Paqzí lushì lvm shvlawe shaqré kà 3 kà

Paqzí lushì lvm shvlawe shaqré kà 3 kà

1. Nøt shvlá ègvlshì 2. Vsvngrì nvng vrvm we tvrà taq nàyáshì 3. Dvgø shvlá taq ènvr shì 1. Nøt shvlá ègvlshì Vsvngrì nøt shvlawe màshvlawe ínìgø àngdè tiqgøò nøt svngnø shvladø ègvlshì. Wekvt wa nàò lvpat tvrà nø shvla lòng svng vtoshì lúnlvm ílonge.

Vsvngrì àngdè mvdàm kadø íwe nøtí vtoqshì rawe ínìgø àngdèí nøt shvláí vtángshì ràe. Nøt mvsøn shèrnø shvla we gvlshì gønø vsvng shvlá íe wa shønlún shìwe íe.

2. Vsvngrì nvng vrvm we tvrà taq nàyáshì Vsvng wawe nø tiqdá vsvngrì, rvnvngrì nvng vrvm we, vzøm nø vtoq vtip we wáshì ràe.

Wedø vzøm vzap we tvrà taq màléshì lvm vyáshì ràlonge. Àngdè nvng nàrvmwe rvmnvng rvmchangrì shvla we kvtwa àngdèò lvpat gø shvla longe. Rvmnvng rvmchangrì mà shvlawe la ínìnø mvhøt lvm rìsvng vhøm sháshì rawe íe.

Darì shaqré mvshøl rì taqgø rvmnvng rvmchangrì nvng vrvm we taq vléshì we yáng kèní dvciq lvpat mvhøt lvm svng vhøm ò we mvshøl rì gvzà yánglún, tálúnì werì vle.

3. Dvgø shvlá taq ènvr shì Dvgø wawe nø vsvng tiqgø ò mvjòrnø, mvhøt lòng svng kùngà banā lúnwe mvtaq nøt mvsøn svng shøm dvzvŕ lúnò we íe.

Ínìgø kadø íwe dvgø shvlárì shvngbe mvdàm gvray kaq kámnøt tvrà dvgø walòngnø àngdè lvpat tvrà svng cømsaq mòngzøl lòng zílún we mvtaq mèpvnh lvpat svnggø chutcháng we jejú tvrà svng shølā we íratnø Gvray kaq kámnøt wawe dvgø vdòng taq cúnshì lúnlvm vchyake wanø dvtit tvle svngkà yayáng naròe.