Ngørwe shøqònì (Happy birthday) Cúnshì lvm lúnò we angnì

Ngørwe shøqònì (Happy birthday) Cúnshì lvm lúnò we angnì .

Vsvng shøqò nì svng byo vtvng we bóyni waò we tvrà nø vsvng tiqgøò lvpvt nø vpø we nvng Gvràyò mørshvm nvng vbong rvt dvgùng vlwe vsvng rì írvt íe. Wedø írvt angmèò puqwá vdòng cvmré góng írá we shvngbè svng cún shì dvzvr ràe. Tiqmaq nø tiq shvlá, vní shvla, tiqmaq nø shøq lvm dán shìwe rvtø ang dangdang taq kení dvshá dvré shvtnò we vhømòe. Wedø shvtnò we vhø:mò we cvmré rì dvpvt shøqni wawe mà-vl gvza nønt mvbyo lvm íe. Wervt nø shøqni mà-vl nìgø mvrà. Cún shì dvzvr we ínìnø vrvm me wanø shøn mvyø' nàíe. Dènì la vdèò cvmré gòni rì svng pà mvla:nò nø shvtò we vsvng rìnø dvgá vsvng vsak shvt lvm nø té yòl lvm íe. Wedø írvt mònggàn taq gvzà vháng ráì we svng yvng lún shìe. Nøngmaq shvngbe vpøì we Mother Trezá íshønò wenø "cømsaq mòngzøl dang svng vgv:mò we nø cvmré góng rvtø taq shvtnò we dang íe, wae.

Pàrvt ímá wani nø cvmré góng rvtø cvmré gònì cèrì svng shvt lú:nò wenø dvgá vsvng rìsvng shvt lvm nø té yòl lvm wa íe.We vní pvn (vsvng shvt we nvng cvmré dvjáò) we nø vsvng shvt we dvrá nvng dvgá vsháy we mà-vl wanø dvshvt we íe. Cúnshì lvm vkáng (Rights to Life) wawe vsvngpvn vkoo vkáng vrvm kení té vchvk we vko vkáng tiq dang íe. Cún shìwe vsvng vrvm nø vdè lún vdu we vko vkáng svng lún mvyø' we írvt angmèò góng vdòng taq vlwe rì dvpvt gø mvré zawe shóng nønt taq kení vgvm lvm vchvk we íe. Cvmré dvjáò wenø vdèí tvlú dvgø'shaq màvl we rvtø taq cvmré góng bøn ráì we rvt íe. Lvngcha nvng vsháy we cvmré dvjá lvm aqcì, túcì, zv'ngcì rìsvng kám shìnø vlù vlvng rì tiqmaq nø jàng laqyà tìn we, tiqmaq døngku svdiq mvdøng rvt tiq maq vkang we høq íwe svng yvng lún shìe. Wedø jàng laqyà màgvm we vlù vlvng rìsvng shvngøt shú angpè angmè maq nvng shvngømré bvnlì ríshú dvzøm shù rìí shvngøt dvtvn mvluq we rvt íe. Cvmrérì nø Gvrày ízi we gømpaq íe. We gømpaq rìsvng mvshò:ngò nìnø ngà svng ezí sha wanø Mother Trezá í shø:nò we vle, røt shìe, dvkù:mòe. Nøngmaq shvngbè wedø nønt zang nø cún shì nìnø cvmré góng yvng vlwe cvmré gònì cè vrvm byo vtvng we shøqò we angnì svng wálún lvm íe. Vsvng kaq dvsházā sháò vsvngrì nø ìshøt ìgv̀n v̄le; kadø íe wani angmaqí nø dvsházā we lún lú:ngòe. (mati 5:7)