Chø̀mpè chø̀mmè vkàng mvdaq we

Mati 19:3-12

Farisirì nø Ang svng vløtlv́m di lú:ngì nø a:lò we nø, “Mvtú tiq pv̀npv̀n rvtnø, vdè chø̀mmè svng gū:rò lòng nø, dvrá má, màdvrá má?” wa rø:tnòe. c 4 Yesuí werì svng vtà:ngò nø, “Nv̀mlat nv̀mpv́ng taq vsvng kaq Mv́n pè Gvrayí nø, svmaré lvngàré shvgøp vzø̀m dø mv́n yà:ngà. d 5 ‘Yadø í rvtnø lvngàré nø angpè angmè yv́ng kèní rv́lshì dv̀ng, ang chø̀mmè nvng vzø̀mvm nø, angní nø tiqshing tiq góng wa ív̄me,’ wa kà svng mèrø dv́rnøng ma? e 6 Angní nø wekvt kèní kukaq vní gǿ nø mø̀í, tiqshing tiq góng wā íe. Wervtnø̀ Gvrayí dvhǿmshaq lòng svng vsvng kagǿí gø laq màdvka:ngò,” a:lòe. f 7 Wekvt angmaqí Ang svng, “Wedø íni, ‘Ang chø̀mmè gūr we kàru zíò dá:ngí nø, ang chø̀mmè svng gurdv̀ng íe,’ wa nø Moshií pàwálv́m dvkv́m yà:ngà ma?” a:lòe. g 8 Yesuí angmaq svng, “Namaq nøt èzaqnøng rvtnø, nvchø̀mmè maq svng gurlv́m Moshi gø vrá yà:ngì we íe. Iwe nv̀mlat nv̀mpv́ng kèní nø wedø mø̀í. 9 Ngàí namaq svng v̄la:tnìni, dvchap mvrà wàò rvt wa mø̀í nìnø, ang chø̀mmè svng gu:rò nø dvgá tiq mè nvng shvzøngshìvm we wegǿí nø dvchap we mvrà wàò we íe. (Vrá, gūr bǿà mè nvng shvzøngshì gǿ ang gø wedøni dvchap we mvrà wàò we íe,”)* a:lòe. h 10 Wervt coqcv́nrìí Ang svng, “Chø̀mpè nvng chø̀mmè dvrá nø to èshø̀:nò døni í kvt kèní nø, svma màlushi èv̄l lòng té shvlae,” a:lòe. 11 A:ngí angmaq svng, “Shvngøt kà yalòng svng nø vsvng shvngbeí vtō mvngu:tnò; vtōlv́m vzíshaq rìí wa vtō lú:nòe. i 12 Kadø íe wani, angmèí gv̀l daqò yv́ng kèní sv̀ngshv̄n í we tiqmaq v̄le. Vsa:ngí shā:nò we gø tiqmaq v̄le. Vrá, Gvray móngdàn dvpvt rvtnø dø̀ngku mvdēshì we gø tiqmaq v̄le. Yalòng svng vtō ngu:tnò gǿ nø laq vtōshì,” a:lòe.