Vyv̀ng dv̀ngchè vwá:lò we

Vyv̀ng dv̀ngchè vwá:lò we
 “Vsvng angcè pè nø Angò brìmbrìm shór dvgùng vdòng taq muqlàng dvzv́rrì shvngbe nvng di daq kvt Ang nø pòngbàng ngø̀r we Angò koqkv́m rúngtv̀ng taq rung longe. Wekvt vsvng dvcì vrv̀m shvngbe nø Ang mv́rdv̀ng svng dvkø̀ma:tnòe. Vyv̀ng roqshúí vyv̀ngrì nvng dv̀ngchèrì rvwì:ngò padø, A:ngí angmaq svng tapv̀n rvwìng lú:ngòe.  Wekvt A:ngí vyv̀ngrì svng nø Ang vbàng pā, dv̀ngchèrì svng nø Ang vgwé pa shvrip lú:ngòe.  Wekvt Koqkv́m pèí, Ang vbàng pā vl rì svng v̄l lú:ngò we nø, ‘Ngà Vpèí zi we ìshøt ìgv̀n èlúnnøng rì namaq nø, rvgaq angké shvzøng dv́ng yà:ngà ni kèní namaq dvpvt dvgǿshaq í we móngdàn zaqshøp dèpvtshi ránøng.  Kadø íe wani Ngà svríshø̀ng dvgvp, namaqí ngà svng shèv́m yv̀ngshà. Ngà bál dvgvp, namaqí Ngà svng shèaq yv̀ngshà.

Ngà zaqlè wv́ngshø̀ng dvgvp, namaqí nàtō yv̀ngshà.  Gwálv́m màdáng dvgvp, namaqí dègwā yv̀ngshà. Ngà zāng dvgvp, namaqí nàcún yv̀ngshà. Ngà tūng rūng dvgvp, namaqí ètìn yv̀ngshà,’ vl lú:ngòe. Wekvt døngman rìí Ang svng vtà:ngò nø, ‘Vkàngpèá, Nà svrí èshì we yà:ngì nø kadvgvp shvv́m yv̀ngshà ma? Nà tì èbál ke kadvgvp shvaq yv̀ngshà ma?  Nà zaqlè èwáshì ke kadvgvp vtō yv̀ngshà ma? Gwálv́m mènàdá ke, kadvgvp dvgwā yv̀ngshà ma?  Vrá Nà èzā we, mø̀íni tūng taq èróng we svng yà:ngì nø, kadvgvp Nà svng tìn yv̀ngshà ma?’ wa longe.  Wekvt Koqkv́m pèí vtà:ngò nø, Ngàí namaq svng v̄la:tnìni, ‘Ngà vnvm vchv̄ng yarì dvhø̀ taq, cv́m vtv̄ng we tiq gǿ svng namaqí èwáā yv̀ngshà dv́ngte nø, namaqí Ngà svng èwáā yv̀ngshà we ni íe,’ v̄l lú:ngòe.
 

Wedá:ngí, Ang vgwé pa vl rì svng, ‘Mvtv́nshaq rì namaqé, Ngà yv́ng kèní èrv́lshìnøng nø, cáng pè nvng ang dvzv́rrì dvpvt dvgø̀ yà:ngà we dvciq lvpat svmi móng svng èlōnøng.  Kadø íe wani Ngà svríshø̀ng dvgvp, namaqí mèshèv́m yv̀ngshà; Ngà bál dvgvp, namaqí mèshèaq yv̀ngshà.  Ngà zaqlè ǿngà dvgvp, namaqí mènàto yv̀ngshà; góngsér ǿngà ke, mèdègwā yv̀ngshà; zāng dvgvp gø, tūng taq rūng dvgvp gø, namaqí mètìn yv̀ngshà,’ vl lú:ngòe Wekvt angmaqí vtà:ngò nø, ‘Vkàngpèá, Nà svrí èshì we, mø̀íni èbál we, mø̀íni zaqlè èí we, mø̀íni góngsér èí we, mø̀íni èzā we, mø̀íni tūng taq èróng we svng kadvgvp yà:ngì nø, Nà svng màdvbv̄ng yà:ngì ma?’ wa longe.  Wekvt A:ngí angmaq svng vtà:ngò nø, ‘Ngàí namaq svng v̄la:tnìni, yarì dvhø̀ taq cv́m vtv̄ng we tiq gǿ svng namaqí mèwáā yv̀ngnø̀ng lòng nø, Ngà svng mèwáā yv̀ngshà we ni íe,’ v̄l lú:ngòe. 46 Weyv́ng kèní yamvdò nø, dvciq lvpat mvhøtlv́m yv́ng svng lov̄me; døngman rì mv̀ng nø dvciq lvpat gø̀nshaq cúnshìlv́m yv́ng svng lov̄me.”