Màá nvdǿ cáng lù:ngò we

Màá nvdǿ cáng lù:ngò we
Coqcv́nrì vl yv́ng angmaq tuq daqì dvgvp, angmaq gùrhøm vsvng loksok kø̀m nø, dvrá svrarì tiqmaq gø coqcv́nrì nvng vzø̀ng da we angmaqí yv̀ng bǿà. Vsvng loksok shvngbeí Yesu svng yv̀ng bǿà kvt, gvzà ádà sórí Ang yv́ng svng kvlv̀ng ráì nø shaqshaq wa vtoòe.  Wekvt A:ngí we rì svng rø:tnò nø, “Angmaq nvng kapà rvt nàzø̀ngnønge ma?” a:lòe.  Wekvt vsvng loksok dvhø̀ kèní tiq gǿí Ang svng, “Vkàng pèá, ngàcèpè taq màá cáng dvchøp rvtnø Nà yv́ng svng shø̄lvtnà. Cá:ngí ang svng kayv́ngø tímkéa:tnò nìnø weyv́ng cē vtūngvme. Wekvt dvpup wa í sórí shà vjitshi nø góng gø daq vtù longe. Nà coqcv́nrì svng cáng lúngalv́m rø:tnò we angmaqí lúng mvdá:ngò,” a:lòe.  Yesuí angmaq svng vtà:ngò nø, “Kv́mnøt mèv̀lnøng we mvril cèrìé, Ngà nø kadvgvp høq namaq nvng v̀llv́m í ma? Kadvgvp høq namaq svng tø̄naì ni ma? Ang svng Ngà yv́ng èshølvtnøng,” a:lòe.  Angmaqí cv̀mré pè nø Yesu yv́ng shøla:tnà kvt, Yesu svng cá:ngí yv̀ng bǿà chàng cv̀mré pè svng wela:ngíni tímkéò nø vba tø̀m svng kǿng vkup nø ang nònggøp kèní gø dvpup wa vshū sórí vrūlshìe.  Wekvt Yesuí angpè svng, “Ang yadø í we nø kadv́ngte vlé ráì ma?” wa rø:tnòe. Angpèí, “Cv̀mré dvgvp kèní íe. 

Ang svng dvshílv́m rvt cá:ngí nø svmi taq gø, tì taq gø mvme kvt dvgupshi dvzá:ròe. Nàí kadø wá èngu:tnò nìnø ngànípè svng dvshá èzashà nø dèbvngsha,” a:lòe. Wekvt Yesuí ang svng, “Pàwálv́m èngu:tnò nìnø, èwae? Kv́mnøt vl gǿ dvpvt nø pàgø wá ngutshìe,” a:lòe.  Wela:ngí ni cv̀mré pè angpè nø vkiq sórí, “Ngà kv́me; ngà kv́mnøt mvbá yv́ng mv̀ng dèbvngà,” a:lòe. Vsvng loksokrì kø̀m ráì we svng Yesuí yv̀ng bǿà kvt, A:ngí mvmv́ng cáng kaq nga:nò nø, “Màá, nà mvtá cáng nà, Ngàí dvkv́mvtnøng, ang yv́ng kèní èlúshi. Akvt kèní kukaq ang vdòng svng rá zv́ngshì mvdaq,” a:lòe.  Cáng nø ser wa vkiq nø ang svng tímkéò dá:ngí lúshiá:mì. Cv̀mré pè nø vshí dø vhúlá:mì rvt tiqmaq nø, “Ang nø shìá:mì,” wae. Iwe Yesuí ang wur zø̀:mò nø søt kū:ngò nìnø, ang búng lú:ngì. 28 Chø̀m vdòng Yesu gòngá:mì ke Ang coqcv́nrìí Ang svng mvyø̀:ní rø:tnò nø, “Cáng welòng nøngmaqí kadø í rvt lúng mvdá:ngì ma?” wa rø:tnòe.  Yesuí angmaq svng, “Yadø í pv̀n cáng nø v́mpà màv́m vnatshi nø vjúrø:tnò kvt wa mø̀í nìnø mvlúshivm,” a:lòe.