí tá lú:nò ke gvzà gónggi we í nìgø, ang kà rì svng gvzà tá shóngshie. Wemèpvng, Herod gv̀l yà:ngà we angni vhø̄m ráì kvt, a:ngí nø gàmzø̀rì nvng cìldù vgorì nvng Galili shaqrérì dvpvt shòrkung v́mbóy dvgǿaòe. Yuqyà we angni tiq ni íá:mì. Herodia angcè mè gòng nø lv̀m weí, Herod nvng tiqdø v̄m aq we shaqrérì svng dvbú dvzá:ròe. Wervt koqkv́m pèí chø̀myoré mè svng, “Nà èshòng we pà í nìgø èrøtshi; ngàí zílv́m íe,” a:lòe. Wedø wa mvtaq ang dvgv́mshi sórí, “Nà kapà èrøtshi rā nìgø, ngà móngdàn tiqkā høq í nìgø ngàí zílv́m íe,” a:lòe.  Chø̀myoré mè búngá:mì nø angmè svng, “Ngà pà røtshìlv́m í ma?” a:lò ke angmèí, “Tiløp Yohan vgo chvng èrøtná:mò,” a:lòe. Wekvt chàng koqkv́m pè yv́ng svng ang gòng nø, “Tiløp Yohan vgo chv̀ng kūng taq èzá:ngò nø èzǿngà we svng ngà shònge,” a:lòe.  Wekvt Koqkv́mpè nø gvzà nøt dvshàá:mì nìgø ang dvgv́mshi bǿì kà rvt gø, ang nvng tiqdø rung we mvnv́mrì rvt gø, wemè røtkà svng màwáa mvdaqá:mì.  Wervt Koqkv́m pèí wela:ngí ni cìlcè tiq pè dvzá:rò nø, Yohan vgo chvng lvlv́nga:tnò dø dvká:mòe. Wepè búngá:mì nø, tūng vdòngø Yohan vgo tu:tnòe.  Yohan vgo chv̀ng nø kūng tiq gø̀m taq lv́nga:tnà nø chø̀myoré mè svng zí bǿà nìnø, wemèí nø angmè svng zí bǿà.  Yohan coqcv́nrìí tá bǿà kvt, angmaq dì ráì weí, ang vnàng baqò nø kǿm bǿà.