Làngré nvng kàru

 Làngré nvng kàru

Dèni bat làngrérì nø mèpvng mèyàrì dvpat móng lvmang, dvcì, nvng vdè móng vdè rvgaq dvpat paqdàng tvle shìlvm døngjá vlwerì ni íe. Wedøírat dènila làngrérì nø gvzàni vchyak we svng shøn mvyø we íe. Wedø vchyak we taq døngku tiqlòng vdòng taqkèní pvngshìe walòng svng shøn vdu longe. Vdè tiqgø vrvmò døngku vdòng taq cvmré rìkaq svng shádvzit we dang kadø wáā lún we mø:í ni paqzí lashì shvla we lèga kàrurì gvlā, vshøpā we vle má walong svng shøn mvyø we íe.

Jà, gvmsùng, pø, zaqshøprì nø vsvng tiqgøò lvpat taq dvrá we tvrà ku ínìgø, màdvráwe tvràkubínìgø, àngdèò lúngàm vlwe taqkèní gø dvzaqshì nø lá vshøp shì shvla longe. Móngdàn tiqmóngdàn vháng vlúnwe dang svng èyàngvtnò dvgvp gø dvgá móng pøzaqshøprì vdá mvgàmwe taqkèní we móng wervgaq vháng vlún we mvdàm we móngdàn taq vlwe vsvngrì, móngcèrì taq paqzí vlwe taqkèní we móng svng dvháng lúnò we nø téwa vpø ring we íe. Weratnø móngdàn tiqmóngdàn vháng vlún lvm dvpat nø wemóng vsvngrì taq paqzí shá lvm nø mvdøngni vchyak we íe wae.

Móngdàn tiqmóngdàn ò mèpvng kaq vháng vlún lvm wawe nø we móngdàn svng shølwe shølshú rì taq cvnwe íratnø dènila vlù vlàngrì taq mvdøng vchyak nø døngjá vhapwe svng shvdøm nø nvngòn zí mvyø we íe. Dènila làngrérì yaq lèga paqzí shawe nvng móng lvmang tvrà taq jodø ripwe kvtwa mèpvng kaq wemóngdàn vsvngrì nø mòngzøl we svng vtoshì lúnlúng:ò we íe.

Dénibat làngrérì nø dang vrvm rvtø vrvm taq mònggvn paqzí mvkrøm mvdøprì lá vshøp shì ràwe rvtø svng vpo bøì we íe. Yadø lèga paqzí taqkèní øpwe, shølshú wáshì we lvpat taqkèní wa cømsaq mòngzølwe lvpat svng zílún lúng:òe. Weratnø yanila làngrérì nø rvtø lúnshìwe rvtø cèrì vdòng taq lèga paqzí, mònggvn paqzí svng yelnø lashì ràwe svng shvdøm mvyø we íe.

Móbgdàn tiqmóngdàn nø léga paqzí svng yáng mvtàmvmwe, tónglaqyà, kàrurì svng yáng mvtàmvmwe, nímzì paqzí svng yáng mvtàmvmwe nvng pøgvmsùng lúnlvm wawe tvràdang svng wa vyuqwe la ínìnø wemóng, we rvgaqnø tiqni tiqrvtø taq vnøn lvm wa ílonge.

Dènibat làngrérì nø vdèmóng vdè rvgaq dvpat lèga paqzí cvnshì dvzaqshì ràbøì. Kàru lègarì røwe jànglaqyàrì gvlshì ràwe íe. Wedø ínøwa zitnø shánøtrì we lèga karilurì taqkèní lúngshì we íe. Pàwálvm wani vsvng svngnø nøtí øpkáng we ínø we nøt svngnø zitnøtí øpkáng lúng:òe vránø we zitnøt svngnø mvkrøm mvdøprì taqkèní øpkángò we íe.

Kadvgvpgø lèga røwe tiqgø taqwa vháng vlún we scng vto lúnò we gø íe. Dènila làngrérì nø mèpvng rvtø nilarì dvpat shølshúrì ídaqwe vsvngrì ínø nvpni wawe rvtø taq àngshí shvlá wáshì longwe àngpù, àngwvtrì ni íwe svng síngshá dvzvŕ we íe.

Wedøíratnø batvsak vramwe rvtø taq lèga kàrurì rø dvzaqshìweí paqzí paqratrì lá vshøpshì lvm nvngòn ziwe íe. Lèga røwe dvcìrì nø vháng vlúnwe ínø vhángvmwe dvcìrì nø lèga røe wawe kà vlwe døtiqdvchá vlù vlàngrì taq lèga røwe jàng laqyàrì gvlshàì nø vdèmóng vdè rvgaq vháng lúnlvm dvpat gálòng wáshì laqlúnì wangnø dvtit tvle svngkà yayáng naròe.
 

#youth