Chø̀myoré tiqcé mè kàshvbóng

Chø̀myoré tiqcé mè kàshvbóng
(Mati 25:1-13) September 1,2023

Nøngmaq Kv́m vsvngrì wáshì rà we dang svng kàngpè Yesuí dvtú wenø paqzí vdèrì dø zitnøt rvlnønt nvng
cúnshì lvm dvshvt we íe. Paqzí nø vchélvm mvl. Paqzí vlwe màvl we, shvla we nvng màshvla we, mvgàm we
nvng dvshà we, gálòng nvng sø'ngdø we vní pvn dundwé nø vlwe lvpat taq paqzí zitnøt kèní wa lvpatò svmigwìn
íe. Paqzí shànø zit we gø' svng wa vsvng shvla wanø shøn shvlae. Nøngmaq rvsángcè tiq gø' nø vdèò kámnøt
tvrà dang cúnshì lúnlvm zitnøt rvlnønt taq kèní kàngpè Yesu mèpvng cvnlvm dvcøp dvgø'shì nø vlràe.

Dvzvr Poloí shvdúm wenø Gvray Ang nøt nø yadø íe. Namaq nø shvgaqshaqrì èínøng dø mvmv́ng mvshèr we
svng nànatshìnøng nø, kagǿ gø̄ vdè góng svng shànshér dø èøpshìnøng. Vjàng laqyà taq gø vpǿlv́m dø
èwáshìnøng. Vrá Gvray mvsháò we wv́ngzàrì map dø namaq mvmaplv́m nvng, kagǿí gø angnv̄m angchvng
svng màlélv́m nàyáshinøng. Namaq svng nøngmaqí dvtú shvngøtshaq dø yadv́ng pv̀n dang kèní angnv̄m
angchvng svng vléò gǿ svng nø Kàngpèí tvle teq daqòe. Kadø íe wani, Gvrayí nøngmaq svng nø, mvmv́ng
mvshèr we wàlv́m rvtnø ègoì we mø̀í. Shànshér dø cúnshì lúnlv́m rvt mv̀ng ègo bǿshà we íe. Wervtnø̀ dvkv́mkà
yalòng svng màtoò gǿí nø vsvng kaq màtoò we mø̀í. Namaq svng Shànshér Pvlàcè èzínøng pè Gvray kaq
màtoò we íe. (Tesalonia 4: 3-8)

Kàngpè Yesu tuqráì we rvtø taq vdèí vtòlún niwe vdèò svmigwìn nvng gálòng íwe rvsángcèrìò jvng laqya zitnøt
ní, kàngpè svng vto lvm wàì. Yaqdø̀ng rvwèí, ‘Lvngàshv́r pè dì daq ìé! Ebúngnøng nø ang svng nàtov́mnøng,’
wa vkiq ráì. Wekvt chø̀myoré wemèla shvngbe búng nø, angmaq svmihǿng rì rvsūshìe. Dál mè laí nø zit mèlā
svng, ‘Namaq yøtì cvmaq nàwv́nāshà; pawá wani nøngmaq svmigwìnrì vmaqlv́m wáshìe,’ a:lòe. Zit mèlāí vtà:ngò
nø, ‘Mvdaq, namaq svng vwv́naì kvt nø nøngmaq dvpvt gø mvluq. Namaq nø, nā:mò rì yv́ng svng èdìnøng nø
èwv̄nshiv́mnøng,’ a:lòe. Yøtì wv̄nshi nvngsvng angmaq dìá:mì dvgvp lvngàshv́rpè tuq ráì. Tvlú dvgǿshìshaq mèlā
nø, ang nvng tiqdø zvmì shvzøng bóy svng gòngá:mì nø, bv́ngkà cøt bǿà. Chø̀myoré wá mè la nø mèpvng wa tuq
ráì nø, ‘Vkàngpèá, Vkàngpèá, nøngmaq svng bv́ngkà ètánāshà,’ wae. Inìgø A:ngí, ‘Ngàí namaq svng jø̀ngjǿng v̄l
atnìni, namaq svng ngàí mvsháì,’ a:lòe. Wervtnø̀ pán nàshatnøng. Kadø íe wani Vsvng Angcè pè dìlv́m angni ang
rvtø̀ nø namaqí mèshánøng. (Mati 25:6-13)

Kadø íe wanø Paqzí nvng zitnøt rvlnønt shvngbe nø gønshaq àngkàng Gvray taq kèní wa ínø kàngpè nvng tiqdø
vlwe írvt Gvray kaqsvng ni vrvm zitnøt rvlnønt gálòng jèjú svng cøpnønt taq kèní rvtø vrvm røtshì lvm wàì.