Zitnøt rv́lnøt vlwe vsv̀ng

Zitnøt rv́lnøt vlwe vsv̀ng

Vsv̀ngrì tiqgǿ vrv̀m taq kù:ngà vnǿnwe dangrìnø wedøni vl-longe. Vdè góng, mv̀rshv̀m, pø̀ zaqshøprì mvtaq dvgá dangrì taq mvluq mvpø̀nwe, nøtshø̀m lv́m tvrà mvlúnshì we dangrì vl-longe.

Wedø íwe rvtø̀rì naqlong dvgvp wedangrì sv̀ng mvzán lú:ngò weí svrenøt lvpsv̀ng vpo dvzv́r lú:ngò wegø íe. Pàdang taqgø yùl yùlcèí vcǿm zíshì mvyǿ longe. Wedø íwe tvrà nø lvpat taq vtangshaqni svre dvkéwe lvpat cúnshì we tvràni ílonge.

Wedø íwe tvràrì lvpat taq jøng jǿngni gø vl-we sv̀ng yv́nglún shìe. Nøngmaq shvnvng gùr gùr taq kù:ngà vnǿn nø nøt dvcv́mshì weí shìni høqshaq wedø shìwvtrì vdòngø lvpat zíshì we rì gø yv́nglún shìe. Yarì shvngbe sv̀ng èyv̀:ngvtnò dvgvp vtangshaq nøt yòrlv́m tvrà íwe sv̀ng yv́nglún shìe.

Weratnø̀ vdè lvpat cv̀mwe rvtø̀ kèní vdè lvpat tvrà sv̀ng shvláwa tongshì lv́mnø vchvk we íe. Vdèò lvpat tvrà wawe sv̀ng svrenøt mvgv́lshì shaqí dílún lv́mnø gvzà vchvkwe tiqlòngni ílonge. Dang vrv̀m taq vcǿm mvzílv́m, zitnøt rv́lnøt v́lrà longe.

1-  vdèò lvpat tvrà taq kagǿ sv̀nggø svre mvrà, gv̀mzø̀pè ínìgø, dvshà vsv̀ngrì ínìgø, vnvpwe vsv̀ng ínìgø, vdá mvgàm vsv̀ngrì ínìgø vdu vbóngdø nøt mvsø̀n sv̀ng gv́lshìnø vto vtip ràlonge.

2-  Mvhøt mvhè wáshìwe nøt laqyàrì língshìnø̀ vdè sv̀ng vtøp dvzv́r sháò we laqyàrì sv̀ng língshì ràe.

3- Vsv̀ngrì kaq dvjaq kāmshì ràe, vhøshìwe mv̀rshv̀m dvtan lún ràe, tiqgǿ gǿ nv̀ng vtoqshì ràwe rvtø̀rì taq vneí dvjaq kamshì lúnràe.

4- Nøt døng nøtshèr we laqyà gv́lshì lún ràe, vsv̀ngrì mvdàm nøt dvgoq nøt zángshì mvdaq, tiqdá vsv̀ng kaq vtøp dvzv́r we wá mvdaq, vréshì wegø wá mvdaq.

5- Nøt ratshì lúnràe, laq laqni vsv̀ngrì kaq á:nāshì we laqyà sv̀ng língshì ràe, vdèí tønzán shìwe tiqzidang sv̀ng vleò we høq tønshìwe gø wámvdaq.

6- Nøt mvsø̀n kù:ngà vlnø̀ kamshì we nøt gv́lshì ràe.

7- Vsv̀ngrì shvngbe dvpvt yv́ng nv̀:mvmradø wa v́l mvdaq

8- Cv̀mré laqyà døwa wáshì we wá mvdaq, vdèí dèdā:mò dø mvbø̀n longwe dvgvp shvngoshìwe nøt dvcv́mshì werì wá mvdaq.

9- Vsv̀ngrì í vdè kaq vtiqvm rawe dvgvp vtoshì lún ràlonge. Rvzaqwe tvrà sv̀ng vto lúnràe. Tiqdang dang taqnø shvláng shìràlonge walòng sv̀ng síngshá lúnràe.

10- Dang vrv̀m taq shvng shvng wa vtánshì sháràe. Vdèò zìdang nv̀ng vdu vbóngdø v́l lúnrà wegø íe. Dvpé shìwe laqyà gv́lshì mvdaq.

11- Vsv̀ngrì tiqgǿ vrv̀m kaqsv̀ng vpǿnøt gv́lshì ràe.

12- Vdè mvdàm kù:ngà vnǿnwe vsv̀ngrì kaq vréshì we, yv́ng mvtàm:vmwe wáshì mvdaq.

13-  Vdè kaqsv̀ng vjú mvzi we dangrì sv̀ng gur lún ràlonge.

14- Tiqdá vsv̀ngrì kaqwa mvrà shvri we wáshì mvdaq, yitkewe dangrì wa wáshì mvdaq.

15- Vsv̀ngrì mvdàm vdu vbóngdø síngshá lún ràe.

16- Kapà sv̀ng ínìgø vwadø lúnlv́m sv̀ngwa mèshóngshì ni, vsv̀ngrì yv́kèní vwadø lún lv́m sv̀ngwa nøt mèzang ni.

17- Mvràwe dangrì taq vwadø dvbang røtshìwe wa mèwa ni, vdè tiqgóng taqkèní wálún høq dèzaqshì,

18- Vdè lvpat sv̀ng vdè nøt dvshǿmshì lún ràe, tiqdá vsv̀ngrì nv̀ng shvbóngshì nø nøt dvcv́mshì we nø rv́lnøt mvluq pø̀nwe ni íe.

19- Vsv̀ngrì mvdàm wa vlǿmshìwe nøt gv́lshì mvdaq, vdè hí mvdàmø vdè riplún høq dvzaqshì ràe. Vdèí èwàò we vjúrì shvngbe nø vdè dvpvt wani ílongwe ratnø̀ vdè tiqgǿò nøtkèní lvpat tvrà sv̀ng dílún ràwe gø íe.

20- Vdèò lvpat tvnù mvnggá rì sv̀ng vdè taqkèní jór lúnhøq dvzaqshì lún ràe. Kratcǿm lv́m tvrà sv̀ng svre mvdaq.

21- Lèga, Karu rì røshìnø̀ paqzí lashì, vshøqshì lúnrà longe. Tiqkvt kvt cǿm vnǿn rawe ínìgø we shvràtaq wa vtiq lv́m mv-vl, zàndvtut mànvr nvr dvzaqshì ràwe íe. Weratnø vdèò lvpat taq vdèí dèda:mòwe vdèò tvnù manggá rì sv̀ng jórlún tuqlún lv́m dvpvt wawe nø vdè tiqgóng taqkèní zitnøt rv́lnøt rìí dvzaq dvkángshì nø wálún ràwe dang dvtit tvle we íe.