Lv̀ngzv̄ng goò we kàshvbóng

Lv̀ngzv̄ng goò we kàshvbóng
 “Muqlàng móngdàn nø bìm kùlwàng taq bv̀nlì wáshú lv̀ngzv̄ng go nvng svng, sháng mvgágá búngá:mì we rvmá angkàng tiq gǿ nvng vbónge. Wepèí lv̀ngzv̄ngrì svng tiq ni dvpvt gv̀msùng tiq lvp zílv́m kà taq vrá bǿì dá:ngí, ang bìm kùlwàng svng angmaq dvzv́r bǿà.  Vsháng nari dvgø̀* dvgvp ang vrá búngá:mì nø, gvttø̀mø̄ tiqmaq bv̀nlì màdá rip we svng yv̀ng bǿà rvt nø, à:ngí werì svng, ‘Namaq gø bìm kùlwàng svng bv̀nlì wá nvng èdìv́mnøng; zí vdu dø ngàí namaq svng zílv́m íe,’ vl bǿà nìnø angmaq gø díá:mì. Tvné vyáng rvwè* taq gø, vrá dørø̀m nari vshø̀m* taq gø ang búngá:mì nø tō sháng døni wàòe. Dørø̀m nari pungwà* taq ang búngá:mì nìnø, dvgá tiqmaq rip dā we svng yv̀ng bǿà nø, a:ngí werì svng gø, ‘Namaq nø pàwálv́m bv̀nlì màdá pònini èripnø̀nge ma?’ a:lòe. Angmaqí ang svng, ‘Nøngmaq svng kagǿí gø mèshoqì rvtnø íe,’ a:lòe. Wekvt a:ngí rá, ‘Namaq gø bìm kùlwàng svng èdìv́mnøng,’ a:lòe.  Dørø̀m høqa:tnà kvt nø, bìm kùlwàng angkàng pèí ang chø̀m øpshú pè svng yadø a:lòe.

‘Lv̀ngzv̄ngrì ègoò nø lv̀ngdø̀m mvdò kèní èpà:ngò nø nv̀mlat mvdò høq, angmaq zìbè ètúnāò,’ a:lòe. Wekvt tō tvné pungwà nari taq shoq dárà rì tuq ráì nìnø, tiq gǿ nø tiq gǿí gv̀msùng talvp lú:nòe. Nv̀mlat shoq dárà rì tuq ráì nìnø, angmaqí nø mvzv́n lúnlv́m íe lá:nò we angmaqí gø tiq gǿí gv̀msùng tiq lvp wa lú:nòe. Angmaqí gv̀msùng tvpshi lún bǿà kvt angmaq nø rvmá angkàng pè svng vbø̄nshì lú:ngì nø,  ‘Nøngmaq nø tiq ni sø̀ngdø dvzaqshàì nø nà:mí ègángke dv́rsha. Lv̀ngdø̀m dì ráì rì nø tiq naricè wa dvzaqshì bǿì we, nàí nø angmaq svng nøngmaqó dvchá èsunaòe,’ wae.  Inìgø a:ngí angmaq taqkèní tiq pè svng a:lò we nø, ‘Jàá, ngàí nà svng màmupmv̄m; tiq ni tiq lvp zílv́m nà nvng vráshaq mø̀í ma? Nà dvpvt lòng èlv̄ngshì nø èlō; ngàí nø lv̀ngdø̀m rì svng gø nà nvng tiqdvchá ni zí mvyǿnge.  Ngà gv̀msùng nø ngà shòng dø lv́nglv́m nø ngà nøt wa mø̀í ma? Mø̀íni ngà nøt gv̄m lòng svng nà nē èzāe ma?’ a:lòe. Ya lòng dø tiqdvchá, lv̀ngdø̀m rì nø nv̀mlat rì ívm nø, nv̀mlat rì nø lv̀ngdø̀m rì í longe,” a:lòe.