Èlúnò dángte taq nøt shøm shárà we

Èlúnò dángte taq nøt shøm shárà we

Vsvng tiqgø taq lún mvyø we nøtrì nø rø mvtámshì høqshaq vlwe ínø èlúnò we dángte taqgø nøtshøm we mv vl wanø shønwe kà vle. We dø íratnø lúnò we mvdàm télún lvm, jòrwe mvdàm téwa jòrlvm dvzaqshì we vsvngrì wa íe. Wedø nøt, laqyà rìnø shvla we íe pàwálvm wani jòre walòng nø dvzaq dvkángshì we taqkèní lúnshìwe angshí angwvt íe.

Ínìgø jòrnø èlúò we dangrì taq yalòng nø Gvrayí ziwe jejú kùngà ratnø jór lúnò we íe wanø vtoshì sháràe. Wekat wa byowe nøt shømlvm lòng lúnshì we íe. Vsvng mvlúngkaí nø dang vrvm taq nøtshøm lvm mvlúnò. Pàwálvm wani angdèí èlúnò we taq téwa lúnlvm tiqdá vsvng kaq dvløtnø dvzaqshì weí ngà angdè tiqgø télún lvm, téjòr lvm wanø dvzaqshìe. Wedø dvzaqshì we dang taq angdèí dèdamò dø jòrlvm dang mvlúnshì ralong dvgvp nøt mv byonø, nøt mvshømblvm bung dvzaŕ we íe.

Wedø írat dvzaqshìe wawe taq tiqdá vsvng taqkèní paqzí lushì, cvnshì nø dvzaqshì lvm vchyak we íe. Angmaq taqkèní yangshì, cvnshì nø angmaq mvdàm téwa jòrlvm, vhánglvm rat wanø dvzaqshì wenø mvjò we tiqlòng ílonge. Pàwálvm wani vsvng nvng dvløt nø dvzaqshì we dvhø taq angdèí dèdamò zìdang svng mvlún shì ralong dvgvp nøt mvbyolvm, mvshøm lvm, angdè góng angdè nøtcvm lvmrì vhøm sháshì we íratnø vsvng kaq dvløtwe mø:í dø angmaq taqkèní cvnshì nø angmaq dø jòrwe svng lúnlvm wawe nøtí dvzaqshì wenø nøt shømlvm svng vtoshì lún we gø íe.

Gvrayí èzíì we jejú nø tiqgø nvng tiqgø nø màbóng we ínø vtoshì lúnì we dang taqgø mabóngblongwe svng síngsháshì lvm gvzàni vchyak we íe. Kàshvbóng rvmnvng tiqpè nø nímzì paqzí dang taq mvdaq weí bønglúnò we ínø angdè tiqgø taq pàwá wedø bøngtémvlún shì we ímá wanø dvdamshì weí nøtcvm lvmrì wáshàì nø gvray jejú svng vnáshì sháìe. Gvray shvnshvŕ kàru taq gø angdèí vtoshì èlúnò dángte taq nøt løm, nøtshøm shálvm shvdøm we íe.

We vdè wur taq vlwe zìdang svng nøt mvshøm we tiqgøò lvpat taq kadø gø nøt byolvm mv vl long. Saige vdáwe tiqpè nø vrá modo lún mvyø e, modo vdávm nigø chøm vrálún mvyø e, wedø angdè lún mèyø we svngwa èyangò vsvng tiqgøò dòng nøt taq nøt byolvm gø vmáng sháò we svng shvdøm we shá dvzitwe dvtit tvle svngkà yayáng naròe.