Shølshú vgo nvng paqzí 2 tut

Shølshú vgo nvng paqzí 2 tut

Shøl shú vgo tiqgø taqnø vsvngrì nvng vzøm vzvp, vtoq vtip we dang shvlá ràe. Shóngshøng we zìlàngré vnvmchvngrì shvlawe shølshú tiqgø bønlún lvm dvpat wawe nø vsvngrì nvng shvlawe vzøm vzvp tvrà vtoq vtip we dang vlrà longe. Wedø vsvngrì nvng vzøm vzvp vtoq vtip we tvrà taqgø shèrwe nøt mvsøn gvlshìlvm gvzàni vchyak we íe.

Pazí vdèrì í shvngøt dvtú we taq vsvngrì nvng vzøm vzvp vtoq vtip we tvrà taq kà gvzà mèshøn ni, dìngwe kà nvng vsvng vnà taq tábyo we kà mvng èshøn, vsvng kaq yitshì we kà mèshøn ni, shvngvr shì kà mèshøn ni tiqdá vsvng í shønka svng vpø we laqyà èwá shì, vsvng kaq shvgùn shvring we kà mvng èshønò vsvng kaq màshvla we dang kèní yàngwe mèwa ni. Kadángte paqzí vshøp nø zitnøt vlwe ínìgø vsvngrì nvng vzøm we tvrà taq chùn chùn wa mvvl vsvng tiqgø dvpat nø kadøgø shølshú shvlá bønlún lvm mvvl long wanø shvngøt dvtú we íe.

Vrá nø pø gvmsùng vlrà longe. Vsvng tiqgø taq kapà bvnlì èwa we ínìgø pø gvmsùng lángrà we lvpat svng tuqráì we íe. Shølshú bvnlì taq èripwe vsvng tiqgø taq ínìgø wedøni pø gvmsùng rì lángrà longe. Pø gvmsùng vl nø wa padang taq ínìgø chùn chùn wacè wálún shìwe íratnø pø gvmsùng rì àngdè wurtaq vl lvm gø vchyak tiqlòng taq vbá we íe. 

Shølshú vgo tiqgø taq shvre nøt gø zángshì ràe. Shvre nøt mvzángshì we tiqgø dvpat shølshú vgo bvnlì rílvm yakwe dangrì vhøm sháshì wegø íe. Pàdang taq ínìgø àngdèò bvnlì tvnù mànggá svng tuqlún lvm dvpat kámshì nøtí wá kàmshì ràwe gø íe. Kadvgvp ínìgø vzàng lvp svng ripnø tvrà shølā lún rà longe. Bvnchvtrì shìwvtrì vrvm taqgø àng mvtú svng lánø pvranā kamshì ràwe íe.

Shølshú tiqgø taq nøt mvsøn kùngà vlrà we mvtaq nøt shvyangshì lúnlvm gø vchyak longe. Nøt høpwe tiqgø ò bvnlì nø kadvgvp gø vléshì sháò we íratnø nøt shvyangshì lúnlvm nvng we bvnlì dvlàrì svng dvtøp lúnwe nøt kùngà nvng nøt shvyangshì lvm gø vchyak we íe.

Shølshú vgo tiqgø taq vpnúngshì nøt, laqyà gvlshì lvmgø gvzà vchyak we íe. Tiqkvt kvt shølshú wáshì gø nø àngdèò bvnlì wàngcèrì tvle yaklvm dangrì kámshì ràwe, shvngbe ò tvle zákamshì nø dvzaqshì ràwe gø vlrà longe. Wedø ínøwa àngdè mèpvng cvnshú rìgø àngdè kaq svng vlømvm ranø bvnlì ò tvnù mànggá svng jòrlún we kùngà rì téwa lúnshì longwe íe. Shóngshøng we zìlàngré vnvmchvngrì nøngmaq vdèpvn dvcì rì taq gø wedø íwe dvcì shølshú vgo shvlá rì vllvm gvzà ni vchyak we ínø tasvng tubùm dvbangā kelvm gø gvzàni vchyak we íe shvngbe í yadangrì svng síngsháì nø dvzaq dvkángshì lvm wàì wang dvtit tvle svngkà yayáng naròe.