Vsvk Tēwe Shaqrérì Kaqsvng Vpǿra We Dang.

Vsvk Tēwe Shaqrérì Kaqsvng Vpǿra We Dang.

RVA Rawang taq kèní shv́ngbe kaqsvng pàmvra, Dèni tálún shìlvm shvngkà taqnø nøngmaq shvngbeí cándvgø̀m rawe

“Vsvk gvzà tēweShaqrérì kaqsvng vpǿlv́m waì’’ wawe kà vgo taq kèní tiqdùngcè dvtit dvle lvm íe.

Shóngshøng we vpè,mè vnv̀m vchvngmaq nøngmaqò lvpvt taq vsak tiqyá nǿng màvhø̀m nìgø, bvnchvt tiqyá nvng vhǿmlvmrì

wa íshàe. Cv̀mré, Shaqrérì, dvshàwe vsvng rì, Svmarérì taq mvdvm shvrǿng we shaqrérì nvng singwe dangsvng dvshat

mvyǿng we íe.

Vsvk tēwe shaqrérì téwa dvshá dvré íwe íe. Vsvktē shvrǿng we shaqrérì nø chøm vrvm taq vlwe íe. Shvlá mvsònshì shvrǿng

we shaqrérì gvzà vlwe svng yv́ng lún shìe. Vdá mvgàmrì taq gø tiq pvn, dvshàwe vsvng rì gø tiq pvn, yatwe ang dang dang vle.

Vdá mvgàm vsvng rì taqnø angcèrì shvngøt kà matā vdede shòngshi dø vlnø nønt dvshà dvzvr we íe. 

Dvshà we vsvng rì taq gø tiq pvn yvtwe vle. Dvshà we vsvng tiqmaq nø muk tiqtuk v́mlún lvm, v́maq lún lv́m dvpvt gvzà dvshà we

tiqmaq lvwe íe. Wedø yatwe svng yv́ngshì we mvrshàm taq tiqpvn pvn svng dvdvm shìwe íe. Tiqpvn pvn svng nønt shìdø,

(mvíninø) tiqpvn pvn svng kám shìwe dø vsháme.

Shóngshøng we pè,mè vnvm vchvngmaq deni nøngmaq lepvt taq nø shvrøng we shaqrérì taq vkoqvkáng wawe mavl ámì we íe.

Rvtø vrvm bvnlì jvt we, døngkū dvpvt rvtø̀ zí mvlúnò rvt vsak shvrǿng we shaqrérì svng tì, mvlán bǿà we íe. Lvng døm taq vdèò

angcè svng cere rawe, angshàngrì svng cere rawe nvng vkvtwa shøq daq we vdèò pvlírì kaqsvng cere rawe rvtørì íámì we svng

yvnglún shìe. Yadø bø̀nwe svng nøngmaq zìlvngréí dvdv̀m rǿngrà bǿì we íe. 

Nøngmaq gø tiqni nø shvrǿnglvm rìwa íshàe. Tiqmaq nø dvzømshúrì màdá lvpvt béámì we shaqrérì gø gvzà vlwe íe. Dari shaqré

kà vle, welong nø angpèni, angmènií nø cv̀mré tiqsé gǿsvng shvv́m shvaq, dvzø̀m mvkoq ngøtnò we ínigø, angcè tiqsé gøí

angpèní angmè vnígǿ svng shvv́m shvaq dvzø̀m mvkoq mvlúnò wae. Vkvt nøngmaq shvnvng gwrhø̀m taq bø̀nwe svng yvnglún shìwe

írvt gvzà jòwe kà íe. Mvrìng vrvm, wamà vrvm taq yv́nglún shìe. 

Angcǿ angcèrì tiqmaq shǿnshá shìe. Nàmaq nø namaq elashìnø shvv́m shvaq shìnøng, nøngmaq gø vdènø vdè dvzaq shàì we íe wae

Vzan nø gvzà dvzaq shìwe nvngùn gvzà vlwe ínigø vkvt nø nvngùn yúmráì rvtø íbǿì we svng nøngmaqí dúm shárae. Angmaq nø rvtø

vleráì. Shóngshøng we vnvm vchvmmaq nøngmaqò chøm taq vlwe pè,mè maq svng shvla mvchà yv̀nglvm wàì. Shvngbe mvdvm gvrayo

cø̀msaq mòngzø̀l we jèjú vtò leqlún nøng, shvngbe kaqsvng oqa.