Vmíng vkáng

Vmíng vkáng

Mònggv̀n móngdànrì vrv̀m kaq øpkángwe vsvngrì shvngbe taq vmíng āna wawe vlwe wa íe. Wedø vmíng vkáng, vmíng āna lú:nò we vsvngrì taqkèní we móng, we rvgaq svng shóngnøt:í øpshøl we ínìnø wemóng wervgaq nø jø̀ng jǿngni mòngzøl nø zìdangrì gø vháng vlúnlv́m wa ílonge. Wedø mø:í nø̀ vmíng vkángrì kaqsvng màshvla dø langwe vsvngrì í øpshølwe ínìnø wemóng wervgaq nø gvyaqshìvm wewa ílonge.

Vmíng āna (Authority)

Vmíng āna wawe ò ànglvjøm nø Latin kà kèní tuqráì we ínø̀ téwa vzìnglv́m, luqtàm lv́m wawe lvjøm lúnshìwe gø íe. Weratnø we vmíng āna svng lvpvngø vlwe móng vsvngrì ò lvpatrì vdá mvgàm lv́m, mòngzø̀l nø àngmaqò zìdangrì vháng vlúnlv́m manggá svng wáshìwe íe.

Mònggv̀n taq kadø íwe vsvng mv̀ngpòng mvdòrì taqínìgø we vmíng āna taqkèní shvladø tøp tøpwa øpkángwe mv-vl longnìnø we vsvng mv̀ngpòng mvdò nø rvtø̀ àngdongcè vdòngtaq gvyaq vrø̀l lv́mwa ílonge.

Vmíng vkáng, vmíng āna wawe shvngbe nø Gvray yv́ngkèní ziwe wa íratnø̀ welòng taqkèní vsvng shvngbeò vjú dvpvt dvzv́r shvlá bv̀nlì kèní dvzømā ràwe íe. Nøngmaq rvcángcèrì shvngbe ò vmíng vkáng, vmíng āna v́l vtang, cípshìwe nøt kèní dvzømshú dvzv́r shvlá tiqgø wanø dvdamshì lv́m nø Kàngpè Yesu ílonge.

Vsvngrì mvdàm vmíng āna lú:nòwe vsvngnø we vsvngrì dvpvt Gvrayí dvzv́r we dvzømshú dvzv́r tiqgǿni ílonge. Rvgaq mvdàm svng Kangpè Yesu tuq yv̀:ngì wegø vsvngrì kaq dvzv́r lv́m dvpvt mø:í, we vsvngrì dvpvt dvzv́r wáshìlv́m dvpvt màng íe. Wedøni vsvng mv̀ngpòng mvdò tiqlòngò shølshú wáshìe wawenø we vmíng vkáng, vmíng āna kèní shvnip shvnvr lv́m dvpvt mø:í, we vsvngrì dvpvt vjú zílún lv́m dvpvt màng íe.

Vmíng vkáng lú:nò vsvng tiqgǿò nøt laqyà wawe nø we àngò vsvngrì, cv́nshúrì mvdàm àngtaqkèní kadøwa øpshølwe tvrà taq shò shòwa cv́n lúnlv́m nø mvdø̀ng vchvk we íe. Àngmaq nvng tiqnøt tiqmvyùng kèní vzø̀m vzvp ràwe íe. Àngmaq ò kàrì táānø̀ àngmaq mvdàm síngsháā lúnràwe gø íe. Vsvng tiqmvdo ò øpkángwe tvràrì shvngbe nø we àng mvdò vdòng taq vlwe vsvngrìò laqyàrì taq cvnnø̀ kadøgø vlíng vpo sháò wegø íe.

Vsvng tiqgǿò nøt laqyà vjøng svng shá mvyǿwe ínìnø wegø kaqsvng vmíng vkáng zívløt ràe wawe shaqré kà gø vlwe íe. Gvrayí pv́nmv́nwe dvrèrì, vsvng, ninà shangarì shvngbe nø toni døni pvnyàn vlwe ínìnø vtangshaq mòngzøl we tvrà ílonge. Tìcè, tìmèrì gø àngwàdø ni vyønø vlwe ínìnø vtangkèní vjú vlnø vnvpwe ínìgø tiqkvt kvt àngwàdø mø:í we vtì tøngrawe, mvrø̀ rawe kvt mvhøt lv́m tvrà svng dvbung lú:ngò we íe. Welòng døni móngdàn rìsvng øpshølwe vmíng āna lú:nò we vsv̀ngrì taqgø vdu vbóngdø we dangrì taq mvwáshì longwe nø, vmíng vkángrì chávle langwe, vmíng ānarì taqkèní shvnip shvnvr we wáshìlong dvgvp wemóng, we rvgaq nø vnǿn lv́m tvrà svng tuqlongwe íe.

Weratnø vsvng wawe nø to kèní cv̀ndøng ràwe cv̀ndøng dvrárì vdòng taq vdu vbóngdø cvn dvgømnø̀ vdu vbóng dø vsvngrì kaq vjú zílún we tvrà, bv̀nlìrì taq dvzømshì ràwe dang shvdǿmnø̀ nònggwòn ziwe íe.