Chø̀mpè chø̀mmè vkàng mvdaq we

Chø̀mpè chø̀mmè vkàng mvdaq we
Farisirì nø Ang svng vløtlv́m di lú:ngì nø a:lò we nø, “Mvtú tiq pv̀npv̀n rvtnø, vdè chø̀mmè svng gū:rò lòng nø, dvrá má, màdvrá má?” wa rø:tnòe.  Yesuí werì svng vtà:ngò nø, “Nv̀mlat nv̀mpv́ng taq vsvng kaq Mv́n pè Gvrayí nø, svmaré lvngàré shvgøp vzø̀m dø mv́n yà:ngà.  ‘Yadø í rvtnø lvngàré nø angpè angmè yv́ng kèní rv́lshì dv̀ng, ang chø̀mmè nvng vzø̀mvm nø, angní nø tiqshing tiq góng wa ív̄me,’ wa kà svng mèrø dv́rnøng ma?  Angní nø wekvt kèní kukaq vní gǿ nø mø̀í, tiqshing tiq góng wā íe. Wervtnø̀ Gvrayí dvhǿmshaq lòng svng vsvng kagǿí gø laq màdvka:ngò,” a:lòe. Wekvt angmaqí Ang svng, “Wedø íni, ‘Ang chø̀mmè gūr we kàru zíò dá:ngí nø, ang chø̀mmè svng gurdv̀ng íe,’ wa nø Moshií pàwálv́m dvkv́m yà:ngà ma?” a:lòe.

Yesuí angmaq svng, “Namaq nøt èzaqnøng rvtnø, nvchø̀mmè maq svng gurlv́m Moshi gø vrá yà:ngì we íe. Iwe nv̀mlat nv̀mpv́ng kèní nø wedø mø̀í. Ngàí namaq svng v̄la:tnìni, dvchap mvrà wàò rvt wa mø̀í nìnø, ang chø̀mmè svng gu:rò nø dvgá tiq mè nvng shvzøngshìvm we wegǿí nø dvchap we mvrà wàò we íe. (Vrá, gūr bǿà mè nvng shvzøngshì gǿ ang gø wedøni dvchap we mvrà wàò we íe,”)* a:lòe.  Wervt coqcv́nrìí Ang svng, “Chø̀mpè nvng chø̀mmè dvrá nø to èshø̀:nò døni í kvt kèní nø, svma màlushi èv̄l lòng té shvlae,” a:lòe.  A:ngí angmaq svng, “Shvngøt kà yalòng svng nø vsvng shvngbeí vtō mvngu:tnò; vtōlv́m vzíshaq rìí wa vtō lú:nòe. Kadø íe wani, angmèí gv̀l daqò yv́ng kèní sv̀ngshv̄n í we tiqmaq v̄le. Vsa:ngí shā:nò we gø tiqmaq v̄le. Vrá, Gvray móngdàn dvpvt rvtnø dø̀ngku mvdēshì we gø tiqmaq v̄le. Yalòng svng vtō ngu:tnò gǿ nø laq vtōshì,” a:lòe.