Gvray jórnònggùn bv̀nlìrì svng dvdv̄m yv́ng kèní nøt shvlǿm lún we Zàywà mvdò shø̄lshú dvpvt Yedutun shø̀ngni nvng shvrálv́m, Asap Shvgùn Zàywà .

Gvray jórnònggùn bv̀nlìrì svng dvdv̄m yv́ng kèní nøt shvlǿm lún we Zàywà mvdò shø̄lshú dvpvt Yedutun shø̀ngni nvng shvrálv́m, Asap Shvgùn Zàywà .

    Ngà vkøk we shaqí Gvray kaq gōngòe. Ngà gǿng we shaq Gvray yv́ng tuqvm kvt, A:ngí ètángange.  Ngà dvshà mvhøt we angni taq ngàí Vkàng pè svng láng bǿngà. Yaqdø̀:ngí gø ngà wur nø júng mvsháò padø pvránshø̀ng bǿngà. Ngà dòngnø:tní gø, nøt shvlø̀m we svng màtōò.  Gvray kaq ngàí dvdv̄mò ke, ngà rvlànge. Ngà shaqmè vhéngshø̀ng ke, ngà pvlàcè shaq vmà:le.  Nàí ngà nēsø̀m mèkāràe. Kà shǿn mvngutnò høq ngà nøt vtv̄ngshaq rvgø̀le. 

    Carvmàng angnirì nvng v̄le yà:ngì angnǿngrì svng ngà dvdv̄m vshatnv́mà.  Yaqdø̀:ngí ngà dòngnøt taq zàywà wvng nø, ngà pvlàcèí nàjáng keng weí nøt taq dak dvdv̄m bǿngà. Vkàng pèí ngà svng tiq dvciq gurlv́m í ma? Tiq lvpat ngállv́m í ma? Ang mvkok dvdínøt dvciqciq tv̄ng bǿà ma? Ang dv́nkà gø lvpatpat nar bǿà ma? g 9 Gvrayí mvrézalv́m lòng vná bǿà ma? Mø̀íni shv̀mná rí weí, Ang mvkoknøt nar bǿà ma? Weyv́ng kèní ngàí, “Vháng vtv̄ng pè Ang vbàng wur língshì bǿì rvt, ngàí yadø vhǿmv́mòe,” wv̀ng bǿngà.Wedø ínìgø, Yehowa bv̀nlìrì svng ngàí dvshv̄nglv́m íe. Jø̀ngjǿng carvmàng kèní Nà dvdv̄m vtiqlv́m bv̀nlìrì kaq Ngàí dvdv̄m rǿnlvm íe. 

      Nà bv̀nlìrì shvngbe svng gø ngà nøt taq dvdv̄m mv̄nlv́m íe. Nàí èwàòrì svng gø ngàí daklv́m íe. 13 Gvrayé, Nà tvrà nø shànshére. Nøngmaq Gvray dø ring we mvshá ìnvt dvmø̀ nø kagǿ v̄le ma?  Nà nø dvdv̄m vtiqlv́m bv̀nlì èwàò pè Gvray èíe. Nà shaq kùngà èjòr we nø, Nàí vsvng dvcìrì dvhø̀ø̄ dètan bǿà. Nà bashà Yaku nvng Yosep angcǿ angcèrì svng, Nà jórnònggùn vbàng wu:rí èchv́ng bǿà.  Gvrayá, tìmè rìí Nà èyv̀ng dvgvp svre vdv̀ne. Tìnúng naqràngrì gø vtø̄rshìe.  Rvmøt rìí tì dvshū:rò nø, muqlàngrìí gø muq dvgø̀:mòe. Nà muqcøn còngmè tvmárì gø kukaq yakaq vshīne. 

    Tvríshì we nv̀mbø̀ng shv́pv̀ng taq nø, Nà muq gø̀m we shaq táshìe. Muqcø̄n còngmè vlapshì rìí rvgaq tø̀m svng dvgáòe. Rvgaq chv̀ng gø vdv̀n nø vtø̄rshìe. Nvmukdvra taq gø Nà tvrà v̄l nø, tìmèrì taq gø Nà dvjùng v̄l we, Nà hímal svng nø kagǿí gø shá mvlúnshì.Moshi nvng Aron angní lvngà wur taqø, Nàí Nà bashà rì svng vyv̀ngré døni èshø̄l yà:ngà.