Gvray vdòngø dvkøqshìrì v́l dø̄ng we

Gvray vdòngø dvkøqshìrì v́l dø̄ng we

Vháng vtv̄ng pè vdòng taq dvkøqshìrà wáshì nø v̄l gǿ à:ngí nø, Pàgø wá dá:ngò pè ang bàngzì vdòng taq v́ldv̀ng wá lún lú:ngòe. Ngàí Yehowa svng, “Nà nø ngà máshìrà nvng ngà cìldv̀ng, ngà vlǿmshø̀ng we ngà Gvray èíe,” v̄llv́m íe. Kadø íe wani hǿng tú:ngò gǿ hǿng kèní gø, shíwù zø̀nlìí dvshí rā we taqkèní shvlutshú gø Ang íe.Ang cherkung mø̄:lí nà svng èwv̄m nø, Ang cherkung lv̀ngpvng máshìrà lá èlún lú:ngòe. Ang dø̄ngtǿng kv́mv́m daq nøt nø nà dvpvt dvgà yvnggúng nvng cìldànkùng èíāe.

Yaqdø̀:ngí vkǿn we svre dvkérì svng gø, vyá:ngí wvp rā we tvmá svng gø, nà svre mvrà.  Dø̄ vdòngø dvchø̀ ra we shíwù nvng vyáng mvlù:ngí tø̀m ra we vcat vrø̀llv́m lòng svng gø mèsère long. Nà shvnvngø vsvng tiq kíng gǿ vtūng nø, nà vbàng lap tiq mùn gǿ vtūngv̄mwe ínìgø, shíwù welù:ngí nà svng mènàkoqvt.Gvray dvrá mvcà:nòrì kaq tvle teq daqò we svng nø, nà nēí dèjaqò nø èyv̀ng lú:ngòe.Kadø íe wani ngà máshìrà í pè Yehowa, Vháng vtv̄ng pè Ang svng ni, nàv́lrà èwāshì bǿì rvtnø, 

Mvgv̄m màshvla we tiq pv̀n gø nà svng màna ra. Shíwù zø̀nlì tiq pv̀n gø nà v́lrà svng mànvpshì ra.Kadø íe wani nà tvràri shvngbe taq nà svng vcún vsònglv́m rvt, Ang muqlàng dvzv́rrì svng A:ngí dvkv́m daqòe.  Nà hí nø lóng taq lēmènàtøpmv̄m dø, angmaq wu:rí Nà svng nàbūn daqe. Kàngkì nvng bø̀zèr svng nàí èlv̄m lú:ngòe. Kàngkì vlàngcè nvng bø̀rì svng gø nàí chipjip nàzv́l lú:ngòe.
 Vkàngpè wae. “Ang nø ngà svng vyin dv̀ngwa shóngshì rvtnø, ngàí ang svng shvlutlv́m íe. Ngà bø̀ng svng a:ngí èshòng rvtnø, Ngàí ang svng vháng rāmø svrelv́m hwámlv́m màvl yv́ng ngv̀ngtǿng dø̄ v́l dvzv́rlv́m íe.  A:ngí Ngà svng ègōng dvgvp, Ngàí ang kaq vtv́nlv́m íe. Shàngrè dvgvp Ngà nø ang nvng tiqdø v̄l nø, ang svng Ngàí shvlutnò nø, vpǿ shvringlv́m íe. Ang lvpat shvyvngāngò weí Ngàí ang svng nøtshǿm dvzv́rò nø, Ngà chutchv́ng we jejú gø̄ ang svng yv́ng dvzv́rlv́m íe,” wae.