Nikodimu Yesu yvng di ráì we

Nikodimu Yesu yvng di ráì we

1 Farisi vsvng, Nikodimu tǿò we Yuda vsvng rì øpshú tiq pè v̄le. a 2 Wepè nø yaqdø̀:ngí Yesu yv́ng dì ráì nø, “Rabbiá, Nà nø Gvray yv́ng kèní èdì daqì we shvngøtshú èí we svng sháìe. Kadø íe wani, Nàí èwàò we shálv́m mvshv́lpvrá yarì nø Gvray ang nvng vl we vsa:ngí wa mø̀í ni kagǿí gø wá mvngu:tnò,” a:lòe. b 3 Yesuí vtà:ngò nø, “Ngàí kàdøng vlvtnøng, kagǿ gø angshv́r tiq kvt màgv́lshaq nø, Gvray móngdàn yv́ng mvlúnshì,” a:lòe. c 4 Nikodimuí rá Ang svng, “Vsvng tiq gǿ nø cvrǿngv̄m ke kadøwa vrá gv́l shvla ma? Angmè puqwá svng vrá tiq kvt gòng nø̀ gv́l nø da mvlúnshì ni!” a:lòe. 5 Yesuí vtà:ngò nø, “Ngàí kàdøng v̄lvtnøng, tì nvng Pvlàcèí màgv́lshaq vsvng kagǿ í nìgø, Gvray móngdàn svng góng mvlúnshì. d 6 Shagú:ngí gà:lò we nø shagóng íe. Pvlàcèí gà:lò we nø pvlàcè íe. e 7 Ngàí nà svng ‘Nà nø angshv́r gv́lshì ràe,’ wvng nø vl bǿngà rvtnø mènàtiqni. 8 Nv̀mbø̀ng nø ang wá mvyǿ yv́ng svng wa nø, angshaq nàí ètáò we ínìgø, kayv́ng kèní wà ráì we nvng kayv́ng svng wavm we nø mèsháò. Pvlàcèí vgv́lshaq vsvng gǿ vrv̀m gø welòng dø íe,” a:lòe.