Biman shaq nvng wàlv́m Zàywà mvdò shø̄lshú dvpvt Dawi Shvgùn Zàywà

Gar we lúnlv́m júrøtkà

Biman shaq nvng wàlv́m Zàywà mvdò shø̄lshú dvpvt Dawi Shvgùn Zàywà

Yehowaé, ngà shø̀nkà svng ètángangà. Ngà rvlàngkà svng dèdv̄māngà. Ngà koqkv́m nvng ngà Gvrayá, dvbv̄nglv́m ngà vkøkkà svng ètángangà. Pàwálv́m wani Nà svng ngà røtshø̀nge. Yehowaé, ngà kà svng sháng mvgágá Nàí ètá lú:ngòe. Nv̀msv̄r mvtúí ngà júrøtkà Nà svng shvyūl lóngò nø gv̀mgvm cāngòe.Kadø íe wani Nà nø mvgv̄m we svng wv́mshì we Gvray mèí. Màshup màbóng lòng nø Nà taq màvl.

Dvshv́ngshì rìí Nà mv́rdv̀ng rip mvngut lú:ngò. Mvgv̄m we wàòrì shvngbe kaq Nà shèngōshie. Vyákà shø̀nrì kaq Nàí shèmá:ngò nø; Shvwi shvyǿ vsvng nvng yùmvm vsvng kaq Yehowa Nà ènǿmshìe. Iwe ngà nø Nà mvkok dvdí nøt luqtv̀m rvtnø Nà chø̀m svng gòng longe. Vpǿ svre nø:tní Nà shànshér tø̀ngnø taq ngàí Nà svng noqlv́m íe. Yehowaé, ngà svng ngv̀nshà rì rvtnø, Nà døngman tvrà taq ngà svng èshø̄là. Ngà vzv̀ngzv̀ng Nàí tvrà mèdóngāngà.

Kadø íe wani angmaq shø̀n kà taq kv́mv́m daq we tiq kà gø màvl. Werì dòngnøt taq nø shvtìn gvyaqlv́m nøt dvchǿng zv́ngshìe. Angmaq pvyūng nø vtánshaq dvgv̀m í nø, angmaq pvlèí shvring rā lòng gø vhúng íe.Gvrayé, angmaq mvrà mesøngāò. Angmaq gvcvt taq angmaq laqvtungvm. Angmaqí vléò mvrà luqrvt angmaq svng èlù:ngò. Pàwálv́m wani angmaq nø Nà svng vtúshúrì íe.Wedø ínìgø Nà vdòng taq máshìrì shvngbe nø laq dvbù. Dvbù nø:tní dvciqciq zàywà laq wā. Nàí werì svng èga:rò rvtnø, Nà bø̀ng svng shóngshì rìí gø Nà vdòng taq shvwéshì laq lú:nò. Kadø íe wani døngman vsvng kaq shvmánāshú pè nø Nà èíe, Yehowaé. Dvgàí gā:rò padø, Nà jejúí ang svng èga:rò.i