Ìshøt ìgv̀n kà

Namaq svng nø, Kristu nvng tiqdø dvzunshaq èínøng rvtnø, muqlàng taqlap Gvray vbàng pa rung pè Kristu Ang taq vl rì svng nøt nàdǿnshìnø̀ng.Namaq nøt nø rvgaq tø̀mø vlrì svng màdǿnshishaq, muqlàng taqlap vlrì svng lè nàdǿnshìnø̀ng.  Kadø íe wani namaq nø èshì yv̀ngshà nø, namaq gø̀nshaq gø Kristu nvng tiqdø Gvray vdòng taq lè vmáshaq íá:mì.  Vrá Kristu nø nøngmaq gø̀nshaq èíāìe. Ang dvtánshì daq kvt namaq gø Ang nvng tiqdø ngø̀rdvgùng mèngú daqnø̀nge. Wervtnø̀ rvgaq svng vdǿnshi we namaq dvgv̀ngrì dèshínøng. Werì nø dvchap we, mvshàn mvshèr we, chá vlēò høq mvrøt we, mvgv̄m màshvla pv̀n svng mvlá we nvng shaqkaq we yarì íe. Shaqkaq we nø pvràhang svng noqò we ó dvchá íe. Yadv́ng pv̀n wàò rì mvdv̀m taq Gvray shv̀mná høpnøt tuq daqe.  Dárì namaq gø yarì taq ècúnshinøng dvgvp, namaqí gø yarì ni ècv̀n yv̀ngshà.  Iwe, akvt mv̀ng namaqí nø; shv̀mná rí we, høpnøt vcōr we, shǿm nø màshvla we, shvyǿm mvtv́n we,* nònggø:pmí mvmv́ng kà shø̀n we yarì shvngbe ègurnøng.  Namaqí nø svngli nvng ang bv̀nlì rì svng chut ègurnøng nø, svngshv́r laqyà ègwashì bǿshà rvt mènàyùmkénøngni. Sv̀ngshv́r yagǿ nø ang svng Mv́npè mv̀rshv̀m vmvt nø, Ang svng sháò we shánøt taq angshv́r vpo mvnshì we íe.  Sv̀ngshv́r vdòng taq nø, Heleni vsvng, Yuda vsvng, rvmø̄l vtóng lú:nòrì nvng mvlú:nòrì, wv́ngzà, svngdām vshuq nvng pèjøng vwállv́m màvl; Kristu nø shvngbeò í nø, Ang nø shvngbe vdòng taq v̄le.

Ang coqcv́nrì svng dvjaqò taqsórí Yesuí a:lò we nø, “Mvshámhoq dèshànøng rì namaqí nø ìshøt ìgv̀n lúnlv́m íá:mì; pàwálv́m wani Gvray móngdàn nø namaqò èíanø̀nge.  Yadvgvp svrí èshìnø̀ng rì namaqí nø ìshøt ìgv̀n lúnlv́m íá:mì; pàwálv́m wani namaqí vgá èlún daqnø̀nge. Yadvgvp rèyù rèyúngnøng rì namaqí nø ìshøt ìgv̀n lúnlv́m íá:mì; pàwálv́m wani namaq nàhø̄shì lóngnønge.  Vsvng Angcè Pè Ngà rvtnø Vsàngí namaq svng shèngōvtnøng, rewìngvtnøng, dècø̄vtnøng, namaq bø̀ng svng mvgv̄m màshvla pv̀n dø shèyǿmvtnøng kvt, namaqí nø ìshøt ìgv̀n lúnlv́m íá:mì.  Wervt dèbùnøng nø èchóngshìnø̀ng. Pàwálv́m wani ku, muqlàng taqlapmø namaq zìbè nø ringe.