Àngdèò lvpat tvnù mànggá svng kadø vrangshì lvm

Àngdèò lvpat tvnù mànggá svng kadø vrangshì lvm

Nøngmaq tiqgø vrvm nø lvpat tvnù mànggá svng wawe zaqlè tvrà taq dìì we vsvngrì wa íshàe. Tiqni rvtø taq we tvnù mànggá svng jórlún tuqlúnlvm svng shóng shàì wewa íe.

Vsvng mvril vrvm taq we mànggá nø gvlshàì wewa ínø we tvrà taq ripnø dvzaq dvkángshì we wa íshàe.

Yadø àngdèò lvpat tvnù mànggá svng jórlún tuqlúnlvm wawe nø yvkwe tvrà tiqlòng mø:í we svng síngshá shì nø nøt kù:ngà í dvzaq shì lvmwa mvdøng vchyak longe. Wedø lvpat tvnù mànggá rì taq Long range nvng short range wawe rvtø àngdong nvng rvtø yvnggúng mvnggá wanø vní pvn vllonge.

Rvtø àngdong mvnggá wawe nø nvpni, pvngni mø:íni tuqrawe nøngrì vdòng wawe rvtø àngdong taq tvnù mànggá svng jórlún tuqlúnlvm dvpat íratnø welòng svngnø àngdè tiqgóng taqkèní shølshú vgo tiqgø ku dvzaq dvkángshì nø we mvnggá svng nøtløpshì nø dvzaqshì ràwe íe.

Rvtø yvnggúng mvnggá wawe taq tuqrawe 5 nøng mø:íni 10 nøng taq kadø bøn dvzvŕ mvyøe wawe shøngran yøpnvng ílonge.

American gàmzø koqkámpè Ronal Regan shønyà:ngì we taq àngnø Republican party vsvng tiqgø íwe taq nøngmaq nø Republican mànggá yøpnvng shøngranrì gvlshàì wewa laq mvwá shàì wedø wa v:lì we ínìnø kratcøm lvm wa ílonge.

Gàmzø koqkám rìò karu tiqlòng taq àngdè tiqgø ò lvpat tvrà mvnggá svng gvl mvsháshì we vsvngnø cøm vnøn longe. Àngdèò nøt mvsøn kùngà rìsvng dvshatshì ràlonge wanø vru yàngà we yánglún shìe.

Àng vdè tiqgø ò tvnù mànggá rì svng jórlún tuqlúnlvm dvpat tøp tøp wa wá dvzaqshì ràlonge.

Vsvng tiqgø ò lvpat tvrà dvpat nvmlat taq wulaq tvrà nø vchyak we yánglún shì longe. Welòng dvpat àngdè nø wulaq bvnlìrì wanø pø lálvm svng wá vdue má? Mø:íni paqzí cvnshì dá:ngí wepaqzírì taqkèní pø gvmsùngrì lúnhøq wá vdue má? Walòng svng dvtøp shì ràlonge.

Vránø àngdè nø kadø bøn mvyøe kadø íwe bvnlìrì wá vdue walòng svng shvng shvng wa shìpvn washìnø wádvzaq shì ràlonge. Wedø dvgø shì shaq íbøwe bvnlì dvlàrì svnggø wá dvtøp mvbat, ka zìngdang nø wá vdáng bøì, vrá ka zìdang svng vrá wá vdue walòng svnggø dvtøp nø yàng màdat dvzaqshì ràwe íe.

Weratnø àng vdè ò lvpat bvnlì tvnù mànggá nø kadø íwe, kadángte tewe rì svng síng sháshì nø we tvrà svng kadø dírà we nvng vhømshì rawe bvnlì døngjá rìsvng wá dvzaqshì ràwe mvtaq vsvngrì nvng gø vdu vbóng dø vl vdu we svng síngshá shì ràlonge.we yvng kèní wa àngdèò bvnlì tvrà mvtú rìsvng dvtøp nø wá vdu we íe.

We dø àngdèò lvpat tvnù mànggá rì svng nø àngdè ò síngrvl nø kèní yuqyà dø mvnshì nø tvrà tongshì weí vrangshì ràlong we íe. Wedø wáshì lòng wa àngdè lvpat tvrà dvpat tévtang we lvpat tvnù mànggá svng vrangshìwe, tongshì we íe wawe dvtit tvle svngkà yayáng naròe.