Dvzvr Mati gōò we

Dvzvr Mati gōò we
 Weyv́ng kèní Yesu dìá:mì kvt, Mati tǿò we tiq pè kùyà tǿ rà yv́ng rūng dā we svng yv̀ng bǿà nø ang svng, “Ngà svng ècv̀n

rā,” a:lòe. Wekvt ang tv̀m búng nø, Yesu mèpvng cv̀n bǿà.   Wemèpvng, Ang nø Mati chø̀m taq v́mpà v́mlv́m námrung

dvgvp, kùyà gú:nò rì nvng mvrà vl vsvng* mvme gø, Yesu ó Ang coqcv́nrì nvng tiqdø v́mpà v́mlv́m námrunge.  Welòng

svng Farisirìí yv̀ng bǿà kvt angmaqí Yesu coqcv́nrì  svng, “Namaq Svra pè nø kùyà gú:nò rì, mvrà v̄l vsvngrì* nvng tiqdø kadø̄

í nø v̄m aqe ma?” a:lòe.  Yesuí tá bǿà kvt a:lò we nø, “Cìsvra nø zarì dvpvt wa zǿmdv̀nge, mvza vsvng nø zǿm mvdv̀ng.

 Kàru taq, ‘Ngà nø shvrúng núngpà mvdv̀mø mvréza nøt svng mv̀ng té shònge,’ wa kà ang lvjø̄m ècvnshiv́mnøng. Pàwálv́m

wani Ngà nø, døngman vsvng kaq go nvng dø̀ng dakngà we mø̀í, mvrà v̄lrì svng lè go nvng dø̀ng dakngà,” a:lòe. 

Vpø íwe pèmè vnvmchvngmaq,
Dèni Gvray gvsang Mongkà taqø nøngmaq shvngbe svng Dìngman we rvzvngcerì wáshì lúnlvm rvt Vkangpè Yesuí ègo íwe mongkà íe.

Gvray gvsangò gálòng jèjú rvtwā nøngmaq nø Gvray gvsangò angcø àngcèrì jønggvp ílúnìe. Dèniò Mongkà taq dvzvr Mati svng Gvray

gvsangí nø rvzvng we talen vtōshì lún bø'à pàdø nøngmaq shvngbeí gø Gvray gvsangí gō lòng, rvzvng lòng svng vtoshì lúnì rvt gvzà

ring nø vpø we rvzvngce lvpat kaq svng vtōshì lún bø'shà lòng íe. Ídv'ngte shvngbe nø Gvray gvsangò mvkok dvdi shóngnønt taqwā

v-li lòng íe. Nøngmaq taqø vl we màbóng we jèjúrì, ìshøt rì,zidvng rì svng gø Gvray gvsang taqkèní wā vtōshì lúnshì lòng íe. Nøngmaq

taqø àngkang tiqpè, Gvray tiqpè, Kvmnønt tiqlòng wā vl nø nøngmaq shvngbe gø angnvm angchvng rì wā í shàe. Màbóng we jèjú

ìshøt rì nø, màbóng we Shagóng àng dvgàngcerì pàdø ínø, Vgo íwe Hkristu taqwā tiqgóng tiqnønt tiqmvyung wáshàì lòng íe.

Wervt gø'vrvm kaq svng Gvrayí zi we talen jèjú ìshøt rì svng tasvng tale vpø shvring ké ra íe. Nøngmaq gø'vrvm taq vl we talen jèjú

ìshøt rì shvngbe nø àngdeò lvpat dvpvt wā mø-í, Vsvng shvngbe dvpvt vjú zílúnlvm rvt Gvrayí zi we talen gø íe. Tiqgø'nvng tiqgø'

rvwèng ke we banchvk rì mv-bø'nlvm rvt gø gvzàni vyáshì ra we íe. Wekvtwā nøngmaq nø Gvray gvsangò dìngman we rvzvngcerì

íshà pàdø dvshá zā mvkok dvdi shóngnønt talen lòng svng gø cvndvgøm lúnlvm vlē.

Vrá nø Mati 9:13 ciq taq Gvray gvsang nø shvrúng nóngpa lòng mvdvmø dvshá zā mvkok dvdi shóngnønt lòng svng téwa shvrúngè,

walòng svng yv'nglún shìe. Wervt talen wàwe jèjúrì shvngbe mvdvmø dvshá zā mvkok dvdi shóngnønt talen lòng vlē . Nøngmaqí

vtoshì lúnì we ìshøt jèjúrì svng zø'm nø, lvng nø dvshá zā bvnlìrì taq téwa dvnúng ra we íe. Jø'ngjø'ngni tùbùm dvbàng ra gø kaq

svng tùbùm dvbàng ra íe. Vrá nø, Tiqdvng vsvng àngmaqò dvja rì svng wā cā we, dvjaq we mø-í dø àngmaq vl yv'ng svng lá nø dì sórí

tùbùm dvbàng shì ra íe. Yadø íwe bvnlìrì yv'ngkèní nøngmaq nø Gvray gvsangò døngman we rvzvngcerì í shàe wàdang svng shvkse

dvtán taqsórí cúnshì laqlúnì. Gvray gvsang móngdàn dvpvt vlún dv'ngte အုတ်တစ်ချပ်၊သဲတစ်ပွင့် wā pàdø tvle shì dvzaqshì laqlúnì wvng

dvshat nø nònggùn zí mvyøngè. shvngbe svng oqā.