Gvza vnvp we vmèò wùr

Gvza vnvp we vmèò wùr
 

Dari dvgvp angcø̀mè tiqgǿ vdá we angmè tiqgǿ vle.Angmèí nø angcø̀mè svng gvza shò:ngòe.  Tiqni taq angmè nø angcø̀mè svng

shvyupmò nø dvgá rvnvng tiq chø̀m svng vseámì. Gvza malé we rvtø taq angshaq tiqpvn táshì daqì. Pá mvràwa nàò chø̀m nvng gvza

vsvr yvng táshìe, íyeló mvrànaí wanø tiq rvná chv̀m rùnge. Wedø chvng vnán táshì daq wenø mídat modo shaq gø táshì lúngì.

Chø̀m vkvt nelé wanø mvring sharé tiqgǿí dvtá daqà. Wekvt angnø nønt gvza dvshàámì nø dvshaqí chø̀m svng lonø chø̀m vkvt we

svng yvng bǿà. Weyvng svmi vmaq dvbvng we mvring vsvngrì nvng angri angyang rìí dvbv:ngò nigø chø̀mnø vkvtnámì.
 

A:ngí angcø̀mè svng dvdvm lungà nø angcø̀mè svng lùlvm dánshìe. Way medini chøm vrvm shvngbe svmiwa íbǿì wanø vgámò nigø̀

angnø chøm vdúng taq gùng ámìnø angcø̀mè svng vbònò nø pamvrácè tuqlúngì. Angmèò wur nø svmi dvmmá íámì.
 

Wedø angnǿng gvza vléráì we rvtø taq angcø̀mè gø gvza télúngì. We dvgvp angcø̀mèí angmè svng røtnòe. Vmèá vsvng angmè maqò

wurnø gvza vnvp nø pawá vmèò wur nø màvnvp yv:ngìmá wanø røtnòe. Wekvt angmèí shvngbe shvngøtnòe. Wekvt angcø̀mè nø

mònggàn taq vnvp vtvng íe wawe wurrì mvdvm taq vmèò wur nø vnvp vtvng íe, wanø dvgò zí shvringòe.