21 yazuqò paqzí dang

Pazí vdèrì taq kèní paqzí dang svng lvchøm àngpvn pvn ku poqò we dø tiq dvchá 19 yazuq paqzí dang, 20 yazuq paqzí dang, 21 yazuq paqzí dang wanø vl we í lángìnø cvnshì lúnì we íe.20 yazuq vdòng taq Myanmar móngdànò pazí dang mvme vlíng vpo ráì svng gø yánglún shìe.

Vsúyaq paqzí zùngrì tiqni mvdàm tiqni luqmvn shìráì we mvtaq shøngàn paqzí zùngrì gø vlman shìráì we svng yánglúnìe. Móngdàn vsvngrì shvngbe gø paqzí màcvnshì mvdaq wa we dvlàrì gø vdè móngdànò shvla we mangá tiqlòngí we ínø zùngmarì gø luqman shì ráì. 20 yazuq béráì dvgvp nø muju zùngrì taq kèní vhángwe paqzí zìdangrì hoqshaq tiqni mvdàm tiqni té wa poqpvng lúngà we svng gø yánglúnìe. Móngdàn vdòngtaq mvngu shàì we svngpvn dvcì shvngbeí gø paqzí vchyak we lòng svng síngshá:vt shà we íe.

Yadø íwe zùng paqzírì mvtaq engineer paqzí àng pvn pvn, zì paqzí, dvrá vgyì paqzí, wulaq paqzí, kvtvm tvmø paqzí, svngpvn tónglaqyà nvng mvløng shøngsùngrì nvng sing we paqzírì cvnshì lún bøshà we íe. Ínìgø dèni laò vdè rvgaq dang àngpvn pvn taq vnøn we í yadø íwe paqzírì cvnshì mvlúnì we gø gvzà vl nø pángkratnìe. Dèni pvt paqzí vdèrì taq kèní gùn dvtøp we taq 21 yaziqò paqzínø zùngmàrì dvpvt vhánglún lvm dang svng gvzà tùbumòe wa nø shøne.

Dèni bvt taqø vdèmóng vdè rvgaq vdòngtaq vle ám:ì we 20 yazuq taq vhømì we yaklvm dang àngpvn pvn rì taq kèní cvnshì bøshà weí ya 21 yazuqò paqzí dang svng téwa shvla dø vhánglún lvm dvpvt cvnshì nø vtøshì lún lvm dvzaq shàì. We dø íwe paqzí cvnshì lvm dang taq téwa dvtí dinø jór lún lvm dvpvt

1. cvnà we svra/maqrì taqø gø cvmrérì svng cvnà we dang taq síngshá lvm tvràrì vl lvm gvzà vchyak we íe. Zùngmàrì taq rø sháò we nvng vru sháò we zìdvng taq wa sháò we í vram we mø:í. Problem-base learning and project-base learning wa we zùngmàrìò bvnchvt rì vdòng taq cvnà we paqzírì svng té wa mvdaq dø síngsháò nø cvnshì lún lvm gø mvdøng vchyak we íe. 20 yazuqò paqzí dang taq nø teacher centred wa we shvngøtshú svrarì taq kèní mvdøng mvngushì nø cvnshì we ínø dèni laò paqzí dang taq íni learner-centred wa we zùngmàrì dvhø tasvng tùbum kenø cvnshì ràwe pvt svng vpo ráì we íe.

2. Shvngøt dvtú we lìgarì 21 yazuqò shvngøt dvtú we lìga rìnø chaqdvp bvnlì rìnvng vdu vbóng we zùng lìgarì írà:vmì.

3. Cvn jepmò we dang Cvn jepòe wa we taq zùngmàrì nvng àngmaq cvnshì we lìga paqzí nø vdu vbóng màbóng, cvnshì we dvng taq síngsháò we zìdang nvng rà we dangrì taq tùbumà lún lvm dvpvt íe.cvnjep we àngpvn pvn vl we taq téwa paqzí cvnshì lún lvm, paqzí cvnshì we taq joř lún lvm rà vchyak we rì shálún lvm, gvl shìwe mangá svng lún lvm dvlàrì gvl nø vdu vbóng dø shvngøt we wá ràe.

Wedø ínø wa gvlshì we tvnù mvngá svng lúnshì lvm ílonge wa we dèni pvtò paqzí tvnù lìga bok í we curriculum implementation & Assessment kàru buk taq kèní tiq tutcè dvtit tvle we shvngka yayáng naròe.