Kàngpè Yesuí Zìwe Gø̀nshaq Àngshvr

Kàngpè Yesuí Zìwe Gø̀nshaq Àngshvr
Kagǿ gø angshv́r tiq kvt màgv́lshaq nø, Gvray móngdàn yv́ng mvlúnshì wanø kàngpè Yesuí shøne. Gvray móngdàn tuq mvyø' we vsvng gø vrvm dvpvt íe. Farisi vsvng, Nikodimu tǿò we Yuda vsvng rì øpshú tiq pè svng shvngøtnòe. We kvt Nikodimuí rá Ang svng, “Vsvng tiq gǿ nø cvrǿngv̄m ke kadøwa vrá gv́l shvla ma? Angmè puqwá svng vrá tiq kvt gòng nø̀ gv́l nø da mvlúnshì ni!” a:lòe.Kàngpè Yesuí rá vtà:ngò wenø, “Tì  nvng Pvlàcèí màgv́lshaq vsvng kagǿ í nìgø, Gvray móngdàn svng góng mvlúnshì vlòe. 

Gvrayí nø nøngmaqò nvmlat angpè, angmè íwe Adam nvng Ewa svng má:nòe. Gvrayí Ang shø̀ngmang í dv̀ngwa vsvng má:nòe. Gvrayí nøngmaq svng shòng we shóngnøt nø ka dvgvp gø bélvm mví. Adam nvng Ewa ò, ang dvcì dvgøng rìsvng a:ngò angcø' angcèrì sònòe. Yalòng nø a:ngò gønshaq svng túnā we íe. Wervt a:ngò gønshaq, Shànshér Pvlàcè gønshaq svng Adam nvng Ewa nísvng zí bø'à.Nøngmaq gø' vrvm gø angpè, angmè vdá we angcø' angcèrì íshàe. Shøn mvyø' wenø angmè taqkèní gønshaq lú:nìe. Àngmè tiqgø' taqkèní dvgá vsvngrì svng Vmè shøn mvlúnshì. Wedø ni Adam nvng Ewa nínø nøngmaq svng gønshaq zíshà we Angpè àngmèò angcø' angcèrì íshà wedø tiq dvchá angmaq taqkèní zìwe gønshaq nø Gvray taqkèní dìwe ínø Gvrayò gønshaq ni íe.

Angcè pè Yesu Kristu bø̀ng svng nøngmaq ká:mì nø tiq gǿ nø tiq gǿ vshòngké rà we yalòng nø, A:ngí dèkv́m daqshà we dvkv́mkà íe.  Gvray dvkv́mkàrì svng cv́n dø̄ngrì nø, Gvray vdòng taq v̄l nø, Gvray gø angmaq vdòng taq v̄le. Gvray nøngmaq vdòng taq v̄l we nø, A:ngí èzí daqshà we Shànshér Pvlàcè taqkèní íe.Adam nvng Ewa ínø Gvrayí shvzøng ò, we dang svng màvtoò wewa mvtaq Gvray dvkámkàrì svng mvcvnò nø Gvrayò gømpaq svng dvsóm bø'à we íe. Vsvng nø Gvray jèjú svng vtoshì mvsháì, wedø ínigø Gvrayí nøngmaq svng shòng we shóngnøt nø ka dvgvp gø mvbe.  Ang kaq kv́m vsvng kagǿ ínìgø màmvng nø dvciq lvpat gø̀nshaq lúnlv́m dvpvt, Angcè Lòngzàpè zí daqì høqshaq ni Gvray nø rvgaq tø̀m vsvng kaq shóngshie. (Yohan 3:16) Wervt Ngà mv̀ng nø, angmaq kaq gø̀nshaq lún dvzv́rlv́m dvpvt nvng dvnglún lún dvzv́rlv́m dvpvt dø̀ng dakngà (Yohan 10:10) taq wae. 

Ngà taq mècaqshìnø̀ng nìnø namaqí pà gø wá mèlúnnøng.(Yh 15:5) Ngà nø bìmrøng ǿngàe, namaq nø dvgv̀ngrì èínønge. Ngà vdòng taq v̄l nø Ngà gø ang vdòng taq vl we wegǿ mv̀ng nø angshí gvzà zíe wae. Namaq nø angshí gvzà èzínøng we yalòng kèní Ngà Vpè ngø̀r dvgùng shvring lú:ngòe. Welòng kèní namaq nø Ngà coqcv́n jǿng èínøng we dvtánshì longe.Shøngtøng rìnø tiqnøng taq tiqpoq wa zíe. Rvsángcèrì nø ni vrvm mvtaq rvtø vrvm zí ràe. Rvgaq vdùng kàngpè Yesu vlwe rvtø  minutes setgvn vrvm ang lvjøm màvl, màpø wanø shø'n mvlúnshì. Kàngpè ò, lvpat nø rvtø vrvm taq angshí zíe. Ngà vdòng taq caqshì nìgø angshí mvzí we dvgv̀ng í dv́ngte svng A:ngí tu:tnò nø, angshí zí we dvgv̀ng í dv́ngte nø, angshí té zílv́m rvt A:ngí dvshè lvm íe wàe. (Yh 15:2)

Angshí zí we ang dvkvng -- Dvzvr Polo dang svng yv:ngì 

Dvzvr Polo nø tì lup kámshì we taqkèní lúnshì we gønpaqò ang dvpø' svng sháòe. Akvt ang cúnshì lòng nø ngà mvǿngà, ngà vdòng taq Kristu cúnshì we lè íe. Shagóng taq akvt cúnshø̀ng lòng nø, ngà svng èshòng nø ngà dvpvt ang vdè góng zíshi bǿì we Gvray angcè pè kaq kv́m yv́ng kèní cúnshø̀ng we íe. ( Galatia 2:20)
Polo nø angrøng íwe Kàngpè Yesu taqkèní ang dvgvng ò, angshírì svng a:ngò lvpat taq vjú vldø dvzøm bø'à. Angshi bø'ì we mèpvng taq ínigø deni høq ang mòngkà rì taqkèní àngnø angshí zí dvzvr lún bø'à. Kàngpè Yesuí shøn we kà svng dvgøm bø'à. 

 Ngà bø̀ng rvtnø, dvshà we kadv́ng pv̀n a:ngí vhǿm rà we nø Ngàí ang svng dvtanlv́m íe,” a:lòe.(Dvzvr 9:16) Kàngpè Yesu nø Polo shvnvng rvtø vrvm taq vlnø angtaq ràwe nvnggùn kù:ngà zí òe. Nøngmaq gø' vrvm shvnvng taq gø Kàngpè Yesu rvtø vrvm vlnø ràwe jèjú rìsvng evtø vrvm dvbv:ngà we svng kámnøt í,dvdvm lvm waì.