Kv́m vsvng rìò zaqshøp

Kv́m vsvng rìò zaqshøp

Gvrayé, Nà vdòng taq máshìrà wv̄ngshøng rvtnø, ngà svng nàcún nàsòng dakngà.  “Nà nø ngà angkàng èíe. Nà taqkèní dvgá shvla we tiq pv̀n gø ngà màdáng,” wvng nø Yehowa svng ngà shø̀ne. Rvgaq tø̀mø ngà nøt shø̀m nø dvbòng we nø, ring vtv̄ng pòngbàng lú:nò we shànshér vsvng yarì íe.  Dvgá dvmø̀ kaq rvcv̄ngshìrì angmaq nø dvshà mvhøt we luq longe. Angmaqí shvwi nīlv́m núngpà shvrú:ngò dø ngàí màshvrú:ngò. Pvrà werì bø̀ng svng gø ngà nònggø:pmí mvtǿngò.Ngà zaqshøp mvtu nvng ngà vpvtlv́m gwìn nø, Yehowa Nà èíe. Ngà vpvt vdu lòng gø Nàí nàsóngāngàe. 

 Ngø̀rngun zàngzàng nø ngà rvgaq dvrøt vdòngø dèpvtne. Jø̀ngjǿngni, ngà vpvt we zaqshøp svng ngà vtvngkèní nøtshø̀me. Ngà svng shvngøt dvtú we Yehowa svng, ngàí shvring shvtàlv́m íe. Yaqdø̀ng rvtø̀í gø, dòngnøt taq ngà svng shèngøtne. Ngàí Yehowa nø ngà mv́rdv̀ngø kadvgvp màdvgvp v́l dvzv́ròe. Ngà vbàngpa yv́ng Ang v̄l rvtnø, ngà nøt svng vwv̄l mèdv́ng.

Wervt ngà dòngnøt nø shaqshaq wa dvbùe. Ngà mvsø̀:ní gø shvringshvtàòe. Ngà shagóng gø ngv̀ngtǿng dø v́ldv̀ng wá lúnòe. Kadø íe wani, Nàí ngà svng Zùpvng rv́mø mèlàngà. Nà Shanshér pè svng gø bøplv́m lòng Nàí vhǿm mèdèzá:rò.  Gø̀nshaq tvrà nø Nàí ngà svng shá dèzv́rà nø, Nà mv́rdv̀ng taq nø dvbùlù:ngí dv̀nzø̀nge. Nà vbàng pa taq gø dvbù lòng nø dvciqciq màmø̀l.