Gvray àngò shvrúngwe nøt mvsø̀n

Gvray àngò shvrúngwe nøt mvsø̀n

Efesus 1:6 nvng 1:9 ciq taq “Yalòng nø Ang shóngshì pè vdòng taq nøngmaq svng dvpǿ màrøtshaq èzí bǿshà we ngø̀rdvgùng v̄l we jejú svng shvringlv́m rvt íe. Vrá Ang shvrúng we gvcvt svng cà:nò nø Kristu vdòng taq A:ngí vjø̄n yà:ngà we Ang vmáshaq kà nø nøngmaq svng shá dèzá:rìe.” Wanø yv́nglún shìe. Gvray àngò dvsháza shóngnøt wawe nø àngò shvrúngnøt ni íe. 

Efesus 1:4 ciq taq “nøngmaq nø Ang mv́rdv̀ngø pà shvràlv́m màvl we ílv́m dvpvt; rvgaq angké shini màshvzø:ngò vzv̀ng kèní ni Gvrayí Kristu vdòng taq nøngmaq svng rècv̀ng yv̀ngshà.” Wanø vru yv̀ngà. Yalòng nø àngí rvgaq àngké shini màshvzø:ngò vzv̀ng kèní Gvray àngò vdòng taq nøngmaq svng rècv̀ng yv̀ngshà wedang shálún shìwe íe. Gvrayí nø Kristu vdòng taq nøngmaq svng rècv̀ng yv̀ngshà nø àngò àngcǿ àngcèrì dø gv̀llv́m àng shóngshìe. Welòng nø àngò dòngnøt mvsø̀n ni íe.
Gvray nø Kristu vdòngkèní àngò àngcǿ àngcèrì gv́l mvyǿwe dang Efesus 1:6 ciq taq vtàn ráà wegø íe.

Nøngmaqnø Gvray àngò àngcèrì wawe vya svng lúnlv́m tvrà nø àngò shvrúngnøt taqni vlwe íe. Yohan 1:18 nvng 3:16 ciqrì taq “Gvray kaq yv̀ng dá:rò vsvng nø kagǿ gø màvl. Vpè pøtpúmø vl we Gvray Lòngzà pèí mv̀ng Gvray nø kadø í pè í we chaqdvp dètan daqshà.” “16 Ang kaq kv́m vsvng kagǿ ínìgø màmvng nø dvciq lvpat gø̀nshaq lúnlv́m dvpvt, Angcè Lòngzàpè zí daqì høqshaq ni Gvray nø rvgaq tø̀m vsvng kaq shóngshie.” Wanø̀ Kristu nø Gvray àngò àngcè vjø̀ng íwe dang vtànòe.

Roma 8:29 ciq taq “Kadø íe wani Angcè pè nø, angnv̄m angchvng mvme gø taq kèní vlat í lúnlv́m dvpvt, A:ngí vzv̀ng kèní vyv́ng vsháshaqrì angmaq svng nø, Angcè pè mv̀rshv̀m vmvtlv́m rvt, A:ngí darì kèní rvhiq yà:ngì we íe.” Gvray àngcè nø àngnv̄m àngchvng mvme gø taq kèní vlatpè íwe dang shálúnìe. Vlatpè wawe àng lvjøm nø we vlatpè mèpvngø àngcèrì gvzà vlwe lvjøm svng tvnùngò we íe. 
Gvray àngnø àngcè vlatpè taqkèní àngò ngór dvgùng svng vtànò nø nøtshø̀m lv́m tvràrì mv́nò we íe. Gvray àngmv́r taq àngcè vlatpè nvng vbóngwe àngcèrì mvme vle. Weratnø Gvray àngò shvrúngwe nøt mvsø̀n nø àngcǿ àngcèrì mvme vl lv́m shvrúng nøt zø̀ngwe íe.