Zìlàngré nvng lìka rø shì ràwe dang

Zìlàngré nvng lìka rø shì ràwe dang

Vsvng tiqgøò lvpat taq lìka røshìwe taq kèní vdèò mvsøn nvrømrì svng shvla lap svng bøn dvzvŕ we mvtaq vgomvŕsì svng gø shiqshvn dvzvŕ nø paqzírì ramshì dvzvŕ we íe. Vdè taq paqzí ramshì rawe mvtaq síngnøt rál nøt svng gø téwa zílúnò nø vdè góng vdè kámshìrawe nøt svng gø télún dvzvŕ we íe. Svng nvng vtoq vtip we tvràrì taqøgø téwa síngshá shìrawe ínø tiqdá vsvng kaqgø møngzøl dø vtoq vtip lúnshìweí vdè lvpat zìdang svnggø vháng lúnì weíe.

Lìka røshìwe vjútaq kèní mòngàn taq svté tiqpè nvng paqzí vdè tiqpèò lvpat mvshølrì taq kèní nvngòn zímvyøng wetaq mòngàn taq paqzí vdè gvbà tiqpè íyàngìwe Adisin nø àngò lvpat 11 nøng taq kèní lìka, kàrø pvn kømzøp dø rø dvzaq shìyàngì pèíe. Àngpèí gø lìka rø lvm dang taq gvzà nvngòn zíyàngà wanø shálúnshìe. Àngnø cvmré lvpat taq kèní lìka, kàru gvzà vshøpshì yàngìwe írat àngtélúngì dvgvp àngò vhángwe lvpat paqzírì dvpat gvzà tùbumshìwe paqzírì bønlúngì weíe.

Wewa mvtaq dvshà mvhoq vsvng tiqpè íyàngìwe Hongkong svté mvgàpè li ka shing gø cvmré lvpat taq kèní vhángwe kàru bukrì rø dvzaqshì yàngìwe mvtaq wulaq paqzí nvng singwe lìka, katnvmvm we nvngsing we lìka, Magazine, journal rì gvzà røwe tiqpè íe. Wedø lìka, kàru rì røòwe taq kèní cvnshìnø chapdap bvnlì taq lángshìráì weí Asia dantaq svté vtangíwe Hongkong mvgàm tiqpè bønlúnìwe íe.

We dø tiq dvchá nøngmaq zìlàngrérì lvpat taqøgø lvpat zìdang vháng mvyøìwe ínìnø lìka rø dvzaqshì lvmnø mvdøng vchakwe íe. Lìka røshìwe taq kèní àngdè cvnshìwe lvpat paqzírì shvngwang svng téwa gwaq dvzvŕ we íe. Lìka røwe taq kèní wa vdè nvng vsvrwe mòngdànrìò shvngkàrì, àngmaqò tvmø laqyàrì, vdè dvcìcèrì nvng màbóngwe paqzí rìsvng cvnshì lùnìwe íe. Yalòngnø vsvng gø vràm taq màvl mvdaq gvlshì ràwe laqyà tiqlòng gøíwe svng yánglúnshìe. Vsvng tiqgøò lvpat nø vshøm mvlim vl we taq nvmlat mvlim íwe cvmlvpvt taq paqzí ládvzaq shìràwe ínø lìka, kàru paqzí vshøp shìràwe íe. Vlu vlàng sholaq gòchyvng pat taq nø wulaq bvnlìrì taq dvzaq shàìnø pøshi pømèrì lashàì we lvpat taq íranìgø vdènvng vdu vpóngwe paqzí lúnlvm bvnlì taq vjú ziwe lìkarì rø dvzaq shìlvmnø mvdøng vchyak we íe. Làngdøm mvlim íwe svrøngrawe lvpat taq nø vdèò kámnøt tvrà taq téwa cvngdøng lúnlvm dvpat kámnøt tvrà nvng singwe lìka, kàrurì røshìnø cvndønshìwe ívsvng tiqgøò lvpat shvngbe nø vdè dvpat paqzí ziwe lìka rìrø dvzaq shìrae wanø shálúnshìe. Nøngmaq gø vrvm nø yúm vtang lìka tiq bokcènø rø lúnìwe wa íe. Lìka røwe taq nøtlúm we nø lvpat vháng lúnwe mvtaq vdèò lvpat vpøringwe ínø síngrálnøt wawe bángkà svng gø tánlúnòwe íe. Lvpat zìdang vhángwe gø vrvm taq lìka rø dvzaq shìe. Lìka røwe vsvng gø vrvm lìka vruò we svra mvbønwe ínìgø lìka vru svra gø vrvm nø lìka røwe íe. Lìka røwe gø vrvm nø dvzaq dvkángshìwe nø mø:í ínìgø dvzaq dvkángshìwe gø vrvm nø lìka røwe íe. We dø íratnø shóngshøngwe zìlàngrérì kaq svng lìka rø dvzaq shàìwe taqkèní gálòng svng vtòshì laq lúnì wang nø dvtit tvle svngkà yayáng naròe.