Vl dv́ngte shvngbe nø vhúng wā í we

SHVNGØTSHÚ 1:2-11

“Vhúng mvdv̀m vhúng, Vhúng í mvdv̀mø vhúng, shvngbe nø vhúng wa íe,” wa nø shvngøtshú pè shø̀ne.a 3 Muqlàng lv̀ngpvng nà:mí sa:rò we rvgaq í dv́ngte taq wàò we bv̀nlìrì taqkèní, sv́ngzàcèí pa vjú lúnshìe ma? b 4 Tiq mvrīl vlēvm nø vrá tiq mvril tuq rā nìgø, rvgaq mv̀ng nø dvciqciq v́ldø̄ngdv̀ng wāe. c 5 Nv̀m gø svr rā nø, vrá vlēvme.

Tō ang sv̄rrà svng shvnv́ngshì nø vwv́ngv̄me. d 6 Nv̀mbø̀ng nø tvnuni kaq svng wav̄m nø, tvnugo kaq rá vtv́ng longe. Zv̀ndvtuttut tvríshì nø, ang tvrà hwánghwáng gur vwv́ng rae. e 7 Rvmèrì shvngbe nø nvmukdvra svng vyø̄ we ínìgø, nvmukdvra nø mvzø̀ng long. Rvmèrì nø angmaq vyø̄ yv́ngsvng tōdø̄ni vtv́ng nø, vrá vyø̄ daqe.

8 Pv̀n vrv̀m í dv́ngte taq nø vsa:ngí shǿn mvtǿmshì høq mvjòrlv́m wa v̄le. Vne gø yà:ngò lù:ngí nøt shø̀mlv́m màvl. Vnà gø táò lù:ngí tá vzè we màvl. f 9 Angwà í pv̀n nø tv́n gø̄ í rāe. Angwà wàò pv̀n nø tv́n gø wà lú:ngòe. Wervt nà:mí sa:rò we rvgaq í dv́ngte taq angshv́r í we pàgø màvl. g 10 “Eyv̀ngnøng, yalòng nø angshv́r tiq pv̀n íe,” wa shø̀nlv́m tiq pv̀npv̀n v̄le ma? Welòng gø nøngmaq vzv̀ng kāngshv́ng rvmàng kèní àv́lshaq í yà:ngì.

11 Darìò bànrì svng nø kagǿí gø dvdv̄m rǿnlvm màvl. Mèpvng bø̀n rarì svng gø màdvdvm lú:ngò. Akvt tuqrā we mvril svng gø mèpvng mvril rìí dvdv̄m mvrǿn dá:rò.