Vmyø̀ wø̄n kàshvbóng

Mati 13:1-23

Weni taq Yesu nø chø̀m kèní búngá:mì nø, tìnúng shvnvngø runge. a 2 Vsvng loksok mvdò nø Ang yv́ng svng dvkǿmshì ráì rvtnø, Ang nø kùngshí tiq lòng taq zv́ngshì nø rúngá:mì. Vsvng loksok mvdò shvngbe nø vdàm pa tø̀mø ripme. 3 Wekvt A:ngí angmaq svng kàshvbóng kèní mvme dāng shø̀:nò we nø, “Vmyø̀ wø̄n vsvng nø, vmyø̀ wø̄n nvng dìá:mì. 4 A:ngí wø̄:nò ke, tiqmaq nø tvrà shvmōr taq vjáá:mì nø, vcārì dì ráì weí tǿvm bǿà. 5 Dvgá tiqmaq nø, vbā gvzà màvl we lóngheq taq vjáá:mì nø tiqlvng yó lú:ngì we, vbā gvzà mvtvt rvtnø, 6 nv̀m sv̄r ráì ke, gángkéò nø, rø̄ màvl rvt shúngá:mì. 7 Vrá tiqmaq nø, bv̀nghǿ vdòng svng vjáá:mì nø, bv̀nghǿrì té lú:ngì weí lúmké bǿà. 8 Iwe tiqmaq nø, vbā shvlá taq vjáá:mì nø, angshí shí lú:ngì kvt, tiqyá dvtv̀ng, vchuqcé dvtv̀ng, vshø̀mcé dvtv̀ng høq shóng lú:ngì. 9 Tálv́m vnà vdá vsvng wegǿí nø laq táò,” a:lòe.

Pàwá kàshvbóng lá:ngò we

10 Wekvt coqcv́nrì di ráì nø Ang svng, “Pàwálv́m angmaq svng Nàí kàshvbóng kèní èshø̀:nò ma?” a:lòe. 11 Ang vtv́nshì nø angmaq svng, “Muqlàng móngdàn vmáshaq kàrì svng cínglv́m vmíng nø namaq svng vzíshaq í we, angmaq kaq nø màzíshaq íe. 12 Kadø íe wani vdá gǿ svng nø rv̄mā daqò nø gvzà luqā lú:ngòe. Màdá gǿ yv́ng kèní nø, ang vdá dv́ngte gø vtv̀ngv́m bǿòe. b 13 Pawá wani angmaqí nø dvjaqò nìgø mvyà:ngò; táò nìgø mvtáò, rál gø mvrà:lò. Wervtnø̀ Ngàí angmaq svng kàshvbóng kèní shø̀nò we íe. c 14 Yalòng nø Esaya kàdvtut kà taq, ‘Namaqí tá nø ètánøng we kadø gø mècíng lóngnøng. Namaqí yv́ng nø èyv̀ngnø̀ng we kadø gø mèmèshv́l lóngnøng. d 15 Kadø íe wani bashà yadvcì, angmaq nøt nø dér bǿà. Vnà gø nvdǿ íá:mì. Nē gø vmàná:mì. Angmaq nēí yv̀ng lú:ngò nø, vnàí gø tá lú:ngò nø, nø:tní cíng rà:lò nø vwv́ngshì ra nìnø Ngàí angmaq svng dvbānāngònøng we íe,’ wa nø shø̀n yà:ngà kà vhø̄m we íe. 16 Wedø ínìgø namaqí nø nēí èyv̀ngnø̀ng nø vnàí gø ètá nǿng rvtnø ìshøt ìgv̀n èlúnnønge. e 17 Ngàí namaq svng v̄la:tnìni, kàdvtutshúri nvng døngman vsvng mvmēí nø, namaqí èyv̀ngnø̀ng rì svng yv́ng mvyǿ nìgø yv́ng mvlún yà:ngò; namaqí ètánøng rì svng tá mvyǿ nìgø tá mvlún yà:ngò.”

Kàshvbóng ang lvjøm

18 “Vmyø̀ wø̄n vsvng kàshvbóng yalòng ang lvjøm svng ètá dánøng. 19 Muqlàng móngdàn mòngkà táò dá:ngí, mvcíng mvrà:lò we tiq gǿgǿ v̄l nìnø, mvgv̄m pè wepè dī rā weí, ang nøt taq vwø̄nshaq lòng svng tø̄lv́m bǿòe. Tvrà shvmōr yv́ng wø̄n bǿà we vmyø̀ lú:nò gǿ nø yagǿ íe. 20 Lóngheq rvgaq taq wø̄n bǿà we vmyø̀ lòng nø, mòngkà táò dá:ngí, dvbùnø:tní chàng vtoò vsvng wegǿ íe. 21 Iwe, ang nøt vdòng taq angrø̄ mvcaqshì rvtnø, tiq dvgvp wā zá:nòe. Gvray mòngkà rvtnø dvshà mvhøtlv́m, mø̀íni dvkī vrè we būng lōng kvt ang nø wela:ngí ni vtv̄lv̄me. 22 Bv̀nghǿ póng taq wø̄n bǿà we vmyø̀ lòng nø mòngkà táò dá:ngí, rvgaq yabànò gónggilv́m nvng mvgàmlv́m lù:ngí yùm rā weí lúmke bǿò nø, angshí mvshí long we vsvng wegǿ íe. f 23 Vbā shvlá taq wø̄n bǿà we vmyø̀ lú:nò gǿ mv̀ng nø, mòngkà táò dá:ngí cíng rà:lò vsvng wegǿ íe. Ang nø jø̀ngjǿng angshí shí long kvt, tiqmaq nø tiqyá dvtv̀ng, tiqmaq nø vchuqcé dvtv̀ng, tiqmaq nø vshø̀mcé dvtv̀ng shóng longe,” a:lòe.