Angdè góng angdè kámshì nøt kèní vzàng kaq dìlvm

Angdè góng angdè kámshì nøt kèní vzàng kaq dìlvm

Angdè góng angdè kámshì we nøt mvsøn kùngànø vháng mèyø we vsvngrìò gø vrvm taq vl rà we svng yánglún shìe. Ínì nø angdè góng angdè kám nøt wanø kapà íemá? Angdè tiqgóng kámshì walòng svng lúnlvm dvpat yùl yùlcè wálún shì we nø mø:í long ínì gø yalòng lúnlvm dvpat gvzà rvzaqe wanø gø làngrérìò lvpat taq laq mà dvdam shàì. Vránø yalòng svng tiqdá vsvng taqkèní wáā lúnwe pvn gø mø:í. Làngrérì mvlúngka taq angdè góng angdè kámshì we nø yúme svng yánglún shìe. Paqzí cvnshì we dangrì taq íra nìgø angdèí mvsíng mvsháì we rìkaq svng røtshì nø dvtøp shìlvm dangrì taq shvraqshì we, røt mvkam shì weí nàdøn kéì we svng yánglún shìe. Yadø nøt mvsøn rìnø angdèò bvnlì wàngrì taq høqshaq vbá sháshì longwe ínø svre nøt kaq svng vpo dvzvŕ we íe. Yadang taqkèní angdèí mvsín mvrøn shìwe dangrì taq tiqdá vsvng rìnvng dvmàn we, dvtøp we wàwe laqyà rì gø vmáng sháòe. Wekat angdèò bvnlì dang, paqzí dang dø íwe angpvn pvn taq vnøn sháò we íe. Wedø írat nø angdè góng angdè kámshì nøt vl lvm dvpat nø wá vdu we bvnlì dangrì taq svre nøt svng gurnø røt kam, shøn kamshì we nøt vl ràwe svng làngrérì kaq shvdøm mvyø we íe. Wewa mvtaq yani la bat taq nø lún kángrì gvzà bángka poq v:mì we bat íráì we dø tiq dvchá vto shì kamshì wa vchyak we svng síng shá ràwe íe. Téwa dèni batò paqzí dang taq zìdang vháng we paqzírì cvnshì lúnlvm dvpat scholarship wawe paqzí dang tubùm dvbangā we mvdòrì gvzà vlwe ínì gø angdè góng kamshì we nøt mv vlì we íninø vto shì mvlúnì. Nøngmaq taq mvlúng bøn sháì we nø tiq gø gø taqkèní ni dvdutwe nvngòn ziwe mv vl ni nø pàdang taq gø wá mvkam shàì we nøt vlì we svng yánglún shìe.

Vránø bvnlì sokshì la shàì we taq gø angdè nvng singwe dang svng lèga vru nø vtánshì ràwe svng shvngbeí síngsháì we dø tiqdvchá we lèga taq angdèí kapànø wálúnòe, kapà paqzínø sháshaq íe, kapà dangrì taq nøt èlúme warì svng gø shvng shvng wa vrushì lún ràlonge. We katwa angdè nvng vdu vbóng we bvnlì taq shvrà zinø dvzaq shìlún lvm ílonge. Wedø mø:í nø mvkamshì we, shvraqshì we nøt kèní shvng shvng wa shøn mèlún shìwe ínìnø tiqdá vsvng taqkèní vpø shvring we dang taq yúmshì sháò we svng shvdøm mvyø we íe. Vsvng tiqmaq taq yángshì we nø angdè taq paqzírì, bvnlì mvkrøm mvdøprì vlwe ínìgø we lòng svng chapdap taq vtànlvm mvwáshì, mvkamshì tiqmaq taq íranì nø paqzí, mvkrøm mvdøprì mvluq mvpøn kéò we ínì gø angdè góng angdè kámshì we nøt taqkèní jòr nø ongwe svng vtoshì lúnòe.

Vhánglúnò we vsvngrì kaq èyangvt nò dvgvp angdè lvpat nø gvzà nøtcvm lvm dø íwe tvrà rìgø vhømìe. Ínìgø angdè góng angdè kámshì we nøt svng vrang shàì we taq wedø bønlún we vsvngrì taq kèní paqzí lushìnø tønshì we nøt kèní dvzaq shìlvm vchyake we íe. Wedø dvzaq shìwe taqgø angdè lvpatò tvnù manggá wawe gvl shìwe vdòng taqkèní dvzaq shàì nø angdè nøt èlúmwe, vdu vbóngwe dangrì taq dvtøp shì dángí vrang shàì we nø angdè góng angdè kámnøt svng téwa dvhángā lún we mvtaq téwa bvnlì dvtírì gø ngørnø vhánglún lvm íe wawe nvngòn ziwe shvngkà yayáng naròe.