Vléò rì kaq chutnā rà we

Shvngbe svng Pàmvrà
Desháng vrá Pvlàcè kvmnønt nònggùn lùshì lvm Gvray móngkà nø Mati 18:21, 19:1 vdòng taqkèní íe. Mongkà vzàng rø shìlvm wàì.

Vléò rì kaq chutnā rà we
 We mèpvng Ang yv́ng svng Piter di ráì nø, “Vkàngpèá, ngà vnvm vchā:ngí ngà svng nàléngvt nìnø ngàí ang svng kadv́ng kvt chutnālv́m í ma? Shvngøt kvt dv́ngte nø vrv̄me ma?” a:lòe.

Chø̀mpè chø̀mmè vkàng mvdaq we
 Kà yarì Yesuí shǿn dv́ng bǿà nìnø, Galili rvgaq kèní Ang búngá:mì nø, Yordan tìwàng kupa Yuda rvgaq svng dìá:mì. 

Vpø íwe pèmè vnvmchvngmaq, Vsvng nø kømzup a:mì wàwe tiqgø' gø mà-vl. Mv kømzup we vsvng gø'vrvm taq shaqcvm lvm rì, shvralvm rì vl vdù we íē. Wè vdòng taqø nøngmaq gø'vrvm gø vbá íwe svng vnáshì we vl mvdaq. Vsvng nø àngdeò Mvra svng vlún tv'ngte māshì mvyø íe. Māshì mvlún lúngì dvgvp vyá wáshà íe. Vyá wáshì màshvla lòng dvgvp àngde shaqcvmì lòng svng Cíngàlvm rvt røtnímshì mvyø' íe. Shá dvzvr mvyø' íe.

Dvshá za shóngnønt walòng svng vsvngrì í shønì we taq gvzà yòrni gø Jø'ngjø'ng chaqdvp yv'ngø gvzà cvndvgøm we mà-vl. Vkvtdø shàngwā íwe shóngnønt Dvrá svng vsvng Shvngbeí cvndvgøm lúnì nìnø mònggvn yachàng taq gvzà vnvp nø mongzøl we íe. Ngà vmìng vkang yalòng svng lún mvyøngè wànø shøngø'  ígø lúnò na íe. Ngà kaq shvnip shvnar we yalòng svng mvshóngshøng wā shøn nìnø àng gø shóngshìlvm mø-í vkvtdø dvshá zā shóngnønt dvnzøng sórí chaqdvp cvndvgøm kvtwa cìl mvjvn rì, shvnip shvnar, nà jór ,ngà jór wàwe vllvm gø mø-í. Àngde Mvra nø chutnà meyø, Tiqdvng Vsvng Mvra rì nø wūrhāmì dvnu nø shvraqchaq meyø nìnø dvbùshang mongkà taqkèní kashvbóng pà ílvm dingè. Gvrayí nø luqtvm dø èvm nøng vsvngrì í Dvrá Ubvde cvnlvm rvt mvrøt. Ubvde (2) lòng wā vlē. Tiqlòng nø Gvray kaq eshóngshì, Vní lòng walòng nø àngde nvng nítvp gø'kaq svng àngde góng dø tiqdvchá eshóngshì wàwe (2) lòng taqkèní vrvngshì dvzvrè. Tiqlvp kèní èshøn lúngò dvgvp, dedvm lúngò dvgvp dvshá zā Nønt gvlshì lvm lòng íe. 

Mvra chutnà lvwvn nø shóngnønt vzø'm vzap weí Gvray móngdàn dvsher lúnlvm dèkv'mì e.