Gvrayí rvcv́ngshaq pè koqkv́m wáshì we

Gvrayí rvcv́ngshaq pè koqkv́m wáshì we

       Wv́ngzà dvcìrì nø pawá vhvp vjángshìe ma? Bashà rìí gø pawá gvcvt vhúng vjø̄:nò ma?  Yehowa nvng Angò Yøtìí vdø̄rshaq pè* svng vtùlv́m rvt, rvgaq tø̀m koqkv́mrì gvtv́ngshì nø, dùgàmzø̀rì gø tiqdø vrāshì we nø, “Lò, angníò øp mv̄ngbǿng da:tnì nø, Angò kv́ng bv̀nrì rì gø nøngmaq kèní chu:tnì,” wae. Muqlàng rāmø rūng* pèí vhøò nø, Vkàng pèí angmaq svng zērkéòe.  

        Wekvt Ang shv̀mná høpnø:tní angmaq svng ngā:nò nø, Ang shv̀mná vcorlù:ngí angmaq svng nøt vmaq dvzv́r lú:ngòe: “I we, ngà shànshér mvrùl Zion taq, ngà koqkv́m pè Ngàí zv́ng dv́ng bǿngà,” v̄l lú:ngòe.Ngàí jø̀ngjǿng Yehowa Ang dvkv́mkà dvtáa:tnìni: Vkàng pèí Ngà svng, “Nà nø Ngàcè pè èíe. Dèni Ngàí nà svng gv̀l bǿngà,” èv̄le.

      “Ngà svng èrøtshì. Wekvt vsvng dvcìrì nø nà zaqshøp, rvgaq vtv̄ng høq shvngbe gø Nà washìlv́m Nà svng Ngàí jø̀ngjǿng zílv́m íe. Nàí nø shv̀m tv̀ngngúlí angmaq svng èø:pmò* nø, wv̀m chúngrì svng angshī rø̀:mò padø, Nàí angmaq svng èrø̀m lú:ngòe,” wa èv̄le. Wervtnø̀ koqkv́m rìé, rvwv̄nnøt èv̀lnøng.

       Rvgaq tø̀mò dvrá vjì rìé, dvshatkà svng nàtōshìnø̀ng. Vpǿ svrēnø:tní Yehowa svng dèzø̄mnø̀ng nø, nipnip nàdv̀nnø̀ng sórí dèbùnøng.  Angcè pè kaq ènoqnøng,* mø̀íni Ang shv̀mná rí lōng weí, tvrà rām* namaq nàmv́ngv́mnøng we màshá. Pàwálv́m wani Ang shv̀mná høpnøt tiqdvshaqí vcōr longē! Ang vdòng taq máshì rìí nø, ìshøt ìgv̀n lú:nòe.