Piterí Kristu vchà:ngò we

Angwā (21) lvbán
Esaya 22:19-23, Roma 11:33-36
Mati 16:13-20, (27-8-2023)

Piterí Kristu vchà:ngò we

Kàngpè bøng taq kèní shvngbe svng pàmvra wà:nge. Deni nø angwā dāmvn lvbán (21) wawe lvbán taq tuqra we íe. Deni røvdu we Gvray mòngkà Esaya,

Roma, Mati taq kèní íe. Shvngbe dvpat dvzvr piterí gvzá jò dø vtánshì bø'ì we svng tálún bø'shà. Vkvt tábø shàwe Mati dvbù shvng mòngkà taq kàngpè

Yesuí Sasvna bvnlì waò we dang nø gvza vchvk we rvtø tuqámì we svng dvtvnòe. Kàngpè Yesu nø gvza nønt shvyang shìnø dvzvr rìsvng vní nøng ján

shvngøt dvtú bø'à we íe.  Dvkivrè we dvshàlvm vhømò nø shìlvm ang shvlácè wa ràámì. 

Wervt kàngpè Yesuí ang dvzvr rìsvng jámlvm rvtø tuqráì rvt røtnò we íe. Angmaqí kàngpèò tvrà dang kadángtē shábø'à we svng shá mvyø' rat íe.

Dvzvr rìí ang dang shálvm gvza ràwe svng dø'mòe. We mvtaq rvnaq we ang mvtú rì shvngøt lvm vlwe svng shvdúmòe. Kàngpè Yesu nø

nøngmaq rvsángcèrì shvngbe svng "Nàmaq ígø ngàsvng kadø elán nie má" wanø røtkà íe. Dvzvr rìnø dvzvr piterí nøngmaq shvngbe dvpat

jòdø shvngøt bø'à. Wedø ínigø kàngpè nø nøngmaq gø'vrvmò vtán kà svng shùng we íe. Kàngpè nø nøngmaq svng ni vrvm røt mvyø' we íe. 

Lvbán ni vrvm kàgvp anglí nvng angshvr røshì we íe. Deni gø nvmlat tiqtut svng kàgvp anglí Esaya 22:19-23 taq kàgvp angshvr dvbù shvng

mòngkà nvng vdu vbúng we svng yv'nglún shìe. Kàgvp angshvr nø kàgvp anglí svng síng shálvm tubùm dvbvng we íe. Kàgvp angshvr nø

kàgvp anglí taq Gvrayí shøn yà:ngà kàciqrì, kàdvtutshú rìí, kà dvtut yv:ngà rìsvng dvgømò Gvrayò zitnøt rvlnønt nvng angò ngòrdvgùng

rìsvng síng shálvm gálòng èzí dvbv:ngà we íe. Kàdvtutshú Esaya 22:19-23 ciq nø Kàngpè Yesu shvni mvgārò we vleámì (700) nøng

rvtø Yerusalem wamà nø gvza cil nònggùn vlwe Aseria rìí cere dvkotò we rvtø íe. We rvtø taq kàdvtutshú í, koqkvm pè Cedetki nvng

a:ngò paqzí dvgømshú mvdorì shvngbe kaq Gvrayò mòngkà svng dvtutò wenø "Vsvngrì kaq angmaqí vléò we mvrà dvpat nønt vwáng

shì dvzvr ràe, Vsvng shvngbe kaq Gyray kaq vlømshì lvm kám dvzvr ràe, wedø ècvn nìnø Garvyí nàmaq svng cìlrìò wur taq kèní

shvlut daq nø:nge. Dvgá vsvngrì kaq vlømshì we dang svng ènvl nøng" v:lòe. Wedø ínigø angmaq nøntzaq  shvngò shì nø Gvray

kà svng màvtoòe. Wervt Kàdvtutshú Esaya nø  Shibvnaq svng ang bv̀nlì vya taqkèní dvjáò nø ang v́lrà kèní lùng bø'à. Wekvt Eliakim

