Muqlàng móngdàn kàshvbóng

Vpø íwe pèmè vnvmchvngmaq yalvban nø àngwa Nár (17) lvban wà lvban svng gòng bø'shà.Yalvban rø v-du we Mongkàciq rì nø;

(1) 1 Koqkvm 3;5,7-12
(2) Roma 8;28-30
Mati 13;44_52

Muqlàng móngdàn kàshvbóng

 “Muqlàng móngdàn nø, rvmá tiq hv́ng taq vmáshaq vpø̀ tiq bø̄m nvng vbónge. Vsvng tiq gǿí yv̀ng bǿò kvt nø, mā máò nø, welòng rvt dvbù weí, div̄m nø ang vdá we í dv́ngte nv̄mshi dv̀ng rvmá wehv́ng wv̄nshie.  Vrá, muqlàng móngdàn nø, rvlogwìngshíng shvlá láò we wulaq wa vsvng nvng vbónge. Vtv̄ngshaq vpǿ we rvlogwìngshíng tiq chv̀ng lá lún bǿà kvt nø, div̄m nø ang vdá we í dv́ngte nā:mò nø wechv̀ng wv̄nshi bǿì. 

 Vrá, muqlàng móngdàn nø, tìnúng taq gø:pmò nø, Ngā angpv̀npv̀n shvngbe gøp lú:nò we shǿmgún tiq lòng nvng vbónge.  Shǿmgún dv̀n zø̀ngvm kvt, angmaqí vdàm pā svng shv̀la:tnò nø, rung sórí ngà shvlá rì rvcà:ngò nø dvrè taq zá:ngòe. Inìgø màshvla rì svng nø angmaqí gu:ròe.  Rvgaq yabàn tìsi lv̀ngdø̀m rvtø̀ taq gø welòng dø tiqdvchá, muqlàng dvzv́rrì búng daq weí, døngman rì dvhø̀ taqkèní vsvng mvgv́m rì svng rvwìng bǿò nø,  svmi ràdv̀ng vdòng svng werì gūr bǿòe. Weyv́ng angmaq ngø̄ nø shà vjitshi sórí tǿnshi we vhǿm lú:ngòe. Yadv́ng pv̀n shvngbe namaqí ècíng bǿshà ma?” wa rø:tnò kvt angmaqí Yesu svng, “Cíng bǿshà,” a:lòe.  Wekvt A:ngí angmaq svng, “Wedø í rvtnø muqlàng móngdàn dāng shvngøtshaq í we mòngkà kàru cv̄nshì vsvng* gǿ vrv̀m nø, ang pø̀bø̄m taqkèní dvrè angshv́r gø, anglí gø, vpùn lú:ngò we chø̀m angkàng tiq gǿ nvng vbónge,” a:lòe.

Vpø íwe pèmè vnvmchvngmaq,
Muqlàng móngdàn nø vpø ' vtv'ng vpø̀ zaqshøp tiq bø̄m nvng Àng dvpø' zun mvtv'ngshì we vpø nvng vbóngè wàe. Wèlòng vpø̀ zaqshøp lòng svng vtōshì lúnlvm rvt nøngmaq taqø vl dv'ngte shvngbe svng nvmdv'ng í wvnshì kvtwa vtoshì lúnlvm vlē wàdang svng shvdø'mè. Muqlang móngdàn wàwe nø Gvray gvsangí øp we , Gvray gvsangò shóngnønt, Gvray gvsangò dvshá zā mvkok dvdi nønt, Gvray gvsangí mvrarì svng Chutnà we, mongzøl byō we yadø dvpø' zun mvdv'ngshì we dang rì íe. Mongzøl nø byō we shvra taqø Muqlang móngdàn vlē. Shóngnønt vl we shvra taqø Muqlang móngdàn vlē. Dvshá zā mvkok dvdi shóngnønt vl we, Mvra chutnà we shvra taqø Muqlang móngdàn vlē. Vkvt dø àng dvpø' zun mvdv'ngshì we bvnlì rì svng vtoshì lúnlvm rvt dvshá kámshì ra, zí shì ra rì mvmè vlē. Mònggvn taq vl we vshé, Ja gvmsùng vpø rì nø dø':ngvng lòng mø-í, Dìngman nø dvciq lvpat byōlvm lòng svng zílún we mø-í. 

Mongkà (1) ciq taq Gvray gvsangí Solomon Koqkvmpè svng àng ra lòng svng røt nímshì dvzvrò dvgvp Solomon Koqkvmpè í vpø zaqshøp vdá mvgvm lvm rvt mv-røshì yang. shvla lòng nvng mv-gvm lòng svng rvwvn shálvm talen lòng svng mvng vtōshì lúnlvm rvt røtnímshì yangì we svng yv'nglún shìe.

Nøngmaq gø' vrv'mí gø vpø' shvringì lòng, røtnímshì mvyøì lòng nø kapà íe mà?. Rvgaqtøm nvng singwe vshé Ja gvmsùng pøhap, vmìng vkang rì í mà?. Tiqlangce dvpvt wā rvgaqtøm taqø mongzøl lòng zí lún we vpø rì mvdvm, Dvciq lvpat mongzøl lòng zí lún we Muqlang zaqshøp vpørì mvng lashì laqlúni, shøpshì laqlúnì. Shvla lòng nvng mv-gvm lòng svng rvwvn lún we talen jèjúrì svng gø røtnímshì nø shagóng Pvlàcè kvmnønt nònggùn kūnga lùshàì wvng dvshat nø nònggùn zí mvyøngè. Shvngbeí Gvray mongzøl lòng nvng Pvlàcè ìshøt vtōshì laqlúni. Shvngbe svng oqā...