Shvlawe dangrì svng wa nøtsùn shàì

Shvlawe dangrì svng wa nøtsùn shàì

Daini bat taq vsvngrì dvhø tasvng dvløt shøngjungwe dangrì gvzàni luqmvnshì ráì. Wedō tasvng dvløt shøngjungwe dangrì luqmvn shì ráì we taq vsvngrìò nøt mvsøn rìnvng singnø vháng mvnshì we vlwe dø tiqdvchá yúm mvnshì we gø gvzà yánglún shìe. Bashàrì taq shvngbe nø mvrà vléshì sháì we wa ínø shvla we dangrì svng cvn dvzaq shàì we taq nvngòn vnøn we ínìgø màshvla we dangrì kaq wáshìlvm nø gvzàni yùl longwe íe.

Wedøni shvlawe dangrì svng nøtsun lvm yakwe ínìgø màshvla we dang svng dvdam nø nøtsunshì lvm nø gvzàni yùl we svng yánglún shìe. Àngdè èvl we shvnvng gùr gùr rìtaq shvlawe jànglaqyà rìkèní dvcøp shì ràwe íe. Dèni nøngmaq bat taqnø vlíng vpo we dangrì gvzàni luqmvnshì ráì we ínø vko vkángrì gø luqmvn shì ráì we lvpat íráì.

Vháng mvnshì we batzìdang taq cvnnø shvla we dangrì vlwe døni mvshala we dangrì gø gvzàni vkønnø svre dvké lúngì we íe. Social media rìò shvla we, màshvla we rì, wulaq tvràrì nvng móng lvmang nvng sing we shvngkà rìsvng tiq second vdòng taqni mònggvn svng vtán lúnò we bat svng vpo ráì we íe. We dang taq dènibat làngrérì àngdèò lvpat tvmø bvnlì rìsvng gurò nø Internet taq wa rvtø dvbéò we rìgø gvzà yánglún shìe.

We Internet kèní làngrérì taq paqzí cvnshì, paqzí lashì lúnwe vko vkángrì vl we dø tiqdvchá vjú mv vl we Game mvnshì we taq wa rvtø dvbé shì sháò we gø íe. Ya dangrì nø lángshì gø taq shvla we màshvla we kadø lángshì we taq cvnvm we ínø vjú vtoshì we dang taq gø vsvrvm we íe. Wedø tiq dvchá ni àngdè taqkèní shøn nàtànò we kàciqrì gø àngdèò nøt mvsøn svng vtánshì we íe wae.

Shvlawe nøt mvsøn vl we tiqgø taq shvla we jànglaqyà svng vtán lúnnò we ínø shvlawe jànglaqyà vllvm dvpat nøt mvsøn shèrwe dø vllún lvm dvzaqshì ràwe íe. Vsvng tiqgø taq dang vrvm taq shvladø wálún lvm wawe nø mvbøn daqwe ínìgø shvla we dang tiqpvncè taqnø jórlún lvm dvdamshì nø dvzaqshì ràwe íe.

Zìlàngrérì kaq nvngòn zí mvyø we nø shvla we nøt mvsøn zángshì lúnlvm dvpat nø àngdè góng àngdè nøt mvsøn svng vrang dvcøpshì shvla we ínø shvlawe dang svng wa nøt mvsøn kèní dvdam shìnø cvnwe tiqgønø jànglaqyà rìgø wedøni shvlawe svng vlíng vpo dvzvŕ we íe.

Yadang taq nøngmaq kám vsvngrì nø kàngpè yesuò chutcháng we shóngnøt mvsøn, jàng laqyà rìsvng yàngì nø cvndvgømì weí àngdè lvpat svng gálòng taq cúnshì lvm dvzaq dvkáng shàì. Dvsháza shóngnøt gvlshì we, noqngøm tvràrì taq dvzaqshì we gø àngdèò dòngnøt mvsøn svng shèr dø bøn dvzvŕ we mvtaq mòngzøl lòng svng gø zílún we íe. Yadangrì shvngbe nø rvcvngcè tiqgøò dí ràwe tvnù mangárì gø íratnø yadangrì svng cvn dvgøm mìweí shèrnø vnvpwe làngré lvpat rìtaq cúnshì laqlúnì wang nvngòn ziwe dvtit dvle shvngkà yayáng naròe.