Shølshú tiqgø taqkèní mòngzølwe àngmvdò tiqlòng kadø vrang ràwe dang

Shølshú tiqgø taqkèní mòngzølwe àngmvdò tiqlòng kadø vrang ràwe dang

Bvnlì wàng àng mvdò tiqlòng ò vsvk nø we bvnlì wàngcèrì ò nvngòn kù:ngà shaq taq mvdøng cvn longe.

Vsng mvdò tiq mvdò wawe nø bvnlì wàng vrvm, dang vrvm dvpat vchyak we tuq dang kèní vbá we gø íe. Bvnlì wàng tiqlòng wawe nø we yá:ngø dvzøm, dvzaqshì we bvnlì wàngcèrì taq mvdøng vchyak we íe.

Vsvng àng mvdò tiq mvdò wawe nø vsvng tiqgø taqkèní mvzán íwe kù:ngà shaqí bvnlì wá dvzaqshì ràwe gø íe. Weratnø vsvng mvdò tiqlòng taq vkwe vsvngrì shvngbe nø tiqnøt tiq mvyùng wáshì lvmnø gvzàni vchyak we íe. We vsvng àng mvdò svng øpshøl we shølshú vgo rì taqgø zitnøí dvzaq dvkángshì lvm nø laqni vchyak longe.
Wedø íwe taq àng vdènø shølshú tiqgø Shvrà taq ripwe íe má? Shølshú tiqgø wawe taq shóngnøt mvsøn tenø gwaq we wáshì ràlonge. Àngdè nvng singwe bvnlì døngjá rìsvng vtoshì lúnrà longe. Shvngbe mvdàm màrvwìngwe shóngnøt í øpshøl lúnrà we íe. We àngdèò mvdò svng kadøwa mòngzøl long zílún lvm wawe tvrà svng tóng dvzaqshì ràwe íe.

Wedø íwe taq bvnlì wàngcèrì kaq lún vkángrì bvnā ràwe, àng maqkaq shvgùn shvring we, vpø shvrìng we bvnlì laqyà rì wáā dvtanā lúnràwe gø íe. Àngmaq svng nvngòn ziwe, àngmaq shóngwám shìwe tvrà rì svnggø tubùm dvbangā ràwe íe.

Àngdè ò bvnlì wàng, vsvng mvdò rì bvnlì wawe shvrà svng shvng shvng wa wáshì rà wegø vchyak we tiqdang kèní vbá longe. Shøng mvyø we taq àng vdèò bvnlì wàng taq shøq shøq wa ínø nøt mvngør lvmdø íwe la ínìnø we bvnlì wàngcèrì ò nøt mvsøn kùngà rì svnggø téwa vnøn dvzvŕ sháò we íe.

Tasvng vzøm nø bvnlì wawe nø àngdè ò bvnlì tvnù mànggá svng shvlá vtang cvn cvn tuq lún we tiq tvra gø ílonge. Vsvng tiq mvdò vdòng taq tiqgø nvng tiqgø vzøm vzap we tvrà mvvl we ínì nø we bvnlì taq màrvm màráwe, rvwìngwe bøn dvzvŕ sháò we gø íe. 

Vsvng mvdò tiq mvdò vdòng taq tiqgø nvng tiqgø nø tasvng tubùm dvbangā kewe, paqzí mvkrøm nvdøprì dvkøm we gø wáshì ràlonge. Wedø ínø wa tiqgø nvng tiqgøò zitnøt rvlnøt rì téwa vháng vlún longwe ínø we bvnlì svnggø téwa dvháng lún lú:ngòe.

Tiqkvt kvt tiqgø nvng tiqgø ò vléshì we ciprì taqgø síngsháā kewe nøt taqkèní mvrà chutā kelvm gø vchyak we íe. Vsvng wawe taq kagø taq ínìgø kømzø:pme wawe nø mvvl long. Wedø íwe dangrì svng síngsháā kewe nøt taqkèní tubùm dvbangā kelvm gø gvzàni vchyak we íe. 

Vsvng mvdò tiq mvdò vrang shìwe taq we mvdò vdòng taq bvnlì dvzøm shìwe bvnlì wàngcèrì ò paqzí dang zitnøt síngrál nøt rì dang vshat lúnlvm gø dvdamānø shvngøt dvtú we lìpùng rì wáā, töngā lúnlvm gø vchyak longe. Wedø ínøwa we vsvng mvdò tiqlòng nø mòngzøl nø vháng vlúnwe tvrà svng tuqlún we íe.