Heleni rìí Yesu svng láò we taq shvngøtnò we Mongkà íē.

Shvngbeí Gvray yv'ngkèní Shiqshàn mongzøl lòng vtoshì laqlúnì. Dèni nònggùn lùshì lvm Gvray móngkà nø Yohan 12:24-26 taqkèní íe.

Heleni rìí Yesu svng láò we taq shvngøtnò we Mongkà íē.

Vpø íwe pèmè vnvmchvngmaq,
Vsvng lvpat taq Dvshá kàmshì taqsórí vpnóngshì nø zíshì we vl kvtwa Døngku vdòng taq gø, vsvng muqhø'm mvdò vdòng taq gø vjú lún nø Gvray dvgùng dvbung lúnlvm vl we íe. Yalòng svng zongshí kàshvbóng taqkèní Vkangpè Yesuí nø shvngøt dètú íe. Shànshér pè Lawring pàdø Kvmnønt svrē rì nø wè zongshí dø shí kvmshì pàdø Sasvna me nø angshí angwvt rì í dvnzøngè. Shì lòng nvng Cúnshì lòngò àng mvtú àng mvnggá svng gø Vkangpè Yesuí vkvtdø dvtánòe. Vsvng nø àngdeò vbat lvpat taqwā vlín sháìe. Shì lvm lòng svng shvre sháìe. Àngdeò Lvpat taq gø'ngzøl dø cúnshì lúnlvm lòng svng mvrøtnì taqsórí shìlvm lòng nvng vhø'm vdùe. Dìngman we Kvmnønt tvrà taq Shìlvm lòng svng mà shvre gø'wā dvciq lvpat gønshaq cúnshì lúnlvm, vtōshì lúnlvm vlē wàlong svng Vkangpè Yesu shø'n mvyø we dang gø íe. Sasvnaò svrē rì nø Kvmnønt tvrà dvpvt , Dìngman we dvrá lòng dvpvt shíkvm shì pàdø àngmaqí nø dvciq lvpat gønshaq shémo svng vtoshì lúnò rì gø íē, wàdang svng gø dvdvm nø nònggùn lùshì dvzvrè , nònggùn lùshì shvla we íe.

Gvray móngkà taq;

24 Ngàí kàdøng v̄la:tnìni, zongshí tiq chv̀ng nø vba rv́m svng vløpmv̄m dá:ngí mvshì nìnø, wechv̀ng wa v́ldv̀ng wae. Inìgø shìv̄m nìnø, angshí mvme zí longe. n 25 Vdè gø̀nshaq svng mvpáshi gǿ nø, ang gø̀nshaq vmvngv̄me. Rvgaq yalòng taq vdè gø̀nshaq svng màmvpáshi gǿí nø, dvciq lvpat gø̀nshaq shøpshì lú:nòe. o 26 Ngà svng dvzøm mvyǿ gǿ nø Ngà mèpvng laq cv̀n ra. Ngà kayv́ng v̄lnøng nø, Ngà svng dèzøm gǿ gø̄ weyv́ng v́l lúnlv́m íe. Ngà svng dèzøm gǿ svng nø, Vpèí gø vpǿ shvringlv́m íe, wàe.

Vpø íwe vnvmchvngmaq, V-li we shvrà taqø Gvray móngdàn dvpvt shvlá vtv'ng ídø Kvmnønt shóngnønt kèní dvzømshàì lòng, dvtáni lòng nø Vkangpè Yesu Gvray nvng tiqdø vl lúnì lòng gø íe, wàdang svng gø dvdvm nø nònggùn lùshì laqlúni. Shvngbe svng oqā.