Làngré nvng síngshá nøt

Làngré nvng síngshá nøt

Làngré rvtø taq síngshá nøt nvng singnø paqzí zùngrì taq svra/maq rìí shvngøt dvtú nø tvrà dvtan āwe rì taq síngshá nøt vlràwe, tiqdá vsvng dvpat gø lvpat cúnshì ràwe dang, vnà, nerì tánshì ràwe dangrì svng shvngøt dvtúwe íe.

We rvtø rì taqnø àngdè nøt taq pàti mvlvn shàì we ínìgø vsvk te ra dvgvp yarì shvngbe nø vpø ringwe rì íwe svng síngshá lúnì we íe.

Wedø ámshì nøt, síngshá nøtrìnø jøng jøng ni vchyak we svng yánglún shìwe íe. Wedø kámshì nøt síngshá nøt wawe nø làngrérì taqwa mvtaq shaqré rì taqgø cvn dvgøm lvm gvzàni yakwe tiqlòng íe. 

Wedø kámshì nøt, tiqdá vsvngrì kaq síngsháā we nøtrì nø nøngmaq gø vrvm taq zángshì lúnlvm dvzaqshì ràwe íe.

Yalòng nø vsvng tiqgø kaq cvnā shvlawe tvrà mø:í. Welòng nø nøt mvsøn laqyà tiqlòngku íratnø àngdè tiqgø taqkèní wálúnlvm dvzaq shì ràwe íe.

Weratnø vsvngrì kaq síngsháā we nøt vlwe nø nøt tøng nøtdøng we tiqpvn íe wanøgø shøn lúnshì longe. Bvnlì døngjárì mvdàm síngshá shìwe, kámshì lúnwe nøt,  cipshì lúnwe nøt zángshì wenø nøttøng we tvrà tiqlòng niíe. Yalòng nø vsvk cvmwe tewe nvnggø sing we mø:í.

Làbgré bat vsvng mvngpòng mvdòrì dvhø shèrwe nøt mvsøn kèní dvzømshì sháò we nøt laqyàrì, bvnlì døngjá rì taq síngshá nø kámshì lúnwe nøt laqyàrì yánglún shìwe taqkèní vsvngrì kaq nøtshøm dvbù lún dvzvŕ we gø íe.

Weratnø nøngmaq shvngbe nø làngré lvpat taq àngdè nvng singwe bvnlì døngjá rì taq shò shò wa kámshìwe nøt laqyà, dvsháza shóngnøt, cipshìwe nøt laqyàrì svdiq døng we nøt laqyàrì gvlshàì we ínìnø shvlawe vjú rì lúnshì lvm íwe mvtaq dang vrvm taq shvlá vtang jór nvngòn rì lúnshì lvm íwe svng shvdøm nø nvngòn ziwe íe.

Wedø shvla we nøt laqyàrì vlwe nø vsvngrì ígø vlømvm rawe, shóngshìwe nvng tasvng vpø shvring kewe vjú rìgø vtoshì lúnlvm ílonge.

Lèga vruwe svra tiqgø shønwe kàtaq " vsvng tiqgø nø chá vle mvdaqwe ínìgø shèrwe nøt taqkèní bvnlì døngjá rì svng kámshì sháò we nøt laqyà mvvl we ínì nø wegø nø pàdang taqgø zømdàng we mø:í" wae.

Weratnø shóngshøng we zìlàngré vnvmchvngrì shvngbe svng nvngòn zí mvyøwe nø àngdè nvng singwe bvnlì døngjá rì vrvm taq shèrwe nøt mvsøn rì taqkèní kámshìwe nøt laqyà gvlshì nø àngdèò lvpat taq gálòng svng zílún lvm dvzaq shàì wang dvtit tvle svngkà yayáng naròe.