Vsvng lvpat ò dvløt shø̀ngjong bóy

Vsvng lvpat ò dvløt shø̀ngjong bóy

Nøngmaq vsvng lvpat, téwa rvcángcè bashà rìò lvpat nø dvløt shø̀ngjong bóy tiqlòng taq ripwe nvng vbóngwe íe. Dvløt shø̀ngjong bóy tiqlòng wàlv́m dvpvt nø vzàng lvpkaq tvlú dvgǿshì ràwe nv̀ng cv̀ndøng dvrárì gv́l ràlonge.

Kàshvbóng, Boxing dvløt bóy tiqlòng sv̀ng wàlv́m íranìnø weyv́ngø dvløt lv́m vsv̀ngnø we dvløt bóy taq jór lúnlv́m dvpvt rvtø̀ lushìnø dvcøp dvgǿshì ràlonge. Vdèò shagóng shiqshàn, nònggwòn káng lv́m dvpvt  dvgø dvzaq shìràwe mvtaq we dvløt bóyò cv̀ndøng dvrárì svnggø cvngøm lúnlv́m dvgǿ shì ràlonge.

Wedøni dvciqlvpat gønshaq lúnlv́m dvpvt gø gvray mvshóngshì we tvràrì sv̀ng mvcv̀nnø gvray í gv́lshaq íwe dvrámè rìsvng cvndvgøm lv́m rà longe. Kapà dangtaq ínìgø shvlawe àngshí àngwvtrì svng vtoshì lúnlv́m dvpvt nø àng dvtàng tàng dvzaqshì ràlonge. Mònggv̀n taq shvlá vtang Jà, Longsíngrì svng gø rvgaq vdòng svng àng dvtang tang èdù bǿò we nvng dvcøp shvnvp bǿò nø wa vpǿ ringwe pø̀ svng vpo longwe íe.

Gvray àngò àngcǿ àngcèrì bǿnlún lv́m dvpvt gø rvgaq mvdàmø cúnshàì we rvtø̀ taq àngdang dang kèní mvhøt lv́m shìwvtrì dvhø̀ taq pvlàcè dvpvt dvgǿ shì ràlong we íe. Dèni bat nøngmaq ò lvpvt rìsv̀ng cun dvtøp shàì dvgvp nøt yòrlv́m, nøt dvshàlv́m rì nvng dvshá mvré íwe tvràrì vhǿ:mìe.

Lvpvtrì tiqni mvdàm tiqni témvnshì ràwe, shagóng mvshiq mvshàn nø zawe vhǿm ràlong we tvra rì nvng làngdø̀m taq lvpat shìlong svng vle ràlonge. Shóngshø̀ng we shòlaqré vnvm vchangrì nøngmaq nø àngmè puqwá kèní léshì ráshà we rvtø kèní ngǿ ràwe ínø̀ we dangrì nø yadø rvgaq mvdàm taq cúnshàì we rvtø̀ yvklv́m shìwvt rvmè taq dvzaq dvkángshì nø lvpat cúnshì ràlonge wawe nvmik tiqlong gøni íe.

Weratnø̀ lvpat taq nøt yòr nøtdvshà lv́m, nøt mvgòr lv́m, vsvk tenø svrǿng lv́m nvng záyv̀ng vkǿn lv́m wawe shìwvt rvmè taq cúnshì ràì we íe. Wedø íwe lvpat kèní vle lún, lutshì lúnlv́m dvpvt kadø íwe bv̀nlìrì wá vdu we long sv̀ng gø vdè lvpat taq cun dvtøpshì lv́m nvng chvpdvp wá dvzaqshì lv́m gø gvzàni vchvk longwe íe.

Nøngmaq shvngbe rìò lvpatrì nø shì bøweó vdángvm we mø:í we íratnø nøngmaq shvngbe ò dvciq lvpvt wawe mepvng pvlàcè lvpat dvpvt gø dvgǿ shì nø ya bat taq døngmvn dø, pvlacè dangtaq shiqshàn dø v́l ràwe wedang dvtit tvle mòngkà yayv́ng nvr:ngòe.