Jòrnø zìdang vhánglvm dvpat mvdøng vchyak we nø paqzí ímá? Jàng laqyà íe má?

Jòrnø zìdang vhánglvm dvpat mvdøng vchyak we nø paqzí ímá? Jàng laqyà íe má?

Company tiqlòng taq bvnlì walvm vsvng láò dvgvp paqzí mvdaqnø bvnlì dvzaqshì vsvng lá vdue má mø:íni svdiq døngnø rvtø yánggúng wálúò we vsvng lá vdu emá? Bøn daq we nø paqzí vlnø bvnlì dvzaqshì we vsvng lá vdu we íe. Làngrérì taq jàng laqyà shvlá lvm gø gvzà vchyake. Jàng laqyà shvlá wawe nø angdè ò lvpat shvla dø vrangshì lvm nvmlat danggvp íe wanø gø shønlún shìe.

Jàng laqyà shvlá wáshìwe taqkèní wa angdè lvpat gø shvla dø bøn dvzvŕ we mvtaq shølshú shvlá wáshì we taq gø vsvngí kám vløm vrvmwe tiqgø ílún we íe. Dènilaò paqzí yelwe bat taqnø làngrérì gø vrvm paqzí cvnshì we dangrì taq dèjòr nàjòr dvløt kewe í lóng dvzaq shànø bvnlì vko vkáng rì lá dvzaqshì we íe.

Yanila bat nø paqzí taqwa dvgø shìnø shagóng dvkúmshì rae wanø kámìe. Paqzí dang taq wa rvtørì, pø gvmsùngrì zángshàì nø dvzaq shàì e. Yalòng nø bat zìdangku shvla we jàng laqyà shvlá tiqlòng íe wanø shøn lúnshìe. Mèpvng kaq angdè móng angdè rvgaq svng roqgvr shìlvm paqzí vdèrì vl lvm gvzàni vchyak we íe.

Bat zìdang taq cvnnø làngrérì taq tvsvng dvløt kenø vsvng mvŕdang taq dvgùng vl we tiqgø ílvm téwa wáshì ráì we svnggø yánglún shìe. Bvnlì vko vkángrì tapvm we taq vsvngí mvdàmrvm èyàngvtnø dvgvp dvgùng vl we dø wáshì we gø gvzà ni luqmvn shì ráì we gø íe. Jàng laqyà, góng gwárì mvdàm rvm èyàngò weó vsvngí yáng la tvmvm ràdø wáshì lvm vchyake wanø lánshì sháòe.

Yadø vsvngrì í angdè svng mvdàmrvm èyàngvtnò dvgvp kadø yàng lvm wawe mvdàm angdè góng angdè kadø èyángshì nø kazì dang taq èvl we svng síngshá shìlvm nø téwa vchyak we svng shá dvzár we íe. Dèni batò vsvng tiqmaq taq rvtø tiqlangcè dvpat wa vsvngí yáng latvmvm radø wáshìnø rvtø naqra dvgvp nøt dvgoqnø jànglaqyà mvgám wáshì, dvtanshì rawe gø gvzàni yángshìe.

Yagø nø nvmlat taq wedø laqyà vl pè mø:í, vkvt wa kadø ínø yadø màshvla vsvng bøn ráì má? Wawe gø yánglún shìe yalòng nø nvmlat kèní angò døngnøt mvsøn, laqyà màshvla we vsvng tiqgø íwe svng dvtvn we wa ílonge. Dèni bat taqnø yadø íwe vsvngrì ò ne svng wamā nø tiqlang, tiq rvtøcè dvpat wa shvla dø wáshì vsvngrì nøng maq shvnvng gùr gùr taq vlwe íe.

Bvnlì wangrì taq paqzí, mvkrøm mvdøprì mv-vl we ínì gø shvlá zìbè vháng dø vtoshì lúnò we vsvng tiqmaq svng yáng shìe. Yalòngnø angmaqò dòng nøt mvsøn shèrwe, bvnlì taq kámvm vrvm we vsvngrì írat we dø vko vkángrì vto shì lúnò we svng síngshá dvzvŕ we íe. Yadø vháng mvnshì ráì we bat taq vsvng tiqgøò jàng laqyà shvlá lvm wawe dang svng vpø shvring shàì we dang taq nvngòn yúmwe svng gø yánglún shìe.

Yalòng taqkèní angdè tiqgøò lvpat zìdang jòrnø vháng lúnlvm dang svng zá dvzvŕ sháò we svng gø døm shárà longe. Dòng nøt mvsøn nvng jànglaqyà shvlá wáshìe wawe taq nø cvndøng dvrárì, dvsháza nøtrì, kámshì we nøtrì, bvnlì døngjárì kámshì sháò we nvng vdu vbóng dø vl sháò we rì vbá we íe. Angdè taq yadangrì shvngbe kømzøpnø paqzí dang cvn dvzaqshì we ínìnø jøng jøngni jòrwe svng vto shì lúnlvm wa ílonge.

Kadángte paqzí mvdaq we vsvng tiqgø ínìgø tiqdá vsvngí kám vløm vrvmwe mv-vl we ínìnø vshøng màshøng ílonge. Angdè taq vl we paqzí nvng nøt mvsøn shvlá zángshì lúnlvm nvng jàng laqyà shvlá taqkèní wáshì lvm gø gvzà vchyake we íe.

Wedø íratnø vsvng tiqgø taq paqzí tiqlòng taq wa zømshì we dø mø:í nø nøt mvsøn jàng laqyà shvlá kèní angdè lvpat svng vrangshì lúnlvm nø mvdøng vchyak we svng dvtit tvle shì we íe.