Tì mvdv̀m Yesu di we

Tì mvdv̀m Yesu di we
A:ngí vsvng loksokrì svng dvka:ngò la:ngí, Ang coqcv́nrì svng nø welv̄ng ni kùngshí taq zv́ngshì nø Ang vzv̀ngzv̀ng kupa svng léshì dvzá:ròe. Vsvng loksokrì svng dvkāng bǿà weó, Ang tiq gǿ wa vjú røtlv́m rvt mvrè svng rvlv̀ngá:mì. Yø̀myø̀m wā dø̄á:mì høq Ang wāwā weyv́ngø v̄le.  Coqcv́nrì zúnshì we kùngshí gø̀m nø vdàm pā kèní mvme farlong* vsārá:mì ke, nv̀mbø̀ng mvrù mut ráì nø kùngshí gø̀m svng tìmaí vpuqòe.  Sháng vbì rí dvgvp,* Yesu nø tìnúng mvdv̀mdv̀m di nø angmaq yv́ng svng tuq ráì.  Tì mvdv̀mdv̀m Ang dì ráì we svng coqcv́nrìí yv̀ng bǿà kvt, angmaq chvnvnv́n lú:ngì nø, “Rvshā íe lé,” wa nø, svre weí vkiq lú:ngì.  Iwe, wela:ngí Yesu kà tv́ngshì nø angmaq svng, “Shø̀mwa èv̀lnøng, Ngà ǿngàe; mèsèrenøngni,” a:lòe. Piter Ang svng tv́ngshì nø, “Vkàngpèá, Nà ni èí nìnø, tì mvdv̀mdv̀m Nà yv́ng svng ngà dí dèzv́rà,” a:lòe.  Yesuí, “Edi ra lè,” a:lò nìnø, Piter nø kùngshí gø̀m kèní lāshì daqì nø, tì mvdv̀mdv̀m Yesu yv́ng svng dì ráì.

 Wedø ínìgø nv̀mbø̀ng mvrù mut we svng yv̀ng bǿà kvt ang svre lú:ngì weó, vjúmlv́m wáshì rvt vkiq sórí, “Vkàngpèá, shèlutnàé,” wae. Tiqdvshaqí Yesu wur zúshi nø, ang svng ta:pmò sórí, “Kv́mnøt ècv̀m pèé, pàwálv́m kv́mnøt nàwv̄lshìe?” a:lòe.  Angní kùngshí vdòng svng zv́ngshì bǿì weó, nv̀mbø̀ng gø zø̀lá:mì. Wekvt kùngshí taq v̄l rì angmaqí nø Ang svng køt ngǿmshi noqò sórí, “Nà nø jø̀ngjǿng Gvray Angcè pè ni èí dá:rì,” a:lòe.  Angmaq kupa svng rvpshiá:mì nø, Genesaret rvgaq svng koqshì ráì. Wervgaq vsvngrìí Yesu tuq ráì we shá bǿà kvt, angmaqí wervgaq gùrgùr svng vsvng dvzá:rò nø, rv̀ngdì zā vsvng shvngbebe Ang yv́ng svng shøla:tnà.  Angmaqí Ang bèlaq mvtú svng wa shup lúnlv́m gø Ang svng kórshì nø, kadv́ng gǿí shu:pmò nìnø wedv́ng gǿ ni vrǿng làshv̀ng bāná:mì.