" Kùmpgàr we muqlang dvzvr "

Shvngbe svng Pàmvrà. Vpø íwe pèmè vnvmchvngmaq dèni lvmvng tvyø taq nø nøngmaq vsvngrì kaq svng  " Kùmpgàr we muqlang dvzvr rì" dang tiqdòngce dvtit tvle nø dvshvng lvm íe.

" Kùmpgàr we muqlang dvzvr "

Muqlang dvzvr rì nø Gvrayí dèzvrà dàqshaq we Pvlàcè dvtdvt vl, muqlang kèní dvzvr daqa we muqlang dvzá:rì íe.
Wè muqlang dvzá:rì vl dang svng Catholic shvngømré me ínø "Mà ká:m mvdaq kám rà we kvmnønt dvrá ( Dogma of Faith)" wā shvngøt dvtú we íe.

Kùmpgàr we muqlang dvzvr rì vl dang svng shànshér kàru nvng Dāri vkop vkangmaqò tong laqya àng mvsa  ( Tradition ) rì taqkèní mvmè yvnglúnshìe. Shvgùn zaywa kàru bok (91:11) ciq taq vkvtdø shøn yangà. " Kadø íe wani nà tvràri shvngbe taq nà svng vcún vsònglv́m rvt, Ang muqlàng dvzv́rrì svng A:ngí dvkv́m daqòe. " Vrá nø, Mati kàru (18:10-11)ciq vdòng taq gø" Wervt nø cv̀mré yarì taqkèní tiq gǿ svng gø yv́ng mvtv̀má:mò dø mvwàlv́m rvt nàyáshìnøng. Namaq svng Ngàí v̄la:tnìni, muqlàng taqlapmø v̄l we angmaqò dvzv́r rì í nø, muqlàng taqlapmø vl we Ngà Vpè mv̀rshv̀m svng nv̀nnv̀n yv́ng lú:nòe." wànø vrù yangà. 

Vrá nø,"Muqlang dvzvr rì kaq svng dvkv'm yangà we dang"

Vpè Gvray gvsang ínø Bāsha vsvng rì shvngbe kaq svng chvnglvm rvt nønt shvrúng weí, Bāsha rì mvdvm angò shvmvn jèjúrì lùpø'ng dø kømzøp dø èzí íe. Kùmpgàr we muqlang dvzvr rì svng nøngmaq gø'vrvm kaq svng øp kv'nglvm rvt vmíng zíò nø dèzá:rà ì lòng gø Gvrayí zì we jèjú kønpaq tiqlòng íe. Wervt kùmpgàr we muqlang dvzvr rì nø nøngmaq Pvlàcè cúnshàì we lvpat taq tùbùm dvbàng we Gvray gvsangò jèjú nònggùn kūngà vzàm íe. Gvray gvsang ínø Bāsha rì kaq svng vtù vrè weí mvrà wá dvzvr lvm dvpvt krvtsøm bø'ì we ( Satan Lucifer) pè kaq svng vmíng vkang zí yangà. 

Vrá nø tiqlvp kèní nøngmaq kaq svng dvbvng lvm dvpvt Shànshér we muqlang dvzvr rì svng dèzvrà íe. Satan pè ínø nøngmaqò nønt mvsøn vdòng kaq màshvla we vjang laqyarì zàngà lún dø, nøngmaq kaq kumpgàr we muqlang dvzvr rì ígø nøngmaqò nønt mvsøn vdòng taq shànshér we,shvla we dang rì svng èzángàìe. Wervt nøngmaqí mvrà wá vdù lúng dvgvp mà-shvla we Satan rì kaq svng dvbú dvzá:rì nø, nøngmaq kaq svng kù:mp ègà:rì we muqlang dvzvr rì kaq svng nønt yór dvzá:rì lòng íe. 

Nøngmaq rvzvngcerì Mvrà vdòng taqkèní vwvngshì lúngì dvgvp nø nøngmaq kaq svng kumpgàr we muqlang dvzvr rì kaq svng dvbù dvzvr rì we mvdvm, muqlang móngdànò muqlang dvzvr rì nvng shànshér we Vsvng rì shvngbe kaq svng gø dvbù dvzvr rì lòng íe.(Luka 15:10)Ngàí v̄la:tnìni, welòng dø tiq dvchá, mvrà vl vsvng tiq gǿ nøt língshì rā lòng svng nø Gvray Ang muqlàng dvzv́r rì mv́rdv̀ngø dvbùlv́m v̄le,” (wàe) a:lòe. 

"Muqlang dvzvr rì í nøngmaq kaq kùmpgàr pvngshì lúngì dang"

Bāsha vsvng tiqgø' Rvgaqtøm mvdvm taqø èshøq lúngì nī kèní
Gvray muqlang dvzvr ínø kùmpgàr pvngshì we íē. Ya dang svng St. Jerome, St. Thomas, St. Aquinas
St. Bonaventure nvng Shvngømréò vkop vkangmaq vtoshì nø shvngøt dvtú pvng yangà. Vkangpè Yesu àng taqkèní gø cvmrérì kaq svng muqlang dvzvr rì í kùmpgàr we dang ( Mt 18:10-11) vdòng taq shøn yangà. 

Íni nø mvrà wá mvsháò we cvmrécèrì kaq svng muqlang dvzvr rì í kùmpgàr ràe má ?.
 Mvra mà? wàwe taq, Ra e. Pàwálvm wàni Vpè Gvray gvsang ínø nøngmaq svng èshøq í we rvtø àngnī kèní kùmpgàr we muqlang dvzvr rì kaq svng dezvrà daqsha we íe. 

Vpø íwe pèmè vnvmchvngmaq tuqdaq we rvtø taq vrá dvtut dvshvng lvm vlē. Shvngbeí Gvray muqlang dvzá:rìò kùmpgàr we jèjú kønpaq vtoshì laqlúni. Shvngbe svng oqā.