Angdè góng angdè yáng mvtàmvm we nøt mègvl shìni

Angdè góng angdè yáng mvtàmvm we nøt mègvl shìni .

Mvshøl tiqlòng taq vsvng tiqgø zaqlè diráì we tvrà rvmø mvgwì tiqgø tvrà shvnvngø vdøng shaq ripdvr we svng yàng bøà. We mvgwì gønø shøngtøm tiqlòng taq cømri mvniqcèí vdøng shaq íwe svng yàngò rat ang dvdá shìe wae. Angí dvdamò wenø "mvgwì gonø yadángte te nø nvngòn kùngàrì vlwe pàwálvm rat shì nø mv-vt má? Ya cømri mvniqcè nø shàmhøng gø mø:í we" wanø dvdam mòe wae. Wedø íratnø mvgwì roqshú pèyáng svng dinø angí røtnòe. "Vnvmpèá mvgwì wawe nø nvngòn vtang kèní zaq we nìna tiqpvn íwe pàwálvm cømri mvniqcèí nàdøngò we ínì gø àng pàwá mv-vt? Pàwá màkámshì we ímá? Shàmhøng gø mø:í we, vtang shaq dàralé wanø røtòe. Mvgwì roqshú pèí àngsvng vrá vtànò we taq "mvgwì Yago nø cvmkèní téráì we íe. Ang cvm lvpat taq cømri yalòng íni vdøn nò we íe. Cømri yalòng svng àngí rat mvdáng yàngò.

We dvgvp ang nvngòn gø shì mvzaq rat íe. Vkvt ang téráì nø nvngòn zaq ráì we ínìgø cømri yalòng íwa vdø:nòe. Mvgwì yago nøt taq cømri yalòng svng kadvgvp rat mvdá:ngò wa lánshì we íe." Wanø vtàngòe. Wedø ni vsvng lvpat taqgø cvmré dvgvp angdèí wá mèlúnò we dangrì taq kadvgvp gø wá mvlúnò wanø dvdamshì weí nøt dvcvmshì sháìe. Vsvng tiqgøò lvpat wawe nø mvjàn shvngwe nvng vbónge. Tiq kvt kvt vloq sháshìe, weyáng kèní vrá búnglvm dvkáng shì ràwe íe. Nà tiqgóng búngnø èrip lúnò we høqshaq nànø cøm vsvng tiqgø mø:í. Íni gø nà vloq bøwe yáng kèní mèbúng dángte høqshaq nø nànø cøm we vsvng tiqgø ni ílonge" wanø shvngøt nòe wae.