Ngā gvzà gøpké lú:nò we nvng coqcv́n gōò we

Ngā gvzà gøpké lú:nò we nvng coqcv́n gōò we

Vpø íwe pèmè vnvmchvngmaq, desháng vrá Luka 5;1-11 ciq vdòng svng dvdvm vjáng taqsórí tiqdòngce dvtit tvle nø nònggùn zøng mvyøngè.

Vpø íwe pèmè vnvmchvngmaq, Dèniò Gvray dvbùshang mongkà taq, Kvmnønt døngngvng dø cúnshì lúnlvm dvpvt nøngmaq shvngbe svng ègo íe. Nøngmaq Gvray kaq svng ká:mìe wàì nø shø'ni we taq mvdvm shvlece kèní wā Kv'm we shvzøngshì we rvzvngcerì mø-í lvm vchvk ngē. Jø'ngjø'ngni Gvray gvsangò angcø àngcèrì jønggvp ílún lvm dvzaqshì ra we íe. Jø'ngjø'ng Gvray gvsang kaq ká:mì, vtoshìàì we taqø mvmè rvnaq dø dvdvm vjáng nø cúnshì taqsórí vtōshì we vl ra íe. Gvray gvsang kaq svng nøngmaqò lvpat taqkèní téwa shvrà zílún ra íe. Gvray kaq àngde lvp kèní vlún dv'ngte rvtørì svng zí ra we íe. Vrá nø nøngmaqò lvpat taqø Gvray gvsang lvp kèní Dìngman we, shvlá vtv'ng íwe bvnlì rì svng àng-cé, àng-yá dvtvng dvnúng nø gø  wá rà we íe. 

Kashvbóng, Lvma ladvng nøngmaqò lvpat taqø lvngdøm vlømshì ra mà-vl we Nønt dvshalvm rvtørì vhø'mshì ra dvgvp gø Gvray gvsangò móngkà svng àngdeò Lvpat kèní nvmlat shvrà zí lún we vzàm vl ra we íe. Tiqlvp kèní vrá èyvng lúngò èshøn lúngò dvgvp Gvray gvsang mvdvmø Kvmnønt dv'nzøng taqsórí Tìme (tì rvnaq) kaq svng dílún we vzàm vl ra we íe. Jø'ngjø'ngni Gvray gvsang kaq ká:mì we rvzvngcerì gø'vrvm svng Gvray gvsangí nø vlømshì ra wàwe ìshøt talen lòng svng ezí íwe íe. Kvmnønt shaqcvmì we nøngmaq gø'vrvmò angcø àngcè rì kaq svng Gvray gvsangí nø yv'nglúnòe, shálúnòe. Gvray gvsangí pvn vrvm shvngbe svng Yv'nglúnò dø tiqdvchá Kvmnønt tvrà taq téwa ngvngdøng dø cúnshì lúnlvm, dvdvm vjáng lúnlvm rvt Gvray gvsangí nø nøngmaqò angcø àngcè rì kaq svng nònggùn kūnga síngràl nyan vzàm talen rì rvtø vrvm zíò we íē. 

Àngdeò síngràl nyan vzàm mvdvm taq Gvray gvsang nvng tiqdø vzø'm taqsórí wáshì lòng nø jór lún we taqø (%) yákaì núngku dìng we íe. Vsvngrìò lvpat wàwe nø Gvray gvsang taqkèní wā nvmlat pvngshì nø Gvray gvsang taqwā lvngdøm dvtømlvm mvdøng íe. Vsháng vrvm Gvray gvsang bøng taqkèní pvngshì nìnø nøngmaqò lvpat nø jór lún weí vnvp lvm vl we íē. Vrá nø, yaq vrv'm vjú røtshì nø èyøp nìnø nøngmaqò lvpat taqø Shiqshàn mongzøl dvbú lúnè. Nī vrvmò banchvk rì svng gø Gvray gvsang nvng èpø'nò nìnø nøngmaqò lvpat nø vnàng nø nøntshøm lvm vlē. Wervt vpø íwe vnvmchvngmaq, Gvray gvsang kaq svng rvtø vrvm vlømshì ra íe. Gvray lvpkeni wā vjang laqyashvlárì í wā cvndvgøm nø nònggùn lùshì ra íe. Nøngmaqí wàì we bvnlìrì ídv'ngte svng Gvray kaq tvle nø, Gvray vdòng taqwā dvzaq dvgvngshì nø cúnshì ra we íe. 

Vpø íwe pèmè vnvmchvngmaq, Vkvtdø Gvray gvsang dvkv'm Kàrì svng nøngmaqò lvpat taqkèní kvmnønt kèní cvndvgømì nìnø vzàng lap taqø jór lún we vlømshì ra ìshøt igvn rì, mvzvn mvzvn vtoshì lúnlvm vlē. Wervt Gvray gvsang kaq vlømshì nø kámì we taq Kvmnønt tvrà, mvshøl rì svng gø rvnaq dø dvdvm vjáng leqlāshàì taqsórí cvndvgøm nø nī vrvm cúnshì nø nònggùn lùshì laqlúni. Vpø íwe pèmè vnvmchvngmaq Dèniò Gvray dvbùshang mongkà taq Vkangpè Yesuí dèkv'mì dø tiqdvchá Vtì rvnaq kaq svng dílún we shvkse wáshì lún we,  rvtø vrvm Gvray móngkà kèní Cúnshì lún we rvzvngcerì mvng wáshì laqlúnì wvng dvshat nø vrashì taqsórí nònggùn zí mvyøngè. Shvngbe svng oqā.