Dvrá svrarì ngā:nò we

Gvray Mongka

Luka 11:47-54

Namaq nø mèhøt lóngnønge. Kadø íe wani nvkop nvkàng maqí shvt yà:ngà we kàdvtutshúri dvgv̀m rì nø namaqí ni dècøpnønge. Namaq nø nvkop nvkàng maqí shvt yà:ngà we kàdvtutshúriò dvgv̀m svng dècøpnøng we taqkèní, angmaqí wà yà:ngà lòng svng namaq gø nàránøng nø dèbáshìnø̀ng we í dv̀ng wae.  Yadø í rvtnø Gvray zitnø:tní shø̀n yà:ngà we nø, ‘Kàdvtutshú gø, dvzv́r gø, Ngàí angmaq yv́ng svng dvzv́r dakngò nø, angmaqí sha:tnò we gø tiqmaq v̄l longe; dvshá dvki vrèò we gø tiqmaq vl longe,’ wae. Wervtnø̀ rvgaq angké shvzøng yà:ngà yv́ng kèní yakaq, Abel shvwi shvyǿ yà:ngà ni kèní, noqngø̀m Tø̀ngnø nvng shvrúngrà vní lòng dvhø̀ø̄ shvmv́ng yà:ngà pè Zakaria ang shvwi shvyǿ yà:ngà ni høq, kàdvtutshúri angmaq shvwi shvyǿ yà:ngà we mv̀ngrø̀ nø yamvril cèrì svng shvri daqòe. Ngàí v̄la:tnìni, jø̀ngjǿng mvrà yarì shvngbe nø yamvril cèrì kaqsvng ni tuq daqe.  Dvrá svrarì namaq nø mèhøt lóngnønge. Kadø íe wani shánøt bv̄nya shv̀msòpuq lòng nø namaqí èlv́ngnøng nø, namaq vdè nø mègòngnø̀ng ke, gònglv́m wa rì svng nø rá namaqí nàgámnønge,” a:lòe. 53 Weyv́ng kèní Yesu búngá:mì dvgvp, dvrá svra mvdò nvng Farisirì nø Ang svng vtvngshaq shvngōshì nø, mvme dang mvme pv̀n Ang svng rø:tnò sórí, Ang kà kèní Ang svng shvwá lúnlv́m dvzaqshìe.