Pvla bǿnsháò we dangrì svng ègu:rò

Pvla bǿnsháò we dangrì svng ègu:rò

Vsvng tiqgǿò lvpat taq vdèò rv̀mnvng rvmchangrì dvhø̀ kagǿ nø vdè dvpat pvladø iwe rv̀mnvng íe má? Døngmvn nø shvlawe rv̀mnvng wawe nvng vdè dvpat màshvla we pvladø íwe rv̀mnvngrì wanø 2 pv̀n vl-longwe svng síngshárà wegø íe.

Vdè dvpat døngmvnnø shvlawe rvmnvngrì wawe taq vdè nvng vrúm vsvrwe shvràrì taq vl vduwe ínìgø kadvgvpgø vtoq vtipshìnø̀ mvrøt shø̀ngran wáshì we rv̀mnvngrì íe. Vdè taq yaklv́m vhǿmshì ranø rà vchvkwe rvtø̀rì taq àng vdè shvnvngø vl nø àng dvpat rà vchvk longkvt vdè gø àngshvnvng taq riqā lúnwe rv̀mnvngrì íe.

Vdè dvpat mà shvla we, pvladø íwe rv̀mnvngrì wawe taq àng dvpat rà vchvk longwe rvtø̀ taqwa vdè kaqsvng vnvpshì rawe ínø dvgá rvtø̀rì taq vdè shvnvng kèní yilshì vme. Vdèí àngkaq svng zǿmdàngnø̀ rà vchvk longwe rvtø̀rì taq àng kaqsvng vtoq vtiqshì lv́m mvlún shìwe vsv̀ngrì íe. Shvlawe rv̀mnvng mvdø̀ngrì nø vdèò jàng laqyàrì kaqsvng síngsháā we nvng vtoā lúnwe rv̀mnvngrì ílonge. Weratnø̀ àngmaq nvng vzø̀m vzvpwe tvrà taq shvng shvng wa vzø̀m vzvp vtoq vtip lúnwe gø íe.

Vdè dvpat pvla bø̀nwe rv̀mnvngrì wawe nø vdè kaqsvng àngmaq shóngshì we tvrà ku wa bǿn dvzv́r mvyǿwe ínø̀ wedø mvbø̀n long dángte vdè kaqsvng àngdang dang kèní vtøp dvzv́r rawe gø íe. Vdè dvpvt rv̀mnvng shvlárì wawe nø vdèò lvpat tvrà taq jór nònggwònrì svng dvbùnøtí vtoāwe nvng vpǿāwe mvtaq kùngà vnǿnwe rvtø̀rì taqgø vdè svng tubùm dvbangā nø vdè shvnvng taq ripā we íe.

Rv̀mnvng shvlárì wawe nø dang vrv̀m taq vdu vbóngdø shvrv́m shvráshì sháò we nvng bǿn vduwe tvrà tiq tvrà svng tiqdø diwe vsvngrì íe. Màshvlawe rv̀mnvngrì wawe nø àngmaq bǿn mvyǿ we tvrà tiqlòng svng wa shvnv́ngshì nø nøt zaqwe vsv̀ngrì ílonge.

Rv̀mnvng shvlá wawe nø vdèò dvgá rv̀mnvng rv̀mchvngrì kaq svnggø vtoānø̀ àngmaq taqkèní vdè kaqsv̀ng vtøplv́m tvrà kaq tuq dvzv́r mvyǿwe nøt mvsø̀n mv-vl.

Màshvlawe pvladø íwe rv̀mnvngrì wawe nø vdè dvpvt kadvgvp gø mvnúr we nøt mvsø̀n zángshì longe. Kadvgvpgø vdè kaq sv̀ng zá vtøp dvzv́r wegø íe.

Wedø vdè kaqsvng vtøp dvzv́rwe màshvlawe rv̀mnvngrì nø tiqgǿ nvng tiqgǿ tasv̀ng vpǿ shvring kewe nøt laqyà mv-vl.

Wedangrì svng yv̀:ngì nø vdè lvpat taq kagǿ nø vdè dvpvt pvla bø̀nwe rv̀mnvng íe, kagǿ nø vdè lvpvt svng vjúziwe, shvlawe rv̀mnvng íemá walong svng nøt cun dvtøp shàì nø rvcangshì lv́m wàì.