svng àngí gōngò nø, nà belaq yvnggúng dùng ang svng dvgwāngò dá:ngí, nà juqná:mí gø ang svng dø̄ngdø̄ng nv̀mò nø, nà vmíng

vkv́ng nø Ngàí ang svng tvlēlvm íe. Wekvt ang nø Yerusalem wamà taq vlrì nvng Yuda rvp cèrì angpè wáshì longe.Wekvt Dawi rvp

vyā ang shv̀msòpuq nø Ngàí ang raqpù taq hapmò nø, a:ngí tàn bǿò lòng svng kagǿí gø cøt mvlún lú:ngò. A:ngí cøt bǿò lòng svng

tán ngu:tnò we kagǿ gø màvl long.

Eliakim ang mvdvmø koqkvm wa mvíni nø dvgá vyā vlwe vsvng màvlámì. Kàdvtutshú Esaya í, shø'nò wedø ni a:ngí tàn bǿò lòng svng

kagǿí gø cøt mvlún lú:ngò. A:ngí cøt bǿò lòng svng tán ngu:tnò we kagǿ gø màvl bø'ì. (Esaya 22:22) Esayaí shønò we gvza vchvke.

Eliakim svng dvle shìwe vkáng vyā nø Yerusalem wamà svng mòngzøl dø mvkok lvm ídaqe wanø shø'n mvyø'we kà íe. Kàdvtutshú

Esaya kaqsvng Gvrayí tvrà shølò nø gvza vchvk we tvrà tiq dang vlwe svng yv'nglún shìe. Kàngpè Yesu Kristu nø mòngkà svng

yv:ngò sháò írvt dvzvr piter svng Esaya mòngkà taq kèní Eliakim dang svng dvtvn we taq kèní Gvrayí nø kàgvp anglí taq bøn

yv:ngà dø ni kàgvp angshvr taq kèní shvdún nø shvngøt we íe.

Dvzvr piterí Yesuí røt kà svng tánā we 
Vsvngrìí vsvng angcèpè ngà kagǿ ǿngà we dang kadø wae?” Kàngpè Yesu nø vsvngí kadø wae svng nøntlúm we mví, angí àshá

shaq íe. - Herod koqkvmò nøt taq “Tiløp Yohan shì yv́ng kèní zūn lú:ngì we íe,” wanø dvdvmòe. (Mati 14:1-2) Ini, namaqí nà! Ngà

kagǿ íe wa dèdvmshàe?” Simon Piterí vtà:ngò nø, “Nà nø cúnshì pè Gvray Angcè Kristu èíe,” a:lòe. We rvtø nø dvzvr rì nvng

kàngpè Yesu dvpat dvgùng gvza vlwe rvtø íe. Kàngpè Yesu nvng tiqdø vlwe vní nøng ján ráì rvt gvza vchvk we rvtø íráì we

svng dvshatnòe. Yona angcè Simoné, nàí nø ìshøt èlú:nòe. Simon wa mví, kàngpè Yesu svng vdèò chángshú nvng vkàngpè

wa vtoò we vsvng gø' vrvmí ìshør lú:nìe.  Ngàí rá nà svng v̄lvtnøng: nà nø Piter èíe. Ngà shvngø̀mré nø lóngdø̀ng yachv̀ng

mvdv̀m taq Ngàí shvzønglv́m íe. Wedø bøng zíò wenø ang svng bvnlì døngjá shvrìò we íe. Kàngpè Yesu nø a:ngò shvngømré

svng Zùpvng dāng ang jórnònggù:ní* shvngø̀mré svng mvdv́ngké lvm lóngdø̀ng íwe Piter mvdv̀m taq shvzø:ngò we íe. 

Dvzvr Poloí Efesus wamà vsvngrì kaq shvngøtnò wenø Vrá, dvzv́rrì nvng kàdvtutshúri chø̀m àngké mvdv̀m taq vrv̄ngshaq èínø̀nge.

