Zvmì shvzø̄ng bóy kàshvbóng

15- Oct -2023 "Àngwa Nár (28) lvban wà lvban"

Móngkàciqri

Esaya 25:6-10
Philip 4:12-14,19-20
Mati 22:1-14

Vpø íwe pèmè vnvmchvngmaq Yà lvban nø àngwa Nár (28) lvban wà lvban svng gòng bø'shà we íe.

Dèni rø v-du we Gvray móngkà nø Mati 22;1-14 vdòng taqkèní íe. Móngkà vzàng rø shìlvm wàì.

Mati 22;1-14
Zvmì shvzø̄ng bóy kàshvbóng

Yesu tv́ngshì nø angmaq svng vrá tiq kvt kàshvbóng shø̀:nò sórí yadø a:lòe.  “Muqlàng móngdàn nø, koqkv́m tiq pèí angcè pè dvpvt zvmì shvzøngbóy tiq lòng dvgø̀ò we nvng vbónge. Zvmì shvzøngbóy svng vgoshaq rì angmaq svng go nvng ang vshuqrì svng dvzv́r bǿà nìgø, vgoshaqrì nø dí mvtá.  Koqkv́m pèí vshuq dvgá tiq mvdò dvzá:rò nø, ‘Vgoshaq rì svng namaqí yadø èv̄lnøng; “Ngà bóy v́mpà nø dvgǿ vdv́ngá:mì. Ngà nungwàrì gø, dvtøqshaq nìnà rì gø vshvtshaq, pv̀n vrv̀m tvlú dvgǿshaq íá:mì. Zvmì shvzøngbóy svng èlúm ránøng,” èvl bǿnøng,’ a:lòe. Wedø ínìgø vgoshaq rìí tī mvlá:nò nø, vdèdè tvrà dìá:mì; tiq gǿ nø ang rvmá svng, dvgá tiq gǿ nø wulaq wāshì nvngsvng dìá:mì. 

 Wárìí nø vshuqrì svng ta:pmò nø shvraq màchaq dvkiò dá:ngí angmaq svng shvt bǿà.  Koqkv́m pè shv̀mná høp lú:ngì nø, ang cìldø̀ng rì dvzv́r bǿà weí, vsvng shvtshú werì svng shvmá:ngò nø, angmaq wamà gø wv́ra bǿà. d 8 Wekvtrá koqkv́m pèí vshuqrì svng a:lò we nø, ‘Zvmì shvzøngbóy nø dvgǿshaq íá:mì nìgø vgoshaqrì nø v́m màpǿá:mì.Wervtnø̀ namaq èdìv́mnøng nø nv̄mdø̄ng tvrà gúrtong rvgaq nàhǿm bǿnøng dv́ngte zvmì shvzøng bóy svng ègōvtnøng,’ a:lòe. 

 Wekvt vshuq werì dìá:mì nø nv̄mdø̄ng tvrà hwáng vrv̀m taq vhǿ:mò dv́ngte, svng mvgv́m gø, svng shvlá gø, kutwa dvkø̀ma:tnà kvt, zvmì shvzøngbóy dǿng taq dv̀n zø̀ngá:mì. Koqkv́m pè gòng ráì nø bóy mvnv́m rì svng yà:ngò nìnø, weyv́ng bóy bèlaq mvgwāshì we tiq gǿ svng yv̀ng bǿà. Koqkv́m pèí wepè svng, ‘Rv̀mnvng pèá, nà nø bóy bèlaq màgwashìshaq kadø wa yayv́ng ègòng ráì ma?’ a:lòe. Wepè nø pà vtv́nshìlv́m kà gø màdá.  Wekvt koqkv́m pèí ang dvzømcèrì svng a:lò nø, ‘Ang svng hí wur mèhūmnøng nø, vdàm lap cǿngcǿng dø̄ vdòng svng ègur bǿnøng; weyv́ng rvyù nø shà vjitshi nø ív̄me.’ Kadø íe wani vgoshaq rì nø luq nìgø rvcv́ngshaq rì nø mvluq,” a:lòe.

Vpø íwe pèmè vnvmchvngmaq Zvmi shvzøngkung wáshì dvgvp lúnò gø' ínø lúnò dø, vdá gø' ínø vdá dø dvtéò nø wàò we svng yv'nglún shìe. Dari dvgvp Yuda vsvng dvcìrì àngmaq wáshì we Dvla tiqpvn nø zvmi shvzøngkung svng dì ra dvgvp gwashìlvm góngwá belaq svng ngá nø bóy kaq dì lvm rvt goò we dang vl yangì.
Ká Shvbóng; Mongkà kèní Koqkvmpè nø Pø zaqshøp dvt dvt mø-í. Vsvng pvn dvci, góng shingmung, shingnaq, vdá mv-gvm dvrvt mà rvwèng shvngbe svng goò nø tiqdø vm-aq dvzvrè. Íwe àng lún mvyø we tiqpvn vlē. Àngí zi we zvmi shvzøngkung kaq gònglvm góngwabelaq svng gwa dezvr we íe. Zvmi shvzøngkung kaq gòng we góngwabelaqò àng lvjøm svng (Shingran) Dvtan Mongkà 19:8 yv'ng yv'nglún shìe. Shø'n mvyø we taq kwín we góngwabelaq nø Dìngman we Shànshér Vsvngrìò Dvla rì íe walòng svng yv'nglún shìe. Dvtut 9 ciq taq vyvngceò shvzøngkung vm-aq bóy kaq lúmlvm go vhø'mō we àngmaq nø ìshøt igvn vlē wà lòng svng yv'nglún shìe. Wervt nøngmaq nø Shànshér Vsvngrìò Dìngmanè, wàwe shvzøngkung bóyò góngwá belaq svng gwáshì nø vyvngceò shvzøngkung bóy yv'ng tiqdvciq gønshaq mongzøl lòng lúnlvm dvzaqshì laqlúnì wvng dvshat nø nònggùn zí mvyøngè. Shvngbeí Gvray mongzøl lòng vtoshì laqlúnì.Shvngbe svng oqā.