Zìlàngré rìò rvtø

Ya 21 àngyá mvzuq nøng vdòng gvzà lvwan dø mònggvn lvpat zìdang vháng mvnshì ráì we svng yanila làngrérì taqkèní síngsháì wedø tiqdvchá we zìdang svng yel mvzi shì høshaq vháng lúngì we gø íe. Wedø vháng mvnshì ráì we lvpat svng yelnø àngdè móng àngdè rvgaq svng gø we zìdang svng tuqlún lvm làngrérì taq bvnlì døngjá vl we íe.

Wedø vhángwe zìdang svng jórlún lvm dvpat zìlàngrérì taq àngdèò lvpat rvtø rìsvng zíshìnø paqzí cvnshì we, lvpat vlíng vpo shìwe dangrì taq dvzaq dvkángshì ràbøì we íe. Ni vrvm lvpat taq rvtø mvl nø màta rawe nø shvngbe taq bønsháshì we íe. Tiqni vdòng nari 24 dàm vlwe taq àngdèò rvtø rìsvng kadø wa vjú vl dø lánglún lvm cvnnø lvpat taq jòr lvm, krvtcøm lvm rì vhømì we dangrì taq gø vsvrvm me.

Wedø íratnø lúnshìwe rvtø àngdung svng àngdèò tvnù mangárì jórlún lvm dvpat lángshì shálvm gø làngré rìò døngjá tiqlòng ni íe. Dènila bat taq kadø íwe lvpat taq èvl we ínìgø pvnyàn paqzí cvnshì, lashì we mv vl we tiqgø dvpat nø àngdèò lvpat zìdang jòrnø vhánglún lvm dang taq pvngkrat lvmwa íwe svng síngshá dvzvŕ we íe.

Vrá tiqdang kèní èyàngvt nònìnø àngdènø mònggvn paqzí tiqpvn pvn ècvn shì lúnbøò we ínìnø we paqzí taqkèní chvpdap bvnlì taq gø jórlún høq dvzaqshì lvmgø rà vchyak we íe. Wedø ínø wa àngdèí rvtø zíshìnø cvnshì bøwe paqzí nø àngdèò lvpat dvpat vjú vle wanø shøn lúnshì longe. Dènila làngrérì tiqmaq taq àngdèò mèpvng lvpat dvpat vjú zímvlún we dangrì taqwa vlínnø rvtø dvbéò we vsvngrì gø gvzà yánglún shìe.

Vránø dèni bat làngrérì gø vrvm nø smart phone rì langshàì wewa ílúngì we taq we phone taq wa vjú mv vl dø rvtø dvbé lvm mø:í nø àngdè dvpat vjú zílún we dangrì taq lángshá lvm shvdøm mvyø we íe. Shøn mvyø we nø àngdèò tvmø bvnlì dvpat lángshìwe mø:íni vjú vl we paqzí tiqpvn pvn cvnshì we taq láng shá lvm svng nvngòn zí shvdøm mvyø we íe.

Vránø làngré bat walòng svng nø vle vmkvt vrá tiqkvt vtáng mvlún shì we ring vtang lvpat tiq rvtø íwe rat we lvpat svng vpø shvring shìnø lánglún lvm laqni vchyak we íe. Wedø íratnø làngré tiqgøò lvpat taq ngànø dvshà:nge wanø vzing shìlvm tvle àngdèò rvtørì svng vjú vl dø kadø lángshønge walòng svng dvtøp shìlvm téwa vchyak longe.

Wedang nvng singnø 1. Àngdèò tiqni rvtø svng àngdè dvpat vjú vl dø paqzí cvnshì we dang kadángte lángshìe má? 2. Rvtø kadángte svngnø tvmø bvnlì taq záng shìnø lángshì bøì má? 3. Rvtø kadángte nø àngdè shvnvng gùr gùr rìnvng vtoq vtip we dang lángshì bøì má? Walòng svng sun dvtøpshì shvla we íe.

Zìlàngré wawe nø móngdàn tiqmóngdàn vhán lúnlvm dvpat shølshúrì ílonge we rat làngrérì taq mvdøng bvnlì døngjá vlwe svng shvdøm we íe. Wedø íratnø zìlàngrérì taq rvtø lúnshì we vdòng àngdèò lvpat mvtaq àngdèmóng àngdè rvgaq mònggvn zìdang svng tuqlún lvm dvpat dvdam shàì we taqkèní dvzaq dvkáng shì nø rvtø rìsvng vjú vl dø lángshì laqlúni wang nvngòn ziwe dvtit dvle shvngkà yayáng naròe.

Aa