Kristu Yesu ang mv̀ng nø, wechø̀m górtong mvdø̀ng lóngchv̀ng ínø̀, Chø̀mkøp nø wechv̀ng taq shvráò yv́ng kèní Shànshér Tø̀ngnø

tiq chø̀m í long høq Kàngpè vdòngø te long we íe. (Efesus 2:20-21) Wervt nø shvngømré wawe vdíndo svng kàngpè Yesuí baiò

we íe, kàngpè Yesu nø shvngømré àngkàng vgo íe. Piter í mvbaìò. Piter nø shvngømré àngkàng mví, angnø (Ukchukdū vkyi vké)

shvngømré svng yànglvm tvrà shølshú Kristuò bøng taq kèní tvrà shøl lvm goò we íe. Kàngpè Yesu Kristu àng tiqgø íwa

shvngømré svng "àng shvngømré" wanø shønlvm vmíng vle.

Kàngpè Yesuí dvzvr piter svng zíò èshøt 
Mònggàn taq āna svng shòng we vsvngrì gvza vle. Wedø ínigø vsvngí lúnò we āna vyārì gvza vl nìgø mvngàng dvr, màdvdvm

shìwe tiq rvtø taq vmvngàme. Kàngpè Yesu Kristu í, dvzvr piter svng dvleò vyā nø Gvrayí zíò vyā íe. Kàngpè Yesuí dvzvr piter

svng dvleò we vyā nø Esaya mòngkà taq Yerusalem øplvm vyā angshvr lúnòpè Eliakim svng Gvrayí dvleò tvyø lvmang

nvng dvchá vbúnge. muqlàng móngdànò shv̀msòpuq nø, nà svng tvlēlvm íe. Rvgaq tø̀m taq nàí èdù:ngò we kapà ínìgø,

muqlàng taqlapmø gø vdóngshaq ív̄me. Rvgaq tø̀mø nàí shèlà:ngò we kapà ínìgø, muqlàng taqlapmø gø shvlángshaq

ív̄me,” a:lòe.(Mati 16:19) Ang nø Yerusalem wamà taq vlrì nvng Yuda rvp cèrì angpè wáshì longe.(Esaya 22:21) Wervt

nø Svrabín koqkvm pè svng nøngmaqí nø "koqkvm" (mvínìnø) (ဧကရယဇ်) wa màvlì shóngnøt ní "Vpè" shvnshér we

vpè wanø shønì we íe.

Lvngdøm shvlē bóy vmpà vmke Kàngpè Yesuí dvzvr piter dvpat shvdø:ngò nø vjúrøt dvbv:ngòe. Simoná, Simoná, èyà:ngò,

Sataní nø nà svng zōng dø raplv́m rvt vkv́ng røtshì bǿì. Iwe nà kv́mnøt mvtìnlv́m rvt Ngàí nà dvpvt júrøtnang bǿngà. Wervtnø̀

nà nàwv́ngshì ra mèpvng, nvnvm nvchvng rì svng shèdøng shèngà:ngò,” a:lòe.(Luka 22:31-32) Eliakim nø kadvngte ding we

ínìgø Yerusalem wamà nø àngshìvm mèpvng gvza màléwe nøng rvm taq bàngwa vkáng nø vmá:ngámì we svng gún dvtøp

lúnshìe. Wedø ínìgø shvngømré nø màmang rvt nønt dvshá rà màvl. Kàngpè Yesu Kristu í nø mvkøm mvzøp we vsvng

rìkaq à:ngò jórnònggùn kèní tvrà eshølshàe. Nøngmaq nvng vyvng roqshúrìò mvkøm mvzøp we írvt shvngbe dvpat

kàngpè angí ni tvrà eshølshà we vdùng taq cvnshì lúnlvm vjúrøt dvbvng dvzaq  shìlvm waì.